1 Sango Ja Mianangana 19 - MUKANDA USANDU WA ZAMBI 1975

¹ Kulutwe lia yino yuma Nahashi mwanangana wa A-Amone wafwile mba mwanenyi yamusalakana mu wanangana.

² David yamba ngwenyi, Mungulinga vumbi kuli Hanune mwana Nahashi chizechene ngwe tato wangulingile vumbi. Kashika David watumine tuvumbi twenyi akamulembejeke mumu hali tato. Tuvumbi twa David yaheta ku chifuchi cha A-Amone kuli Hanune mukumulembejeka.

³ Alioze miata ja A-Amone yamba kuli Hanune ngwo, Kanda unyonga ngwe David kanakutumu akwa kulembejeka hanga akalemese tatenu. Hi chocho ko. David hatuma tuvumbi twenyi kuli yena akendese chifuchi, akachipupe, akachimone kanawa.

⁴ Kashika Hanune yakwata tuvumbi twa David; yaatewula; yateta mazalo jo hakachi ndo ku matako; yaahuma.

⁵ Muze hambulwila David ha kutwala kuli malunga, iye yatuma kwapatwiza mumu sonyi jinji evwile. Kashika mwanangana yamba ngwenyi, Twamenu ku Yeriku ndo wevu wenu hiwasuha, mba munwiza.

⁶ Muze A-Amone hamona ngwo, Tunanuku kuli David, Hanune ni A-Amone yatuma ku Mesopotamia, ni ku Seria-Maka, ni ku Zoba kanunu ka *talentu ja prata kufweta matemba-a-jita ni akwa tuvwalu.

⁷ Kashika afwetele makumi atatu a tununu ni tununu aali a matemba-a-jita ni mwanangana Maka ni atu jenyi. O yeza, yasa mbalaka jo ku Medeba. A-Amone yalikungulula ku yihunda yo yeza kwasa jita.

⁸ Ha kuchivwa David yatuma Joabe ni tujita eswe akwa ndundo.

⁹ A-Amone yatuhuka. Yalulika mikana ya jita kwe ku chikolo cha limbo. Mianangana waze ejile apwile kwa ukawo mu yambu.

¹⁰ Ha kumona chize halulika mikana ya jita kulutwe ni kunyima, Joabe yasakula malunga eswe apema a mu Izalele; yaasa akalimike ni A-Seria.

¹¹ Waze hasala yaahana kuli mwanakwo Abishai, iye yaasa akalimike ni A-Amone.

¹² Ngwenyi, Nyi A-Seria mangukumba ni tachi, ena mukangukwasa. Alioze nyi A-Amone makukumba yena ni tachi, mba yami mungukukwasa.

¹³ Tuhamukenu; tupwenu tuli malunga mumu hali atu jetu ni ha yihunda ya Zambi yetu. Yehova akalinge chize chamupemena.

¹⁴ Chocho Joabe ni atu jenyi akundamine ase jita ni A-Seria. O yamuchina.

¹⁵ Muze A-Amone amwene ngwo, A-Seria hachina, no nawa yachina kumeso ja Abishai mwanakwo wa Joabe, yanjila mu chihunda. Mba Joabe yahiluka ku Yerusaleme.

¹⁶ Muze A-Seria hamona ngwo, Hatukumba kuli A-Izalele, yatuma tunganda kusaka A-Seria a mu sali lia Lwiji, hamuwika ni Shofake, kapitau ka tujita a Hadarezere kulutwe lio.

¹⁷ Yalweza David mba iye yakungulula A-Izalele eswe, yazauka Yordau, yeza kuli ayo, yalulika mikana ya jita kulimika no. Muze David yalulika mikana ya kulimika ni A-Seria, o yasa nenyi jita.

¹⁸ A-Seria yachina kumeso ja A-Izalele, mba David yashiha malunga a mu tununu shimbiali a matemba-a-jita hakachi ka A-Seria, ni makumi awana a tununu a akwa kwenda hashi. Yashiha mwe Shofake kapitau ka tujita.

¹⁹ Muze tuvumbi twa Hadarezere hamona ngwo, Hatukumba kuli A-Izalele o yatá kuli David, yamulingila. Chocho A-Seria kakwashile A-Amone nawa.