1 Sango Ja Mianangana 24 - MUKANDA USANDU WA ZAMBI 1975

¹ Ngango ja ana ja Arone jino. Ana ja Arone Nandambe, ni Ambihu, ni Eleazare, ni Itama.

² Alioze Nandambe ni Ambihu afwile shimbu tato achili ni mwono, kahichikile ana kashika Eleazare ni Itama alingile milimo ya usasendote.

³ David ni Zadoke wa kuli ana ja Eleazare ni Ahimeleke wa kuli ana ja Itama aapangilile nikulita ni ngango ja milimo yo.

⁴ Akwa lutwe okele hakachi ka ana ja Eleazare; ana ja Itama akehe te, mba yaahandununa Chichino. Ana ja Eleazare apwile kumi ni asambano akwa lutwe mu minyachi ya atato, ni kuli ana ja Itama nikulita ni minyachi ya atato nake.

⁵ Chocho yaapangila nikulita ni chela amwe hamwe ni akwo hamuwika mumu apwile tusongo twa mu zuwo lisandu ni tusongo twa Zambi hakachi ka ana ja Eleazare ni ana ja Itama.

⁶ Mukwa kusonyeka Shemaia mwana Netanele Ka-Levi yaasoneka kumeso ja mwanangana ni alemu ni sasendote Zadoke, ni Ahimeleke mwana Abiatare ni akwa lutwe a minyachi ya atato asasendote ni A-Levi. Zuwo limuwika lia tato hali Eleazare ni limuwika hali Itama.

⁷ Chela chitangu chatongwele Jehoiaribe, chamuchiali Jedaia,

⁸ chamuchitatu Harimi, chamuchiwana Shorime,

⁹ chamuchitano Malekia, chamuchisambano Mijamine,

¹⁰ chamuchishimbiali Hakozo, chamuchinake Abija,

¹¹ chamuchilivwa Yeshua, chamuchikumi Shekania,

¹² kumi ni kashi Eliashipe, kumi ni chamuchiali Jakime,

¹³ kumi ni chamuchitatu Hupa, kumi ni chamuchiwana Jeshebia,

¹⁴ kumi ni chamuchitano Biliga, kumi ni chamuchisambano Imere,

¹⁵ kumi ni chamuchishimbiali Hezira, kumi ni chamuchinake Hapizeza,

¹⁶ kumi ni chamuchilivwa Petahia, makumi aali Jehezekele,

¹⁷ makumi aali ni kashi Yakine, makumi aali ni wamuchiali Gamulu,

¹⁸ makumi aali ni wamuchitatu Ndelaia, makumi aali ni wamuchiwana Mazia.

¹⁹ Chocho aasela mu ngango jo ha milimo yo akanjile mu zuwo lia Yehova nikulita ni shimbi yize aahele ku kwoko lia Arone tato chizechene ngwe Yehova, Zambi ya Izalele wamutumine iye.

²⁰ A-Levi akwo; Shubele wa kuli A-Amarame, kuli ana ja Shubele, Jedeia.

²¹ Kuli A-Rehabia; ana ja Rehabia mukwa lutwe Ishia.

²² Shelomote wa kuli A-Izehare; Jahate wa kuli A-Shelomote;

²³ Ana ja Heprone, mukwa lutwe Jeria, wamuchiali Amaria, wamuchitatu Jahaziele, wamuchiwana Jekameame.

²⁴ Mika wa kuli A-Uziele; Shamiri wa kuli ana ja Mika.

²⁵ Ishia mwanakwo wa Mika; ni Zekaria wa kuli A-Ishia.

²⁶ Ana ja Merari, Mahile ni Mushi; ana ja Jazia, Beno.

²⁷ Ana ja Merari; A-Jazia Beno, ni Shohame, ni Zakure, ni Ibri.

²⁸ A-Mahile; Eleazare aye kasemene ana a malunga.

²⁹ A-Kishi; ana ja Kishi Jeramila.

³⁰ Ana ja Mushi; Mahile, ni Edere, ni Jeremote. Wano e ana ja A-Levi nikulita ni minyachi ya atato.

³¹ Wano nawa atele chela ngwe usoko wo ana ja Arone kumeso ja mwanangana David ni Zadoke, ni Ahimeleke ni akwa lutwe a mu minyachi ya atato ja asasendote ni A-Levi. Yachilinga mu yisemuko ya atato ni chipwe muli alemu ku yisemuko ya ana-akwo nawa.