1 Sango Ja Mianangana 26 - MUKANDA USANDU WA ZAMBI 1975

¹ Ha ngango ja akwa kufunga mapito yasela A-Kora; Meshelemia mwana Kore wa ana ja Asafwe.

² Meshelemia yasema ana a malunga, mutangu Zekaria, wamuchiali Jediaele, wamuchitatu Zebadia, wamuchiwana Jatniele,

³ wamuchitano Elame, wamuchisambano Jehohana, wamuchishimbiali Elionai.

⁴ Obede-Endome yasema ana a malunga, mutangu Shemaia, wamuchiali Yehozabade, wamuchitatu Joa, wamuchiwana Sakare, wamuchitano Netanele,

⁵ wamuchisambano Amiele, wamuchishimbiali Isaka, wamuchinake Puletai, mumu Zambi Wamuwahishile.

⁶ Ni mwanenyi Shemaia yasema ana a malunga a kuyula ha munyachi wa tato mumu apwile malunga a tachi ni hamu.

⁷ Ana ja Shemaia Oteni, ni Rafaele, ni Opete, ni Elezabade (usoko wenyi apwile akwa hamu) ni Elihu, ni Shemakia.

⁸ Wano eswe te ana ja Obede-Endome mba ayo ni ana jo ni usoko wo eswe malunga a kujama ni tachi ha ye milimo. Akwa Obede-Endome makumi asambano ni aali.

⁹ Ni Meshelemia wapwile ni ana a malunga ni usoko kumi lia malunga ni malunga nake a hamu.

¹⁰ Ni Hosa nawa wa ana ja Merari yasema ana a malunga; mukwa lutwe Shimiri (iye hi kapula-jimo ko alioze tato wamupwishile mukwa lutwe);

¹¹ wamuchiali Hilekia, wamuchitatu Tebalia, wamuchiwana Zekaria, ana eswe a Hosa a malunga, ni usoko wenyi kumi ni atatu.

¹² A kuli wano achijile akwa kufunga mapito, te kuli akwa lutwe, ni milimo ya kwasela chizechene ngwe usoko wo akavumbike mu zuwo lia Yehova.

¹³ Yata chela, ni akepe ni anene nikulita ni minyachi ya atato ha mapito matambula.

¹⁴ Chela cha ku Chivumbuko chejile kuli Shelemia. Mba atele chela hali mwanenyi Zekaria kaliamanga wa mana anji. Chela chenyi chapwile cha ku Norte.

¹⁵ Kuli Obede-Endome cha ku Sule, ni anenyi milimo ya mazuwo a kutulikila.

¹⁶ Kuli Supimi ni Hosa cha ku Chitokelo hakamwihi ni pito lia Shalikete ku jila ya ukandukilo, kalayi ha kalayi.

¹⁷ Ku Chivumbuko kwapwile A-Levi asambano, ku Norte awana ha tangwa awana ha tangwa, ku Sule awana ha tangwa awana ha tangwa, ni ha mazuwo a kutulikila aali ha aali.

¹⁸ Ku Parebare ku Chitokelo kwapwile awana ku jila ni aali kwe ku Parebare.

¹⁹ Jino je ngango ja akwa kufunga mapito a kuli ana ja Kore ni ana ja Merari.

²⁰ A kuli A-Levi Ahija wapwile helu lia upite wa zuwo lia Zambi, ni upite wa yuma ya kutumbikila.

²¹ Ana ja Ladane wano; ana ja A-Ngeshone a kuli Ladane akwa lutwe a ku minyachi ya atato A-Ladane Ka-Ngeshone; Jehiele.

²² Ana ja Jehiele, Zetame ni mwanakwo Joele ha upite wa zuwo lia Yehova.

²³ Ni A-Amarame, ni A-Izehare, ni A-Heprone, ni A-Uziele,

²⁴ ni Shebuele mwana Ngeshome mwana Mose aye mukwa kuyula upite weswe.

²⁵ Usoko wenyi; Elieza yasema Rehabia mwanenyi, Jesaia mwanenyi, Jorame mwanenyi, Zikiri mwanenyi, Shelomote mwanenyi.

²⁶ Yono Shelomote ni usoko wenyi ayulile upite weswe wa yuma ya kutumbikila, yize atumbikilile kuli mwanangana David, ni akwa lutwe mu minyachi ya atato, ni tupitau twa tununu ni twa kulakaji, ni tupitau twa tujita.

²⁷ Te yatumbikila ku milimo ya kululika zuwo lia Yehova chihanda cha upite uze apupile mu jita.

²⁸ Ni upite uze atumbikilile nawa Samuel mukwa kumona, ni Saulu mwana Kishi, ni Abenere mwana Nere, ni Joabe mwana Zeluia. Mweswawo watumbikilile chimwe chuma chapwile ku chiyulo cha Shelomote ni usoko wenyi.

²⁹ Kuli A-Izehare; Chenania ni ana jenyi apwile helu lia yuma yeswe ya haze hali A-Izalele; yuma ya yilolo ni ngaji.

³⁰ Kuli A-Heprone, Hashabia ni usoko wenyi, malunga a hamu kanunu ni kulakaji shimbiali apwile ni ulayilo hali A-Izalele sali lia Yordau ku Chitokelo ha yuma yeswe ya Yehova ni uvumbiko wa mwanangana.

³¹ Kuli A-Heprone Jeria wapwile mukwa lutwe hali A-Heprone nikulita ni yisemuko yo kuli atato. Ha mwaka makumi awana wa kuyula cha David yaafupa mba yaawana hakachi ka akwa ndundo ni hamu ku Yazere ya Ngiliate.

³² Usoko wenyi, malunga a hamu, apwile tununu aali ni kulakaji shimbiali akwa lutwe mu minyachi ya atato mba David yaapwisa tulayi hali A-Rupene, ni A-Ngate, ni chihanda cha ha muchima cha munyachi wa A-Manase ha yuma yeswe ya Zambi ni milimo ya mwanangana.