1 Sango Ja Mianangana 15 - MUKANDA USANDU WA ZAMBI 1975

¹ David yalitungila mazuwo mu limbo lia David, yalulika chihela cha mushete wa Zambi, yautungila mbalaka.

² David yamba ngwenyi, A-Levi wika mahasa kumbata mushete wa Zambi mumu Yehova waatongwele kumbata mushete ni kumulingila ku miaka ya mutolo.

³ David yakungulula A-Izalele eswe ku Yerusaleme akanehe mushete wa Yehova ku chihela chawo chize hanaululikila.

⁴ David yakungulula ana ja Arone ni ja A-Levi.

⁵ Kuli ana ja Kohate, Uriele mukwa lutwe hamwe ni kulakaji ni makumi aali a usoko wenyi.

⁶ Kuli ana ja Merari, Asaia mukwa lutwe hamwe ni kulakaji aali ni makumi aali a usoko wenyi.

⁷ Kuli ana ja Ngeshome, Joele mukwa lutwe hamwe ni kulakaji ni makumi atatu a usoko wenyi.

⁸ Kuli ana ja Elizafane, Shemaia mukwa lutwe hamwe ni kulakaji aali ja usoko wenyi.

⁹ Kuli ana ja Heprone, Eliele mukwa lutwe hamwe ni makumi nake a usoko wenyi.

¹⁰ Kuli ana ja Uziele, Aminandambe mukwa lutwe hamwe ni kulakaji, kumi ni aali a usoko wenyi.

¹¹ David yatambika asasendote Zadoke ni Abiatare; ni A-Levi Uriele, ni Asaia, ni Joele, ni Shemaia, ni Eliele, ni Aminandambe,

¹² yamba kuli ayo ngwenyi, Yenu nuli akwa lutwe a ku minyachi ya atato ya A-Levi. Liselenu ku usandu, yenu ni usoko wenu hanga nunehe mushete wa Yehova, Zambi ya Izalele, ku chihela chawo naululikilile.

¹³ Kunwaumbachile chisuho chitangu kashika Yehova Zambi yetu walusukilile hali yetu mumu kutwalingile nikulita ni shimbi yawo.

¹⁴ Chocho asasendote ni A-Levi aliselele ku usandu akanehe mushete wa Yehova, Zambi ya Izalele.

¹⁵ A-Levi ambachile mushete wa Zambi ni mikambo ha yipaya yo chizechene ngwe Mose watumine nikulita ni liji lia Yehova.

¹⁶ David yamba akwa lutwe a A-Levi ngwenyi, Tongolenu usoko wenu akapwe njimba a kwimba yisaji, ni yisaji ya kusa, ni tulialia, ni sembalu, ni kulikwiza ni liji lia uwahililo.

¹⁷ Kashika A-Levi atongwele Hemane mwana Joele; a kuli usoko wenyi Asafwe mwana Mberekia; a kuli ana ja Merari a malunga usoko wo, Etane mwana Kushaia;

¹⁸ hamwe no usoko wo wa ngango yamuchiali Zekaria, ni Mbene, ni Jaziele, ni Shemiramote, ni Jehiele, ni Uni, ni Eliape, ni Benaia, ni Maseia, ni Matitia, ni Elifele, ni Mikeneia, ni akwa mapito Obede-Endome ni Jehiele.

¹⁹ Njimba Hemane, ni Asafwe, ni Etane embile sembalu ja unengu.

²⁰ Zekaria, ni Aziele, ni Shemiramote, ni Jehiele, ni Uni, ni Eliape, ni Maseia, ni Benaia embile yisaji ya kusa nikulita ni Alamote.

²¹ Matitia, ni Elifele, ni Mikeneia, ni Obede-Endome, ni Jehiele, ni Azazia asongwele ni tulialia nikulita ni Sheminite.

²² Chenania njimba mukwa lutwe wa A-Levi walongesele mumu walongolokele.

²³ Mberekia ni Elekana apwile akwa kufunga pito ku mushete.

²⁴ Shebania, ni Yehosofate, ni Netanele, ni Amasai, ni Zekaria, ni Benaia, ni Elieza asasendote embile yitavwi kulutwe lia mushete wa Zambi. Obede-Endome ni Jehia apwile akwa kufunga pito ku mushete.

²⁵ Kashika David ni makulwana a Izalele ni tupitau twa tununu ayile ni uwahililo kuchiza mushete wa usendo wa Yehova ku zuwo lia Obede-Endome.

²⁶ Zambi wakwashile A-Levi waze ambachile mushete wa usendo wa Yehova kashika alambwile yitapo ya kuji a ngombe shimbiali ni kuji a mapanga shimbiali.

²⁷ David wazalile hina lia ngungu lia linyu lipema ni A-Levi eswe nawa waze ambachile mushete, ni njimba, ni Chenania njimba mukwa lutwe hamwe ni njimba. David wazalile efode ya linyu.

²⁸ Chocho A-Izalele eswe anehene mushete wa usendo wa Yehova ni kulikwiza chinji, ni liji lia njalamina, ni yitavwi, ni sembalu, nikwimba ni tachi ni yisaji ya kusa ni tulialia.

²⁹ Ha kuheta mushete wa usendo wa Yehova kwimbo lia David, Mikale mwana Saulu yatalila ku njanela, yamona mwanangana David nikuhangana ni kulikwiza; kashika yamulelesa mu mbunge yenyi.