1 Sango Ja Mianangana 17 - MUKANDA USANDU WA ZAMBI 1975

¹ Muze David hatwama mu zuwo lienyi, David yamba kuli profeta Natane ngwenyi, Tala yami natwama mu zuwo lia sedru alioze mushete wa usendo wa Yehova watwama mu mbalaka.

² Natane yamba kuli David ngwenyi, Yénu nulinge yeswe yili mu mbunge yenu, mumu Zambi hwali hamuwika ni yenu.

³ Alioze ufuku uze wene liji lia Zambi yiliza kuli Natane ngwo,

⁴ Yako uambulwile kavumbi kami David ngwe, Yehova kanambe ngwenyi, Kuchi kungutungila zuwo lia kutwamamo.

⁵ Chize ku tangwa lize nakandwishile A-Izalele ndo musono kanda nguchitwama mu zuwo, alioze hinatutujoka mu mbalaka ni mbalaka, ni mu tabernakulu ni tabernakulu.

⁶ Mu yifuchi yeswe napalikile ni A-Izalele eswe te nahanjikile limwe liji ni akwa kuyula aze natumine kufunga atu jami ngwami, Kuchi te kwangutungilile zuwo lia sedru?

⁷ Kashika amba kuli kavumbi kami David ngwe, Yehova-wa-Tujita kanambe ngwenyi, Nakuchijile mu yambu kuze wakawile mapanga ukapwe mwanangana wa atu jami A-Izalele.

⁸ Nendele hamwe ni yena kweswe wayile. Hinasutula akwa kole je eswe kumeso je, mba mungukwaha jina lilemu ngwe majina ja e alemu a hashi.

⁹ Atu jami A-Izalele mungwatongwela chihela, mungwatungisako akatwame mu chihela cho. Kechi kututujoka nawa; yingulungulu kechi kaenyeka ngwe alingile kunyima,

¹⁰ chize ku miaka yize nasele akwa kuyula helu lia atu jami A-Izalele. Mungukuhwimisa kuli akwa kole je eswe. Chikwo nawa Yehova kanambe kuli yena ngwenyi, Yami Yehova mungukakupwisa munyachi.

¹¹ Muze matangwa je hamanunuka hiwaya kuli tulamba twe, kulutwe mungukakolesa mukwa munyachi we yoze wamusema, mungukakolesa wanangana wenyi.

¹² Iye kumakangutungila zuwo, mba yami kumungukakolesa ngunja yenyi yikapwe ya mutolo.

¹³ Ami kumungukapwa tato; iye kumakapwa mwanami. Hindu chichi kumuchiza utu wa zango wami ngwe nauchijile kuli yoze wakutetekelele mu wanangana.

¹⁴ Mungumukolesa mu zuwo liami ni mu wanangana wami ku miaka yeswe. Ngunja yenyi kumuyikakola ya mutolo.

¹⁵ Natane yahanjika maliji wano eswe kuli David nikulita ni usolwelo uno weswe.

¹⁶ Mba mwanangana David yanjila, yatwama kumeso ja Yehova. Yamba ngwenyi, Yehova Zambi kuchi napwa yami, hanji munyachi wami kuchi wapwa wanguneha ndo kuno?

¹⁷ Chipwe chino chapwile chuma chikepe kuli yena Zambi, hiwahanjika ha kutwala ku munyachi wa yami kavumbi ke miaka yinji kulutwe. Ni yena Yehova Zambi hiwangulweza yisemuko yize muyizaho.

¹⁸ Kuchi yami David munguhasa kuweza nawa kumeso je ha kutwala ku ulemu hangwaha yami kavumbi ke? Unangunymgika yami kavumbi ke.

¹⁹ Yehova hiwalinga unene uno weswe nikusolola yino yuma yeswe yinene mumu hali kavumbi ke nikulita ni mbunge ya yena mwene.

²⁰ Yehova, kukushi umwe walita ni yena. Kukushi umwe Zambi mukwo shina yena wika, nikulita ni yuma yize yeswe hitunevu ni matwi jetu.

²¹ Mba vungu lika lia hano hashi lialita ni atu je A-Izalele? Yena Zambi wayile kwakula akapwe atu je, ukalilingile jina ni yuma yinene ya woma nikuhuma mavungu kumeso ja atu je waze waakulile ku Engitu.

²² Walikoleselele vungu lie lia Izalele akapwe atu je a miaka yeswe. Yena Yehova walipwishile Zambi yo.

²³ Kashika Yehova, liji lino hiwahanjika ha kutwala kuli kavumbi ke ni munyachi wenyi ulikolese likapwe lia mutolo ukalinge chino hiwamba.

²⁴ Jina lie likakole, likafumane ku miaka yeswe ngwo, Yehova-wa-Tujita iye Zambi ya A-Izalele, iye Zambi kuli A-Izalele. Chocho munyachi wa kavumbi ke David muukakola kumeso je.

²⁵ Mumu yena Zambi yami hiwalweza kavumbi ke ngwe, Mungukolesa munyachi we, kashika kavumbi ke hapwa nacho mu mbunge yenyi kulemba kumeso je.

²⁶ Yena Yehova uli Zambi, hiwalakenya chuma chino chipema kuli kavumbi ke.

²⁷ Kashika wahisa kama munyachi wa kavumbi ke ukalinduluke kumeso je wa mutolo. Mumu yena Yehova hiwauwahisa, Ukawahe ku miaka yeswe.