1 Sango Ja Mianangana 18 - MUKANDA USANDU WA ZAMBI 1975

¹ Kulutwe lia yuma yino David yalamba A-Filistea; yaapokwesa, yachiza Ngata ni yihunda yako ku moko ja A-Filistea.

² Yalamba A-Moape. A-Moape yalumuka ngamba kuli David. Yamunehena milambu.

³ David yalamba Hadarezere, mwanangana wa Zoba, ku Hamate, shimbu machiya kukolesa chiyulo chenyi ku lwiji Ufrateze.

⁴ David yatambula kuli iye kanunu ka matemba-a-jita, ni tununu shimbiali a akwa tuvwalu, ni makumi aali a tununu a maswalale a kwenda hashi. Tuvwalu eswe a matemba-a-jita David yaateta mijipa, yafunga tuvwalu kukoka kulakaji lia matemba-a-jita.

⁵ Muze A-Seria a ku Ndamaseku yeza kukwasa Hadarezere, mwanangana wa Zoba, David yashiha makumi aali a tununu ni tununu aali a A-Seria.

⁶ David yasa maswalale mu Seria ya Ndamaseku. A-Seria yalumuka ngamba kuli David. Yamunehena milambu. Kweswako David yatalikisa, Yehova yamwaha kukumba.

⁷ David yatambula kepwe ja oru ja atu a Hadarezere, yajineha ku Yerusaleme.

⁸ Ku Tibate ni ku Chune membo a Hadarezere, David yachizako unengu wunji chikolo; nawo Solomone yatunga Chitende cha unengu, ni manguji, ni yikwachilo ya unengu.

⁹ Muze Tou mwanangana wa Hamate evwile ngwo, David hashiha tujita eswe a Hadarezere, mwanangana wa Zoba,

¹⁰ yatuma mwanenyi Handorame kuli mwanangana David kumumeneka, ni kumuwahisa, mumu hasa jita ni Hadarezere hamukumba. Mumu te Hadarezere wapwile nikwasa jita ni Tou. Yaneha yikwachilo yeka ni yeka ya oru, ni ya prata, ni ya unengu.

¹¹ Yino nawa mwanangana David yatumbikila kuli Yehova hamuwika ni prata ni oru yize yatumbikila ya ku mavungu eswe, ya Endome, ni Moape, ni A-Amone, ni A-Filistea, ni A-Amaleke.

¹² Abishai, mwana Zeluia washihile kumi lia tununu ni tununu nake A-Endome mu Chikulo cha Mungwa.

¹³ Yasa maswalale mu Endome. A-Endome eswe yalumuka ngamba kuli David. Kweswako David yatalikisa, Yehova yamwaha kukumba.

¹⁴ David wapwile mwanangana wa A-Izalele eswe. David wayulile ni wapatwilile atu jenyi eswe.

¹⁵ Joabe mwana Zeluia wapwile kapitau ka tujita eswe. Yehosofate mwana Ahilude wapwile mukwa kusoneka yuma ya wanangana.

¹⁶ Zadoke mwana Ahitube, ni Apimeleke mwana Abiatare, apwile asasendote. Shavesha wapwile mukwa kusoneka.

¹⁷ Benaia mwana Jehoiada wayulile A-Cherete ni A-Pelete. Ana a David a malunga apwile akwa lutwe mu uvumbiko wa mwanangana.