1 Sango Ja Mianangana 13 - MUKANDA USANDU WA ZAMBI 1975

¹ David yafupa mana kuli tupitau twa tununu, ni twa kulakaji, ni kuli akwa lutwe eswe.

² David yamba ku chikungulwila cheswe cha Izalele ngwenyi, Kachi chinanupemena ni chapwa upale Wa Yehova Zambi yetu, tutumenu kuli usoko wetu weswe asala mu chifuchi cha Izalele, ni kuli asasendote ni A-Levi mu yihunda yo ni chifuchi chayo eze akunguluke ni yetu.

³ Mba tunehenu kuli yetu nawa mushete wa Zambi yetu, se ha matangwa a Saulu kutwahulileko.

⁴ Chikungulwila cheswe hatá mumu chuma chalita ku meso ja atu eswe.

⁵ Kashika David yakungulula A-Izalele eswe ku Shihore ya Engitu ndusu ndo ku kunjila ku Hamate, akachize mushete wa Zambi ku Kiriate-Yerimi.

⁶ David yakanduka ni A-Izalele eswe ku Mbaala (likwo Kiriate-Yerimi) ya A-Yunda, akasake mushete wa Zambi uze uli ni jina lia Yehova wa kutwama hali akerupimi.

⁷ Yambata mushete wa Zambi ha temba liaha nikuuchiza ku zuwo lia Abinadambe. Uza ni Ahio endesele temba.

⁸ David ni A-Izalele eswe awahililile kumeso ja Zambi ni tachi jo jeswe ni miaso, ni tulialia, ni yisaji ya kusa, ni tumikupiela, ni sembalu, ni yitavwi.

⁹ Ha kuheta ku chizungwilo cha Chidone, Uza wazozele kwoko lienyi ku mushete nikuukwata, mumu ngombe yatalinga.

¹⁰ Mba utenu wa Yehova yiukasumukina hali Uza. Yamulamba mumu ha kusa kwoko lienyi ha mushete. Yafwilako kwe kumeso ja Zambi.

¹¹ David aye yatenuka mumu Yehova halusukila hali Uza, mba jina lia kuma kuze ngwo, Pereze-Uza ndo musono.

¹² David yavwila woma Zambi tangwa lize, yamba ngwenyi, Kuchi munguneha mushete wa Zambi kuli yami?

¹³ Chocho David kanehene mushete kwimbo lia David. Alioze yautwala ku lumbu ku zuwo lia Obede-Endome Ka-Ngata.

¹⁴ Mushete wa Zambi watwamine mu munyachi wa Obede-Endome mwe mu zuwo lienyi tukweji atatu. Yehova wawahishile Obede-Endome ni akwa zuwo lienyi eswe.