1 Sango Ja Mianangana 12 - MUKANDA USANDU WA ZAMBI 1975

¹ Wano ejile kuli David mu Zikalage shimbu te machiswama mumu hali Saulu mwana Kishi. Wano e akwa ndundo yikwashi jenyi mu jita.

² O te A-Mbenjamine usoko wa Saulu, ngashi, ahashile kukonga mawe ni kwasa mivu chipwe ni kwoko lia chindume chipwe ni kwoko lia chimeso.

³ Mukwa lutwe Aizere, ni Njoashe, ana ja Shema Ka-Ngibia; ni Jeziele, ni Pelete, ana ja Azmave; ni Mberaka, ni Jehu Ka-Anatote;

⁴ ni Isemaia Ka-Ngibeone mukwa tachi hakachi ka makumi atatu ni helu lia makumi atatu; ni Jeremia, ni Jahaziele, ni Johanane, ni Jozabade Ka-Gedera;

⁵ ni Eluzai, ni Jerimote, ni Mbealia, ni Shemaria, ni Shefatia Ka-Harufa;

⁶ ni Elekana, ni Ishia, ni Azarele, ni Joezere, ni Joshobeame A-Kora;

⁷ ni Joela, ni Zebadia ana ja malunga a Jerohame wa ku Gedore.

⁸ Amwe A-Ngate alihandunwine eze kuli David mu chivwenge mu puya, akwa ndundo ni hamu, akwa kujama ha jita kanahase kulinga ni kepwe ni makunga, meso jo ngwe meso ja ndumba ni tambu jo ngwe a kai ha milundu.

⁹ Mukwa lutwe Ezere, ni wamuchiali Obadia, ni wamuchitatu Eliape,

¹⁰ ni wamuchiwana Mishemana, ni wamuchitano Jeremia,

¹¹ ni wamuchisambano Atai, ni wamuchishimbiali Eliele,

¹² ni wamuchinake Johanane, ni wamuchilivwa Elezabade,

¹³ ni wamuchikumi Jeremia, ni wamuchikumi ni kashi Makebanai.

¹⁴ Wano hakachi ka A-Ngate apwile tupitau twa tujita. Akepe apwile helu lia kulakaji kulakaji ni anene apwile helu lia kanunu kanunu.

¹⁵ Wano yazauka Yordau mu kakweji mutangu muze te meya hahiana kweswe kusupwoka. Yahuma akwa yikulo yeswe, kwa kutalikisa ku Chivumbuko ni ku Chitokelo.

¹⁶ Kwejile nawa ku chivwenge kuli David amwe A-Mbenjamine ni A-Yunda.

¹⁷ David yatuhuka kwapatwiza. Yamba kuli ayo ngwenyi, Nyi nuneza ni sambukila kungukwasa, mbunge yami muyilinunga ni yenu. Alioze nyi nuneza kungukunjika kuli akwa kole jami, Zambi ya tulamba achitale achikanjise, se chishi ni chuma cha uhenge mu moko jami.

¹⁸ Henaho Spiritu yahulumukina hali Amasai mukwa lutwe hakachi ka e makumi atatu, mba yamba ngwenyi, Tuli a yena, David; Tuli hamwe ni yena, mwana Yese! Sambukila yikalumbame kuli yena, Ni sambukila kuli yikwashi je! Mumu Zambi ye kanakukwase. Mba David yaatambula; yaapwisa tupitau twa maswalale jenyi.

¹⁹ Amwe A-Manase yeza kuli David muze wejile ni akwa kuyula ja A-Filistea akase jita ni Saulu, alioze kaakwashile, mumu muze A-Filistea hachitwama punga yamukatwisa ngwo, Maya sali lia mwene wenyi Saulu nikukoka Utoji ha mitwe yetu.

²⁰ Ha kuya ku Zikalage amwe A-Manase alifutwile ni David: Adena, ni Jozabade, ni Jediaele, ni Mikele, ni Jozabade, ni Elihu, ni Ziletai tupitau a tununu apwile a Manase.

²¹ Wano akwashile David kulimika ni mbunga ya yingumba mumu eswe apwile akwa ndundo ni hamu;, eswe tupitau twa tujita.

²² Mumu tangwa ha tangwa kwejile atu kuli David kumukwasa ndo kwapwile chihuji chinene ngwe chihuji cha Zambi.

²³ Kwalula cha akwa lutwe ja waze apwile ni yitwa ya jita ejile kuli David mu Heprone akalumune wanangana wa Saulu kuli iye nikulita ni liji lia Yehova.

²⁴ A-Yunda akwa kepwe ni makunga tununu asambano ni kulakaji nake eswe ni yitwa yo ya jita.

²⁵ A-Simeone akwa ndundo a jita tununu shimbiali ni kulakaji umuwika.

²⁶ A-Levi tununu awana ni kulakaji asambano.

²⁷ Jehoiada aye mukwa lutwe wa munyachi wa Arone mba hamwe nenyi kwapwile tununu atatu ni kulakaji shimbiali;

²⁸ ni Zadoke mukweze wa ndundo ni hamu ni akwa munyachi wa tato makumi aali a tupitau ni tupitau aali.

²⁹ A-Mbenjamine usoko wa Saulu tununu atatu mumu kushi te anji hanyongonona mu kuzeya cho ku munyachi wa Saulu.

³⁰ A-Eframe Makumi aali a tununu ni kulakaji nake akwa ndundo ni hamu a kufumana mu minyachi ya atato.

³¹ Ku chihanda cha ha muchima cha munyachi wa Manase kumi lia tununu ni tununu nake a kutongola ku majina eze apwise David mwanangana.

³² Kuli ana ja Isaka, malunga alongolokele mu yinyingi ya miaka akanyingike chize chatamba A-Izalele kulinga, akwa lutwe apwile kulakaji aali, ni usoko wo weswe wazeyele kuli ayo.

³³ Kuli A-Zapulone waze anyingikine kutuhuka ni tujita ni kululika ngango ja maswalale ni yitwa yeswe ya jita makumi atano a tununu, te akwa kukwasa, keshi ni mbunge jiali.

³⁴ Kuli A-Napatali kanunu ka tupitau hamuwika ni makumi atatu a tununu ni tununu shimbiali akwa kepwe ni makunga.

³⁵ Kuli A-Ndane waze anyingikine kululika jita, makumi aali a tununu ni tununu nake ni kulakaji asambano.

³⁶ Kuli A-Ashe akwa kuya ni tujita ni akwa kululika jita, makumi awana a tununu.

³⁷ Sali likwo lia Yordau kuli A-Rupene, ni A-Ngate, ni chihanda cha ha muchima cha munyachi wa A-Manase, kulakaji ni makumi aali a tununu ni yitwa yeswe yakwasa nayo jita.

³⁸ Wano eswe, tujita kananyingika kululika ngango ja jita yeza ni mbunge jingunu ku Heprone akapwise David mwanangana wa A-Izalele eswe, ni A-Izalele akwo eswe apwile ni mbunge yimuwika akapwise David mwanangana.

³⁹ Atwamineko ni David matangwa atatu nikulia nikunwa mumu usoko wo te hanaalulikila.

⁴⁰ Chikwo nawa waze atwamine hakamwihi chipwe ndo ku Isaka, ni Zapulone, ni Napatali yaneha mbolo hali yimbulu, ni hali tumelu, ni hali mula, ni hali ngombe; kulia cha wunga, ni yandanda ya makuyu, ni yichakata ya uva, ni vinyu, ni maji, ni ngombe, ni mapanga a kulumbama mumu kwapwile uwahililo mu Izalele.