1 Sango Ja Mianangana 29 - MUKANDA USANDU WA ZAMBI 1975

¹ Mwanangana David yamba ku chikungulwila cheswe ngwenyi, Mwanami Solomone, wa kutongola ukawenyi kuli Zambi achili mukweze, kanda akola, ni milimo yino yinene chikolo mumu zuwo lino hi lia mutu ko alioze lia Yehova Zambi.

² Ami hinalulika ni tachi jami jeswe ha zuwo lia Zambi yami oru ha yuma ya oru, ni prata ha yuma ya prata, ni unengu ha yuma ya unengu, ni utale ha yuma ya utale, ni mitondo ha yuma ya mutondo, ni sardonica, ni mawe a kulamika, ni mawe a kutokeka, a ulombo weka ni weka, ni milali yeswe ya mawe alemu, ni a marmore a kulumbama.

³ Chikwo nawa mumu ha kusa zango liami lieswe ku zuwo lia Zambi yami, se nguli ni upite wa yami mwene wa oru ni prata ngunauhana ku zuwo lia Zambi yami helu lia yuma yize yeswe hinalulika ha lie zuwo lisandu,

⁴ ngwami tununu atatu a *talentu ja oru, ye oru ya Ofiri, ni tununu shimbiali a *talentu ja prata ya kupemesa kulamika ha yishimi ya mazuwo,

⁵ ni oru ha yuma ya oru, ni prata ha yuma ya prata, ni ha milali yeswe ya milimo ya kulinga ni moko ja akwa utotombo. Mba iya mahana ni mbunge, ni kulitumbikila musono kuli Yehova?

⁶ Henaho alemu a yisemuko ya atato, ni alemu a minyachi ya Izalele, ni tupitau twa tununu ni twa kulakaji, ni akwa kuyula milimo ya mwanangana yahana ni mbunge.

⁷ Yahana ha milimo ya zuwo lia Zambi tununu atano a *talentu ja oru, ni kumi lia tununu twa ndarike ni kumi lia tununu twa *talentu ja prata, ni kumi lia tununu ni tununu nake a *talentu ja unengu, ni kulakaji lia tununu twa *talentu ja utale.

⁸ Waze apwile ni mawe alemu yaahana ku upite wa zuwo lia Yehova mu chiyulo cha Ka-Ngeshone Jehiele.

⁹ Ni e atu awahililile mumu ahanyine ni mbunge, mumu alambwile Yehova ni mbunge yingunu, ni mwanangana David wawahililile ni chiseke chinji.

¹⁰ Kashika David yahalisa Yehova kumeso ja chikungulwila nikwamba ngwenyi, Ufumane, Yehova Zambi ya kalamba ketu Izalele ndo ku miaka yeswe ya mutolo.

¹¹ Unene weswe wa mbala wa yena Yehova, ni ndundo, ni uhenya, ni kukumba, ni wanangana. Mumu cheswe chili mwilu ni hashi niche. We wanangana wa yena Yehova, ni yena kuwatunda ngwe mutwe helu lia yuma yeswe.

¹² Upite ni ulemu kuli yena unakatuka, ni yena wakuyula yuma yeswe. Ngolo ni ndundo jili mu chiyulo che, ni poko ya kulemesa atu ni kuhana tachi kuli eswe.

¹³ Kashika yena Zambi yetu tunakusakwilila nikuhalisa jina lie lia uhenya.

¹⁴ Alioze yami kuchi napwa, ni atu jami kuchi apwa hiwatuhashisa kuhana ni mbunge milambu yipwahaha? Mumu yuma yeswe kuli yena yinakatuka, kashika upite wa yena mwene hitwakuhilwisa.

¹⁵ Mumu yetu tuli ngeji kumeso je ni yilambala ngwe tulamba twetu apwile. Matangwa jetu muno-muze kapwa ngwe Chizulie chize muchisuha, kutwalindulukile.

¹⁶ Yehova Zambi yetu yuma yino yeswe hitwalulika kukutungila zuwo ha jina lie lisandu yeswe yinakatuka kuli yena; yeswe ya mbala ya yena.

¹⁷ Zambi yami, ngunanyingika yena kuwakweseka mbunge, kuwakuwahilila ni ululi. Ha kutwala kuli yami mu kutuwika cha mbunge yami hinahana yino yuma yeswe nikulikomonona. Mba hinamona ni chiseke atu je wano anasu kuno kanakulambula ni mbunge.

¹⁸ Yehova, Zambi ya tulamba Apalahama, ni Izake, ni Izalele, funga kupala chino mu manyonga ja mbunge ja atu je, ukasongwele mbunge jo kuli yena.

¹⁹ Hana kuli mwanami Solomone nawa mbunge yingunu ya kufunga maliji je, ni Shindakenyo je, ni shimbi je, ni ya kulinga yino yuma yeswe, ni ya kutunga zuwo lino yami hinalulikila ye yuma.

²⁰ David yamba kuli akwa chikungulwila eswe ngwenyi, Haliapwila hiwahisenu Yehova Zambi yenu. Mba akwa chikungulwila eswe yalemesa Yehova Zambi ya tulamba two. Yahetamisa mitwe yo ni kuwayila Yehova ni mwe mwanangana.

²¹ Muze hikwacha yashihila yitapo Yehova, ni kulambula milambu ya kulumba kuli Yehova; kanunu ka kuji a ngombe, ni kanunu ka kuji a mapanga, ni kanunu ka ana-mapanga hamwe ni milambu yayo ya kunwa, ni yitapo ya kulumbama hali A-Izalele eswe.

²² Yalia, yanwa kumeso ja Yehova ha tangwa lize ni uwahililo wunji. Mba yaswanyisa Solomone mwana David wanangana chisuho chamuchiali nikumuzu jila maji kuli Yehova akapwe mwanangana, ni Zadoke aye akapwe sasendote.

²³ Chocho Solomone Watwamine mwanangana ha ngunja ya Yehova kusalakana tato David, yitanga yenyi yiyiwaha ni A-Izalele eswe amwononokenene.

²⁴ Alemu eswe azeyele kuli mwanangana Solomone hamuwika ni akwa ndundo ni ana a malunga a mwanangana David eswe nawa.

²⁵ Yehova walemesene chikolo Solomone kumeso ja A-Izalele eswe. Wamuhele ulamba umwe wa wanangana kuhiana mianangana eswe te hapwa kushi mu Izalele.

²⁶ Chocho wayulile David mwana Yese hali A-Izalele eswe.

²⁷ Wayulile makumi awana a miaka helu lia A-Izalele. Mu Heprone wayulile miaka shimbiali ni mu Yerusaleme wayulile makumi atatu a miaka ni miaka yitatu.

²⁸ Yafwa ni ukulwana upema, wayukile ni matangwa, ni upite, ni ulemu, mba mwanenyi Solomone yamuswana mu wanangana.

²⁹ Yitanga ya mwanangana David yitangu ni yasula hanayisoneka mu mukanda wa mukwa kumona Samuel, ni mu mukanda wa profeta Natane, ni mu mukanda wa mukwa kumona Ngate,

³⁰ hamuwika ni kuyula chenyi, ni ndundo jenyi, ni yuma yize yamuwanyine iye ni A-Izalele ni mawanangana a yifuchi.