1 Sango Ja Mianangana 28 - MUKANDA USANDU WA ZAMBI 1975

¹ David yakungulula ku Yerusaleme alemu eswe a Izalele, ni alemu a minyachi, ni tupitau twa mbunga jize avumbikile mwanangana mu ngango, ni tupitau twa tununu ni tupitau twa kulakaji, ni akwa kuyula upite weswe ni yikumba yeswe ya mwanangana, ni ana jenyi, hamwe ni yilolo ni akwa ndundo, e malunga eswe a ndundo ni hamu.

² Mba mwanangana David yamana ha molu jenyi ngwenyi, Ngwivwenu akwetu ni atu jami. Nyi yami mwene, chapwile mu mbunge yami kutunga zuwo lia uhwimino ha mushete wa usendo wa Yehova ni ha chitwamo cha yiliato ya Zambi yetu, kashika nalulikile yuma ya kutunga nayo.

³ Alioze Zambi yamba kuli yami ngwenyi, Ena kuchi kutunga zuwo ha jina liami mumu uli lunga wa jita; hiwamwanga manyinga.

⁴ Hindu chipwe chocho Yehova Zambi ya Izalele wangutongwele hakachi ka munyachi weswe wa tata ngukapwe mwanangana wa Izalele ndo ku miaka. Mumu watongwele Yunda kupwa mulemu, ni mu munyachi wa Yunda chisemuko cha tata, ni hakachi ka ana ja tata wawahililile muli yami akangupwise mwanangana wa A-Izalele eswe.

⁵ Yehova hangwaha ana anji a malunga alioze kuli ayo eswe hatongola Solomone akatwame ha ngunja ya wanangana wa Yehova hali A-Izalele.

⁶ Mba hamba kuli yami ngwenyi, Mwané Solomone kumakatunga zuwo liami ni maze jami mumu hinamutongola kupwa mwanami, ni yami mungupwa tato.

⁷ Nyi majikiza kulinga shimbi jami ni upatwilo wami ngwe musono mungukolesa wanangana wenyi ndo ku miaka ya mutolo.

⁸ Kashika, kumeso ja A-Izalele eswe, chikungulwila cha Yehova ni mu matwi ja Zambi yetu fungenu kanawa ni kukaula shimbi jeswe ja Yehova Zambi yenu hanga nukazuke chifuchi chino chipema ni nukachiswanyise kuli ana jenu kulutwe lienu ndo ku miaka.

⁹ Ni yena, mwanami Solomone, nyingika Zambi ya tatenu ukamulingile ni mbunge yingunu ni manyonga a kulitumbikila. Mumu Yehova kakupolongoza mbunge jeswe ni kakunyingika kutaka cha manyonga eswe. Nyi mumufupa mumuwana, alioze nyi mumwehuka kumakumbila ndo ku miaka.

¹⁰ Kanyama kanawa mumu Yehova hana-kutongola umutungile zuwo lia tembele. Takama uchilinge.

¹¹ Mba David yahana kuli mwanenyi Solomone cheseko cha senge lia tembele, ni mazuwo jayo, ni mazuwo ja upite wayo, ni yipatulo yayo ya kwilu, ni yipatulo yayo ya muchima, ni kuma kwa chitwamo cha keke,

¹² ni cheseko cha yuma yeswe hatambula kuli Spiritu, ha maze a zuwo lia Yehova, ni mazuwo eswe a kujingilika, ni ha mazuwo a upite wa zuwo lia Zambi, ni ha mazuwo a upite wa yuma ya kutumbikila,

¹³ ni ha ngango ja asasendote ni A-Levi, ni ha milimo yeswe ya uvumbiko wa zuwo lia Yehova, ni ha yikwachilo yeswe ya milimo mu zuwo lia Yehova,

¹⁴ ni ya oru ya kupezalisa ha yikwachilo ya oru, ye yikwachilo yeswe ya milali yeka ni yeka ya milimo, ni prata ha yikwachilo yeswe ya prata ya kupezalisa, ye yikwachilo yeswe ya milali yeka ni yeka ya milimo.

¹⁵ Yamwaha nawa pezu ya oru ha yikwachilo ya ndeya ya oru, ni oru ha ndeya ha pezu ya kulita ni chikwachilo cheswe ni ndeya jaho, ni ha yikwachilo ya ndeya ya prata yamwaha prata ha pezu ha chikwachilo cheswe ni ndeya jaho nikulita ni milimo ya chikwachilo cheswe.

¹⁶ Yamwaha nawa oru ha mesa ja mbolo ja kutumbieka ha mesa ni mesa, ni prata ha mesa ja prata,

¹⁷ ni misako, ni mbasia, ni misenge ya oru yipema, ni ha ndeho ja oru ha pezu ya ndeho ni ndeho, ni ha ndeho ja prata ha pezu ya ndeho ni ndeho.

¹⁸ Yamwaha oru ya kupemesa ha chilumbilo cha insensu nikulita ni pezu, ni oru ha cheseko cha temba lia akerupimi waze olwele mapulwa jo nikutuka mushete wa usendo wa Yehova.

¹⁹ David ngwenyi, Chino cheswe hanangulongesa cha kusoneka ku kwoko lia Yehova; milimo yeswe ya cheseko chino cheswe.

²⁰ David yamba kuli mwanenyi Solomone ngwenyi, Takama; hamuka uchilinge. Kanda wivwa woma, hanji kulishimwoka mumu Yehova Zambi, mwe Zambi yami, kwali hamwe ni yena. Kechi kahona. Kechi kakwehuka ndo milimo yeswe ya uvumbiko wa zuwo lia Yehova muyihwa.

²¹ Chikwo nawa ngango ja asasendote ni A-Levi kwali ha milimo yeswe ya zuwo lia Zambi, ni ha milali yeswe ya milimo kwali malunga a mbunge ja kulitumbikila ni kujama ha mulali weswawo wa milimo. Ni tupitau ni e atu eswe mazeya liakulu ku shimbi je.