1 Sango Ja Mianangana 21 - MUKANDA USANDU WA ZAMBI 1975

¹ Satana yalimika ni Izalele. Yasongojola David alule A-Izalele.

² Mba David yamba kuli Joabe ni kuli alemu a Izalele ngwenyi, Yénu, nwalule A-Izalele chize ku Mbia-shipa ndo ku Ndane nukangunehene liji ngukanyingike kwalula cho.

³ Joabe yamba ngwenyi, Yehova aweze kuli atu jenyi kulakaji lia yisuho alioze, mwene mwanangana wami, te kapwile eswe tuvumbi twenu? Kuchi te mwene wami kanazange kulinga chuma chino? Kuchi te nunazange kukokela mulonga A-Izalele?

⁴ Hindu liji lia mwanangana yilikumba liji lia Joabe kashika Joabe yapalika ndusu mu Izalele mweswe, yeza nawa ku Yerusaleme.

⁵ Joabe yakunjika kuli David kwalula cha e atu. Atu eswe A-Izalele apwile kanunu ka tununu ni kulakaji lia tununu a malunga akwa tutana; ni A-Yunda apwile kulakaji awana ja tununu ni makumi shimbiali a tununu, malunga a tutana.

⁶ Alioze A-Levi ni A-Mbenjamine kaalwile mumu liji lia mwanangana liakokelele lwaji Joabe.

⁷ Ni Zambi yevwa kupiha ni chuma chino kashika yalamba A-Izalele.

⁸ Mba David yamba kuli Zambi ngwenyi, Mulonga unene hinavulumuna ha kulinga chuma chino. Kashika ngunalembelela Uchize kama uhenge wa yami kavumbi ke mumu hinalinga uhepuke.

⁹ Yehova yamba kuli Ngate mukwa kumona wa David ngwenyi,

¹⁰ Yako kuli David ukambe ngwe, Yehova kanambe ngwenyi, Yuma yitatu ngunakwehe, utongole chimuwika chize mungukulinga.

¹¹ Chocho Ngate yeza kuli David ngwenyi, Yehova kanambe ngwenyi, Tongola chize unachizange,

¹² shina miaka yitatu ya kapunga, shina tukweji atatu akanwonwone kuli akwa kole je shimbu tutana twa akwa kole je makuhanga; nyi shina matangwa atatu a katana ka Yehova, chilungo mu chifuchi ni mungelo wa Yehova kanonwona ndusu mu manjiza eswe a Izalele. Kashika nyonga kumbululo lize mungutwala kuli yoze wangutumanga.

¹³ David yamba kuli Ngate ngwenyi, Ngunashachiwa chikolo. Mungulikunjika mu kwoko lia Yehova; mumu keke yenyi yinene. Kanda angukunjika ku moko ja atu.

¹⁴ Chocho Yehova yatuma chilungo hali A-Izalele mba yikufwa makumi shimbiali a tununu a malunga A-Izalele.

¹⁵ Zambi yatuma umwe mungelo ku Yerusaleme akayonwone. Mba muze himayonwona, Yehova yatala, yalikonyeka ha chuma chino chikalu, mba yamba kuli mungelo chonwonyi ngwenyi, Kunahu! Kanda uweza nawa kwoko lie. Mungelo wa Yehova te kanamana ku chizungwilo cha Ka-Yepushe Ornane.

¹⁶ David yahetula meso jenyi, yamona mungelo wa Yehova kanamana hakachi ka hashi ni lilu, ni katana wa kutomona mu kwoko lienyi kanamuzozo helu lia Yerusaleme. Henaho David ni makulwana, eswe anazala yikeleyi, yafulamana hashi.

¹⁷ David yamba kuli Zambi ngwenyi, Yami natumine kwalula e atu. Yami mwene navulumwine ni kulinga uhenge alioze wano mapanga o halinga yika? Yehova Zambi yami, ngunaliumbu, kwoko lie likalimike ni yami, ni munyachi wa tata alioze kanda ulimika ni wano atu akamone lamba.

¹⁸ Mungelo wa Yehova yatuma Ngate ambe kuli David akakanduke, akatunge chilumbilo kuli Yehova mu chizungwilo cha Ka-Yepushe Ornane.

¹⁹ David yaya nikulita ni liji lia Ngate lize hamba mu jina lia Yehova.

²⁰ Ornane yatala kunyima, yamona mungelo mba anenyi awana a malunga waze apwile nenyi yaswama. Ornane te kanazungula tiliku.

²¹ Shimbu David meza kuli Ornane aye yatala yamona David, yakatuka ha chizungwilo yafulamana hashi kumeso ja David.

²² David yamba kuli Ornane ngwenyi, Ngwehe chihela chino cha chizungwilo, ngukatungileho chilumbilo kuli Yehova. Munguchilanda ni ye ndando yacho yeswe hanga akachize chilungo kuli atu.

²³ Ornane yamba kuli David ngwenyi, Chizukenu hanga yenu mwene wami mwanangana nukalinge chize chinanupemena kumeso jenu. Talenu mungunwaha nawa e ngombe akapwe milambu ya kulumba ni yuma ya kuzungula nayo yikapwe kunyi, ni tiliku ha mulambu wa wunga. Yeswe ngunayihana.

²⁴ Alioze mwanangana David yamba kuli Ornane ngwenyi, Hi chocho ko, alioze munguchilanda ni ye ndando yeswe. Mumu chichi kutambula niche nguchihane kuli Yehova, chipwe kulambula mulambu wa kulumba uze chafwetele.

²⁵ Chocho David yahana kuli Ornane pezu ya kulakaji asambano ja shekele ja oru ha chihela.

²⁶ Mba David yatungako chilumbilo kuli Yehova. Yalambulako milambu ya kulumba, ni milambu ya sambukila nikutambika ha jina lia Yehova. Aye mwilu yamukumbulula ni kahia ha chilumbilo cha mulambu wa kulumba.

²⁷ Mba Yehova yatuma mungelo; aye yahilwisa katana mu chindalo.

²⁸ Henaho muze David hamona Yehova hamukumbulula ha chizungwilo cha Ka-Yepushe Ornane, mba yalambulako.

²⁹ Mumu tabernakulu ya Yehova yize Mose watungile mu puya, ni chilumbilo cha milambu ya kulumba, ha miaka yize yichili ha nangamo ku Ngibeone.

³⁰ Alioze David kahashile kuyako akahule Zambi, mumu woma evwile mumu ha katana ka mungelo wa Yehova.