1 Sango Ja Mianangana 27 - MUKANDA USANDU WA ZAMBI 1975

¹ Ana ja Izalele nikulita ni kwalula cha akwa lutwe a minyachi ya atato, ni tupitau twa tununu ni twa kulakaji, ni yilolo aze avumbikile mwanangana ni yuma yeswe ya kutwala ku ngango jize ja kwiza ni kuya kakweji ha kakweji ndusu mu mwaka, wano; mba ngango yeswe yapwile makumi aali a tununu ni tununu awana.

² Joshobeame mwana Zabadele wapwile helu lia ngango yitangu ha kakweji mutangu. Mu ngango yenyi mwapwile makumi aali a tununu ni tununu awana.

³ Iye te mukwa lutwe hakachi ka tupitau twa tujita eswe ha kakweji mutangu, wa munyachi wa Pereze.

⁴ Dodai Ka-Hoha wapwile helu lia ngango ya kakweji wamuchiali; mukwa kuyula Mikelote. Ngango yenyi ya makumi aali a tununu ni tununu awana.

⁵ Kapitau wamuchitatu wa tujita ha kakweji wamuchitatu Benaia mwana sasendote Jehoiada, aye mukwa lutwe. Ngango yenyi ya makumi aali a tununu ni tununu awana.

⁶ Yono mwe Benaia mukwa ndundo hakachi ka makumi atatu ni helu lia makumi atatu. Mu ngango yenyi mwapwile mwanenyi Amizabade.

⁷ Kapitau wamuchiwana ha kakweji wamuchiwana Asahele mwanakwo wa Joabe, ni Zebadia mwanenyi wamukawile. Ngango yenyi ya makumi aali a tununu ni tununu awana.

⁸ Kapitau wamuchitano ha kakweji wamuchitano Shamahute Ka-Izaraha. Ngango yenyi ya makumi aali a tununu ni tununu awana.

⁹ Kapitau wamuchisambano ha kakweji wamuchisambano Ira mwana Ka-Tekoa Ikeshe. Ngango yenyi makumi aali a tununu ni tununu awana.

¹⁰ Kapitau wamuchishimbiali ha kakweji wamuchishimbiali Ka-Pelone Heleze wa kuli A-Eframe. Ngango yenyi ya makumi aali a tununu ni tununu awana.

¹¹ Kapitau wamuchinake ha kakweji wamuchinake Ka-Husha Sibekai wa kuli A-Zera. Ngango yenyi makumi aali a tununu ni tununu awana.

¹² Kapitau wamuchilivwa ha kakweji wamuchilivwa Ka-Anatote Abieza wa kuli A-Mbenjamine. Ngango yenyi makumi aali a tununu ni tununu awana.

¹³ Kapitau wamuchikumi ha kakweji wamuchikumi Ka-Netofate Maharai wa kuli A-Zeraha. Ngango yenyi makumi aali a tununu ni tununu awana.

¹⁴ Kapitau kumi ni kashi ha kakweji kumi ni kashi Ka-Piratone Benaia wa kuli A-Eframe. Ngango yenyi makumi aali a tununu ni tununu awana.

¹⁵ Kapitau kumi ni wamuchiali ha kakweji kumi ni wamuchiali Ka-Netofate Heldai wa kuli Oteniele. Ngango yenyi makumi aali a tununu ni tununu awana.

¹⁶ Chikwo nawa helu lia minyachi ya Izalele; wa A-Rupene Elieza mwana Zikiri wapwile mukwa kuyula. Wa A-Simeone Shefatia mwana Maka.

¹⁷ Wa A-Levi Hashabia mwana Kemuele. Wa A-Arone Zadoke.

¹⁸ Wa A-Yunda Elihu yayo ya David. Wa Isaka Omiri mwana Mikele.

¹⁹ Wa Zapulone Ishmaia mwana Obadia. Wa Napatali Jerimote mwana Azriele.

²⁰ Wa A-Eframe Hoshia mwana Azazia. Wa chihanda cha ha muchima cha munyachi wa Manase Joele mwana Pedaia.

²¹ Wa chihanda cha ha muchima cha munyachi wa Manase mu Ngiliate Ido mwana Zekaria. Wa Mbenjamine Jasiele mwana Abenere.

²² Wa Ndane Azarele mwana Jerohame. Wano e tupitau a minyachi ya Izalele.

²³ Alioze David kalwile atu kushi lia makumi aali a miaka. Mumu Yehova te hanambe ngwenyi, Mungwokesa A-Izalele ngwe matongonoshi a mwilu.

²⁴ Joabe mwana Zeluia waputukile kwaalula alioze kamanunwine mumu kwejile utenu wunji hali A-Izalele mumu ha chuma chino. Kashika kasonekene kwalula cho mu mukanda wa sango ja mwanangana David.

²⁵ Azmave mwana Adiele wayulile upite wa mwanangana. Jonatas mwana Uzia wayulile upite wa mu minda, ni mu membo, ni mu yihunda, ni mu mbonge.

²⁶ Ezeri mwana Chelube wayulile waze alingile milimo ya mu minda ha kulima.

²⁷ Shimei Ka-Ramate wayulile minda ya uva, ni Zapati Ka-Shife wayulile kwima cheswe cha minda ya uva, ni mazuwo a kutulikila vinyu.

²⁸ Mbaele-henane Ka-Ngedere wayulile mitondo ya olevwe ni misuwa ya ku mwanda, ni Njoashe wayulile mazuwo a kutulikila maji.

²⁹ Shitari wa ku Sharone wayulile matanga eswe a yimuna alile mu Sharone, ni Sefate mwana Adalai wayulile matanga a ku yikulo.

³⁰ Ka-Ishemali Obile wayulile tumelu; ni Ka-Merono Jedeia wayulile yimbulu.

³¹ Ka-Hagri Yajiza wayulile pembe ni mapanga. Wano eswe ayulile yikumba ya mwanangana David.

³² Jonatas natu ya David wapwile kaliamanga. Aye mukwa mana ni mukwa kusonyeka. Jehiele mwana Hakamoni wapwile ni ana ja mwanangana.

³³ Ahitofele aye kaliamanga ka mwanangana, ni Ka-Arke Hushai aye kasendo ka mwanangana.

³⁴ Kulihata ni Ahitofele kwapwile Jehoiada mwana Benaia, ni Abiatare. Kapitau ka tujita a mwanangana Joabe.