1 Sango Ja Mianangana 9 - MUKANDA USANDU WA ZAMBI 1975

¹ Kashika alwile A-Izalele eswe nikulita ni minyachi mba aasonekene mu mikanda ya mianangana a Izalele. A-Yunda aatwalile ku Babilonia mumu ha Utanguko wo.

² A-Izalele, ni asasendote, ni A-Levi, ni A-Netinime apwile atangu kutwama mu yihinga yo ni mu yihunda yo.

³ Mu Yerusaleme mwatwamine a kuli A-Yunda, ni A-Mbenjamine, ni A-Eframe, ni A-Manase wano:

⁴ Utai mwana Amihude, mwana Omiri, mwana Imiri, mwana Mbani wa kuli A-Pereze mwana Yunda.

⁵ A kuli A-Shilone wano: mwe mwana mutangu Asaia ni ana jenyi a malunga.

⁶ A kuli A-Zera wano: Jeuele hamwe ni usoko wo kulakaji asambano ni makumi livwa.

⁷ A kuli A-Mbenjamine wano: Salu mwana Meshulame, mwana Hodavia, mwana Hasemua;

⁸ ni Ibeneia mwana Jerohame; ni Ela mwana Uzi, mwana Mikiri; ni Meshulame mwana Shefatia, mwana Reuele, mwana Ibenija;

⁹ ni usoko wo nikulita ni yisemuko yo kulakaji livwa, makumi atano ni asambano. Wano eswe te akwa lutwe ja atato mu minyachi ya atato.

¹⁰ A kuli asasendote wano: Jedaia, ni Jehoiaribe, ni Yakine,

¹¹ ni Azaria mwana Hilekia, mwana Meshulame, mwana Zadoke, mwana Meraiote, mwana Ahitube mukwa kuyula mu zuwo lia Zambi.

¹² Adaia mwana Jerohame, mwana Pashure, mwana Malekia. Masai, mwana Adiele, mwana Jahezera, mwana Meshulame, mwana Mesilemite, mwana Imere,

¹³ hamwe ni usoko wo akwa lutwe mu minyachi ya atato, kanunu umuwika ni kulakaji shimbiali ni makumi asambano akwa kujama chikolo ha milimo ya uvumbiko mu zuwo lia Zambi.

¹⁴ A kuli A-Levi wano: Shemaia mwana Hasube, mwana Azrikame, mwana Hashabia wa kuli A-Merari.

¹⁵ Mbakabakare, ni Hereshe, ni Ngalale, ni Matania mwana Mika, mwana Zikiri, mwana Asafwe.

¹⁶ Obadia mwana Shemaia, mwana Ngalale, mwana Yedutune; ni Mberekia mwana Asa, mwana Elekana Watwamine mu yihunda ya A-Neto-fate.

¹⁷ Tufunga twa mapito wano: Shalume, ni Akube, ni Talmone, ni Ahimane ni usoko wo; Shalume te mukwa lutwe.

¹⁸ O amanyine ku chikolo cha mwanangana sali lia Chivumbuko. Apwile tufunga twa mapito mu chilombo cha A-Levi.

¹⁹ Shalume, mwana Kore, mwana Ebiasafe, mwana Kora, ni usoko wenyi a ku munyachi wa atato A-Kora apwile tulayi a milimo ya uvumbiko, te akwa kufunga yikolo ya tabernakulu. Atato apwile helu lia yizavu ya Yehova akwa kufunga unjililo.

²⁰ Finehase mwana Eleazare Waayulile kushi; Yehova wapwile hamwe nenyi.

²¹ Zekaria mwana Meshelemia wapwile kafunga ka chikolo ku unjililo wa mbalaka ya chikungulwila.

²² Wano eswe aatongwele kupwa tufunga twa yikolo apwile kulakaji aali ni kumi ni aali. Wano eswe aalwile nikulita ni minyachi yo mu yihunda yo mumu David ni Samuel mukwa kumona waaselelecho.

²³ O ni ana jo kali ni ulayi wa mapito a zuwo lia Yehova, lie zuwo lia tabernakulu aafunge.

²⁴ Ha sali ni sali kwapwile tufunga; ha Chivumbuko ni Chitokelo, ni Norte ni Sule.

²⁵ Usoko wo a mu yihunda te meza ha matangwa shimbiali akaawane ha kashimbu ha kashimbu.

²⁶ Mumu tufunga twa mapito awana akwa lutwe, o A-Levi, milimo yo ya matangwa eswe ayulile, yipatulo ya zuwo ni upite wa mu zuwo lia Zambi.

²⁷ Mazuwo jo te a kujingilika zuwo lia Zambi mumu milimo yalio niyo. Milimo yo kwazululalio tangwa ha tangwa ha chimene.

²⁸ Amwe hakachi ko afungile yikwachilo ya uvumbiko mumu ha kuyinjisa mayalula, ni ha kuyichiza mayalula.

²⁹ Amwe nawa aasele kulayila yikashi ni yikwachilo ya muma musandu, ni wunga wa fufunuka, ni vinyu, ni maji, ni libano, ni tumbuto twa lupembo mupema.

³⁰ Ni amwe ana ja asasendote alulikile tumbuto.

³¹ Ni Matitia, umwe Ka-Levi mwana mutangu wa Ka-Kora Shalume aye kali ni milimo ya kuyula yuma yeswe mayocha mu yikango.

³² Amwe usoko wo A-Kohate o ayulile mbolo ja kutumbieka, kujilinga ha Sambata Jeswe.

³³ Wano e njimba, akwa lutwe ja atato ja A-Levi atwamine mu yipatulo ya zuwo kalingile milimo yikwo. Akwachile milimo yo mwalwa ni ufuku.

³⁴ Wano e akwa lutwe ja atato ja A-Levi, akwa lutwe nikulita ni yisemuko yo, alemu te. O atwamine mu Yerusaleme.

³⁵ Mu Ngibeone mwatwamine Jehiele tato ya Ngibeone; jina lia pwo lienyi Maka.

³⁶ Mwanenyi wa lunga mutangu Abadone, ni Zure, ni Kishi, ni Mbale, ni Nere, ni Nandambe,

³⁷ ni Gedore, ni Ahio, ni Zekaria, ni Mikelote.

³⁸ Mikelote yasema Shimeame. O atwamine hamwe ni usoko wo mu Yerusaleme hatalanganyi no.

³⁹ Nere yasema Kishi. Kishi yasema Saulu. Saulu yasema Jonatas ni Malakishua, ni Abinadambe, ni Esebale.

⁴⁰ Mwana Jonatas Meribale; Meribale yasema Mika.

⁴¹ Ana ja Mika a malunga wano: Pitone, ni Meleke, ni Tarea, ni Ahaze.

⁴² Ahaze yasema Jara. Jara yasema Alemete, ni Azmave, ni Zimiri. Zimiri yasema Moza.

⁴³ Moza yasema Mbinea; mwanenyi Rafa, ni mwanenyi Eleasa, ni mwanenyi Azele.

⁴⁴ Azele wapwile ni ana-malunga asambano majina jo wano: Azrikame, ni Mbokeru, ni Ishemali, ni Searia, ni Obadia, ni Hanane. Wano eswe te ana ja Azele a malunga.