1 Sango Ja Mianangana 16 - MUKANDA USANDU WA ZAMBI 1975

¹ O yaneha mushete wa Zambi; yausa muma mwawo muchima lia mbalaka yize David hanautungila. Yalambula milambu ya kulumba ni milambu ya sambukila kumeso ja Zambi.

² Muze te David hamana kulambula milambu ya kulumba ni milambu ya sambukila, yawahisa atu mu jina lia Yehova.

³ Yapangila hakachi ka A-Izalele eswe malunga ni mapwo, kuli mweswe mbolo yimuwika, ni chihanda cha yifwo, ni chandanda cha uva jomu.

⁴ David yasela A-Levi amwe ku milimo ya mushete wa Yehova mukwiwulula, ni kusakwila ni kuhalisa Yehova, Zambi ya Izalele.

⁵ Asafwe mukwa lutwe, yahata kuli iye Zekaria, ni Jehiele, ni Shemiramote, ni Jehiele, ni Matitia, ni Eliape, ni Benaia, ni Obede-Endome, ni Jehiele waze memba yisaji ya kusa ni tulialia; Asafwe memba sembalu,

⁶ ni asasendote Benaia, ni Jaziele, memba yitavwi matangwa eswe kulutwe lia mushete wa usendo wa Zambi.

⁷ Ha tangwa lize David yaputuka kutuma Asafwe ni usoko wenyi kusakwila kuli Yehova.

⁸ Sakwililenu Yehova, tambikenu ha jina lienyi, ambululenu yilinga yenyi hakachi ka mavungu.

⁹ Mwimbilenu, mwimbilenu uhaliso. Hanjikenu ha yitanga yenyi ya kukomwesa.

¹⁰ Lisambenu mu jina lienyi lisandu. Mbunge ja akwa kufupa Yehova jika-wahilile.

¹¹ Fupenu Yehova ni tachi jenyi. Fupenu meso jenyi matangwa eswe.

¹² Iwulukenu yilinga yenyi ya kukomwesa yize hanalingi, ni yipupu yenyi, ni upatwilo wa mu kanwa lienyi;

¹³ Enu munyachi wa Izalele kavumbi kenyi, enu ana ja Yakomba a kutongola.

¹⁴ Iye Yehova Zambi yetu, upatwilo wenyi waya hashi heswe.

¹⁵ Iwulukenu usendo wenyi ku miaka ya mutolo; iwulukenu liji lize ambile ndo ku kanunu ka yisemuko.

¹⁶ Usendo uze akolesele ni Apalahama, ni liji lienyi lia kulishinga kuli Izake.

¹⁷ Waukolesele cheka nawa kuli Yakomba ukapwe shimbi, ni kuli Izalele ukapwe usendo wa mutolo,

¹⁸ ngwenyi, Kuli yenu munguhana chifuchi cha Kanana, njiza ya chihinga chenu.

¹⁹ Shimbu te achili atu akehe ha kwaalula; ewa achili te akehe chikolo, njize mu chifuchi.

²⁰ Atutulukile ku vungu ni vungu. Makatuka kuli akwa wanangana umwe, maya kuli atu eka.

²¹ Alioze iye katayijile niumwe kwalinga chipi. Chipwe mianangana waámbilile mumu hali ayo,

²² ngwenyi, Kanda nusunga waze naawayishile ni maji. Aprofeta jami kanda nwalinga nichimwe chipi.

²³ Embilenu Yehova, enu akwa hashi eswe. Ambujolenu ulamwino wenyi tangwa ha tangwa.

²⁴ Lumbununenu ulemu wenyi hakachi ka mavungu. Lumbununenu yitanga yenyi ya kukomwesa hakachi ka minyachi yeswe.

²⁵ Mumu Yehova munene, chatamba kumuhalisa chikolo. Chatamba kumuvwila woma kuhiana mazambi akwo eswe.

²⁶ Mumu mazambi a mavungu apwa yuma yamokomoko alioze Yehova iye tangi ya malilu.

²⁷ Uhenya ni ulamba watwama kumeso jenyi; tachi ni uwahililo watwama muma mwenyi.

²⁸ Hanenu kuli Yehova enu minyachi ya atu, hanenu kuli Yehova ulemu ni tachi.

²⁹ Hanenu kuli Yehova ulemu wa jina lienyi. Nehenu mulambu nukanjile kumeso jenyi. Wayilenu Yehova mu upeme wa usandu.

³⁰ Chikimenu kumeso jenyi akwa hashi eswe. Hashi kuhanakolo kuhechi kuhasa kunyika.

³¹ Malilu akawahilile, hashi hakevwe chiseke. Akambe hakachi ka mavungu ngwo, Yehova kanayulu!

³² Kalunga-lwiji akakulunguze ni kulumbama chenyi. Minda yikalikwize ni yuma yeswe yatwamamo;

³³ mba mitondo yeswe ya mu musenge muyikemba ni chiseke kumeso ja Yehova, mumu kaneza mukupatwila akwa hashi.

³⁴ Sakwilenu kuli Yehova mumu iye mupema, mumu utu wa zango lienyi wa mutolo.

³⁵ Ambenu ngwenu, Zambi ya ulamwino wetu, utulamwine kama utuchize hakachi ka mavungu nikutukonga, hanga tukasakwile ku jina lie lisandu, tukakumbe mu uhaliso we

³⁶ Yehova Zambi ya Izalele akafumane, chize ku miaka ya mutolo ndo ku miaka ya mutolo! Atu eswe ambile ngwo, Amene, ahalishile Yehova.

³⁷ Chocho yasela Asafwe ni usoko wenyi kumeso ja mushete wa usendo wa Yehova akavumbike kumeso ja mushete matangwa eswe nikulita ni milimo ya tangwa ha tangwa.

³⁸ Ngwami Obede-Endome ni usoko wo makumi asambano ni nake. Ni Obede-Endome nawa mwana wa Yedutune, ni Hosa akafunge mapito.

³⁹ Ni sasendote Zadoke ni usoko wenyi asasendote kulutwe lia tabernakulu ya Yehova mu nangamo lize lili mu Ngibeone,

⁴⁰ akalambule milambu ya kulumba kuli Yehova ha chilumbilo cha milambu ya kulumba matangwa eswe chimene ni chingoloshi nikulita ni chize cheswe chasonewa mu shimbi ja Yehova jize atumine A-Izalele.

⁴¹ Hamwe no kwapwile Hemane ni Yedutune ni akwo nawa atongwele ku majina akasakwilile Yehova mumu utu wa zango lienyi wa mutolo.

⁴² Hamwe no Hemane ni Yedutune apwile ni yitavwi ni sembalu ha kwimba, ni yisaji ha miaso ya Zambi, ni ana ja Yedutune akamane ku chikolo.

⁴³ Atu eswe yaya mutu mweswe ku zuwo lienyi, ni David yaya akawahise akwa zuwo lienyi.