1 Sango Ja Mianangana 5 - MUKANDA USANDU WA ZAMBI 1975

¹ Ana ja Rupene mwana mutangu wa Izalele (iye te mutangu alioze se achishile muhela wa tato ahanyine wata wenyi kuli ana ja José, mwana Izalele. Kechi kujichika miya nikulita ni wata.

² Yunda wakumbile ayayo ni ana-akwo. Kuli iye kwatuhukile mukwa-kuyula, hindu wata wapwile wa José).

³ Ana ja Rupene a malunga mwana mutangu wa Izalele wano: Hanoke, ni Palu, ni Hezerone, ni Kame.

⁴ Ana ja Joele wano: mwanenyi Shemaia, mwanenyi Ngoke, mwanenyi Shimei,

⁵ mwanenyi Mika, mwanenyi Reaia, mwanenyi Mbale,

⁶ mwanenyi Mbera yoze Tigelate-Pilesere mwanangana wa Asuria atwalile funge. Iye te mulemu wa A-Rupene.

⁷ Ana-akwo nikulita ni mazuwo jo muze ajichikile miya ya yisemuko yo wano: mukwa lutwe Jeiele, ni Zekaria,

⁸ ni Mbela mwana Azaze, mwana Shema, mwana Joele yoze Watwamine ku Aroere ndo ku Nebo ni Mbale-meone,

⁹ ni ku Chivumbuko atwamine ndo ku kunjila ku puya ku lwiji Ufrateze mumu yimuna jo okele mu chifuchi cha Ngiliate.

¹⁰ Ha matangwa ja Saulu ashile jita ni A-Hagri no afwile ku moko jo mba atwamine mu mbalaka jo kweswe ku chifuchi cha Ngiliate sali lia Chivumbuko.

¹¹ Mba A-Ngate atwamine hatalanganyi no mu chifuchi cha Mbashane ndo ku Saleka.

¹² Joele mukwa lutwe ni Shafame yamuhata, ni Janai, ni Sefate mu Mbashane.

¹³ Usoko wo mu munyachi wa atato wano: Mikele, ni Meshulame, ni Shipa, ni Jorai, ni Jakane, ni Zia, ni Epere, shimbiali.

¹⁴ Wano te ana ja Abiale a malunga, mwana Huri, mwana Jaroa, mwana Ngiliate, mwana Mikele, mwana Jeshishai, mwana Jahado, mwana Buze.

¹⁵ Ahi mwana Abediele, mwana Nguni mukwa lutwe wa munyachi wa atato.

¹⁶ O atwamine mu Ngiliate mu Mbashane ni yihunda yako, ni mu ulilo weswe wa Sharone ndo ku njiza jo.

¹⁷ Wano eswe aasonekene nikulita ni yisemuko ha matangwa ja Yotame mwanangana wa A-Yunda ni ha matangwa ja Jeroboame mwanangana wa A-Izalele.

¹⁸ A-Rupene, ni A-Ngate ni chihanda cha ha muchima cha munyachi wa Manase, akwa hamu waze anahase kumbata kepwe ni tutana, ni kukonga mata a manana, te akwa jita apwile makumi awana a tununu ni tununu awana ni kulakaji shimbiali ni makumi asambano eswe akwa kuya ku jita.

¹⁹ Ashile jita ni A-Hagri, ni Yeture, ni Nafishi, ni Nodambe.

²⁰ Zambi yaakwasa kulimika no mba yakumba A-Hagri ni waze eswe apwile no, mumu hakachi ka jita yateta kuli Zambi mba iye wapanjikile mumu amufulielele.

²¹ Yapupa yimuna jo; tumelu makumi atano a tununu, ni mapanga kulakaji aali a tununu ni makumi atano a tununu, ni yimbulu tununu aali, ni malunga kulakaji lia tununu.

²² Yashiha anji mumu jita yize yapwile ya Zambi. O yaasalakana ndo ku miaka ya ufunge.

²³ Chihanda cha ha muchima cha munyachi wa Manase chatwamine mu chifuchi. Okele kweswe ku Mbashane ndo ku Mbale-Hermone, ni Senire ndo ku mulundu wa Hermone.

²⁴ Akwa lutwe a minyachi ya atato wano: Efwe, ni Ishi, ni Eliele, ni Azriele, ni Jeremia, ni Hodavia, ni Jahadiele, malunga a tachi ni hamu, a lufuma, akwa lutwe a minyachi ya atato.

²⁵ Alioze yavulumuna Zambi ya tulamba two; yalinga utanji ha kukaula mazambi a mavungu a chifuchi waze te Zambi haanongesa kumeso jo.

²⁶ Chocho Zambi ya Izalele yavundula mbunge ya Pule mwanangana wa Asuria ni mbunge ya Tigelate-Pilesere mwanangana wa Asuria. Watwalile A-Rupene, ni A-Ngate, ni chihanda cha ha muchima cha munyachi wa Manase nikwatwala ku Hala, ni Habore, ni Hara, ni ku lwiji Ngozane ndo musono.