1 Sango Ja Mianangana 20 - MUKANDA USANDU WA ZAMBI 1975

¹ Chapwile ha kangonde wa kwalumuka mwaka, haze mianangana ka-kuya ku jita, mba Joabe yatwala tujita nikwenyeka chifuchi cha A-Amone. Yaheta ku Raba; yayiseleka, alioze David yatwama ku Yerusaleme. Joabe yapupa Raba ni kuyikumba.

² David yachiza chipangula ku mutwe wa mwanangana wo; kuma, chapwile cha *talentu yimuwika ya oru ni mawe a ndando yilemu apwilemo nawa. Yachisa ha mutwe wa David mba iye yachiza upite ku chihunda, chahiana kulumbama.

³ Yachiza nawa atu aze apwilemo nikwasela ku selalo, ni sharua, ni njimbu. Chocho David yalinga ku yihunda yeswe ya A-Amone. Mba David ni atu eswe yahiluka ku Yerusaleme.

⁴ Kulutwe lia yino yuma kwejile jita ni A-Filistea ku Ngezere. Kwenako Sibekai Ka-Husha yashiha umwe wa ana ja chindululu jina lienyi Sipai, mba o azeyele.

⁵ Kwapwile jita nawa ni A-Filistea mba piehana mwana Njaire yashiha Lami mwanakwo wa Ngoliate Ka-Ngata yoze kali ni kunga chikundo chalio ngwe nguji lia kuseleka nalio.

⁶ Kwejile cheka nawa jita ku Ngata kuze te kwatwama umwe chindululu munene kali ni makumi aali a minwe ni minwe yiwana; yisambano ha kwoko ni kwoko, yisambano ha kulu ni kulu. Iye te mwana wa chindululu.

⁷ Muze iye yatomba A-Izalele Jonatas mwana wa Shimea yayo ya David yamushiha.

⁸ Wano eswe te ana ja chindululu wa mu Ngata mba eswe afwile ku kwoko lia David ni ku kwoko lia atu jenyi.