1 Sango Ja Mianangana 14 - MUKANDA USANDU WA ZAMBI 1975

¹ Hirame mwanangana wa Teru yatuma tunganda kuli David, ni mitondo ya sedru, ni apedreru, ni akarpinteru amutungilile zuwo.

² David yasa chinyingi ngwenyi, Yehova hanangukolesa mwanangana wa Izalele. Wanangana wami hanaunangamisa chikolo mumu ha mukunda wa atu jenyi A-Izalele.

³ David yatambula mapwo akwo ku Yerusaleme. David wasemene ana a malunga ni a mapwo nawa.

⁴ Majina ja waze asemene mu Yerusaleme wano: Shamua, ni Shobabe, ni Natane, ni Solomone,

⁵ ni Ibare, ni Elishua, ni Elepalete,

⁶ ni Noga, ni Nefwe, ni Yafia,

⁷ ni Elisama, ni Beliada, ni Elifelete.

⁸ Muze A-Filistea hevwa ngwo, Hanawayisa David mwanangana wa A-Izalele eswe, A-Filistea eswe akandukile ni kufupa David. Alioze David yachivwa, yatuhuka kulimika no.

⁹ A-Filistea o te haneza hanalitande mu chikulo cha Refane.

¹⁰ David yahula Zambi ngwenyi, Ngukanduke ngukase jita ni A-Filistea, nyi? Muakunjika kuli yami, nyi? Yehova yamba kuli iye ngwenyi, Kanduka, mumu mungwakunjika kuli yena.

¹¹ O yeza ku Mbale-Perazime. David yaakumbako. David yamba ngwenyi, Zambi ni kwoko liami hanapukula akwa kole jami ngwe sanga lia kupukula. Kashika jina liako ngwo, Mbale-Perazime.

¹² Yahichikako mazambi jo, mba David yatuma aoche.

¹³ A-Filistea yeza cheka nawa yalitanda mu chikulo cha Refane.

¹⁴ David yahula Zambi cheka nawa, Zambi yamba ngwenyi, Kanda ukanduka kuli ayo. Tewuluka kuli ayo ukaawane hatalanganyi ni mitondo ya amora.

¹⁵ Muze muwivwa lushindo wa kwenda mu masongo a mitondo ya amora, hikatukenu kwasa jita mumu Zambi hana-kutetekela akalambe tujita twa A-Filistea.

¹⁶ David yalinga nikulita ni shimbi ya Zambi. Yalamba tujita twa A-Filistea chize ku Ngibeone ndo ku Ngezere.

¹⁷ Lufuma wa David wahetele ku yifuchi yeswe. Yehova wakolesele woma wenyi mavungu eswe.