1 Sango Ja Mianangana 22 - MUKANDA USANDU WA ZAMBI 1975

¹ Kashika David yamba ngwenyi, Kuno mukupwa zuwo lia Yehova Zambi ni chilumbilo cha Izalele cha milambu ya kulumba.

² David yatuma kukungulula yilambala eswe a mu chifuchi cha Izalele mba yasela apedreru akasonge mawe a kutunga no zuwo lia Zambi.

³ David yalulika utale wa kulumbama ha mbambo ja kusa mu mapito a yikolo ni ha manungino, ni unengu wa kulumbama te kahashile kuupezalisa;

⁴ ni mitondo ya sedru kahashile kuyalula mumu A-Sendone ni A-Teru yaneha mitondo ya sedru ya kulumbama kuli David.

⁵ David yamba ngwenyi, Mwanami Solomone kanuke chimbovu, ni zuwo lino makalitunga hali Yehova chatamba kuhiana kupema; lia lufuma ni uhenya ndusu mu yifuchi yeswe. Kashika mungulilulikila ye yuma. Chocho David yalulika yuma ya kulumbama shimbu kandafwa.

⁶ Yasanyika mwanenyi Solomone, yamushika afunge zuwo hali Yehova, mwe Zambi ya Izalele.

⁷ David yamba kuli mwanenyi Solomone ngwenyi, Ha kutwala kuli yami, chapwile mu mbunge yami kutunga zuwo ha jina lia Yehova Zambi yami.

⁸ Alioze liji lia Yehova yiliza kuli yami ngwo, Ena hiwamwanga manyinga anji, hiwasa jita yinji. Ena kuchi kutunga zuwo ha jina liami mumu ha kumwanga manyinga anji hashi kumeso jami.

⁹ Alioze musema mwana wa lunga, mukwa kuhwima mbunge, ni yami mungumwaha uhwimino kuli akwa kole jenyi kweswe kwa kumujingilika. Mumu jina lienyi mulipwa Solomone mba ha matangwa jenyi munguhana sambukila ni uhwimino kuli A-Izalele.

¹⁰ Aye kumakatunga zuwo ha jina liami. Aye kumakapwa mwanami, ami mungupwa tato, mba mungukolesa ngunja ya wanangana wenyi hali A-Izalele ndo ku miaka yeswe.

¹¹ Kashika mwanami, Yehova akapwe hamwe ni yena akakuwahise. Tunga zuwo lia Yehova Zambi ye nikulita ni liji lienyi hali yena.

¹² Yehova akwehe malinjekela ni chinyingi mba muze makwaha chiyulo hali A-Izalele ukafunge shimbi ja Yehova Zambi ye.

¹³ Chocho mukawaha nyi mutala kanawa kulinga yiyulo ni upatwilo yize Yehova wambilile Mose ha kutwala kuli A-Izalele. Takama; pwako ni hamu linji; kanda wivwa woma chipwe kulishimwoka.

¹⁴ Mu lamba liami hinalulika ha zuwo lia Yehova kulakaji lia tununu twa *talentu ja oru, ni kanunu ka tununu twa *talentu ja prata, ni unengu ni utale kechi kuhasa kuupezalisa ha kulumbama. Hinalulika nawa mitondo ni mawe mba yena muhasa kuwezaho.

¹⁵ Chikwo nawa uli ni akwa milimo anji; akwa kusonga ni akwa kululika mawe ni mitondo kushi kuhasa kwaalula, eswe akwa utotombo ni milimo yeswayo,

¹⁶ ya kutwala ku oru, ni prata, ni unengu, ni utale, kashika, katuka ulinge ni Yehova akapwe hamwe ni yena.

¹⁷ David yatuma nawa alemu eswe a Izalele kukwasa mwanenyi Solomone ngwenyi,

¹⁸ Yehova Zambi yenu kwali hamwe ni yenu. Hanuhwimisa kweswe kwa kujingilika mumu hanakunjika akwa chifuchi ku kwoko liami kashika chifuchi cheswe hichahomboka kumeso ja Yehova ni kumeso ja atu jenyi.

¹⁹ Senu mbunge jenu ni mwono wenu kukaula Yehova Zambi yenu. Katukenu kashika, nutunge zuwo lisandu lia Yehova Zambi, nukanehe nawa mushete wa usendo wa Yehova, ni yikwachilo yisandu ya Zambi mu zuwo lize matunga ha jina lia Yehova.