1 Sango Ja Mianangana 11 - MUKANDA USANDU WA ZAMBI 1975

¹ A-Izalele eswe yalikungulukila kuli David ku Heprone ngwo, Etu tuli chifwaha chenu ni musunya wenu.

² Kunyima muze Saulu wapwile mwanangana wetu hindu yenu nwasongwelele A-Izalele ha kutuhuka ni ha kunjila, mba Yehova Zambi ye wanwambile ngwenyi, Yena muopwa kafunga ka atu jami A-Izalele. Yena muopwa mwanangana wa atu jami A-Izalele.

³ Chocho makulwana eswe a Izalele yeza kuli mwanangana mu Heprone, mba David yakolesa no usendo kumeso ja Yehova mu Heprone. No awayishile David mwanangana wa Izalele nikulita ni liji lia Yehova kuli Samuel.

⁴ David ni A-Izalele eswe yaya ku Yerusaleme, likwo Yepushe, kuze kwatwamine A-Yepushe, enya chifuchi.

⁵ Enya Yepushe hamba kuli David ngwo, Akuno kuchi kanjila. Hindu David yatambula chihunda cha kukolesa cha Zaione, che chihunda cha David.

⁶ David yamba ngwenyi, Mweswe mahanga kulamba A-Yepushe mapwa mukwa lutwe ni kapitau. Kashika hapwisa Joabe mwana Zeluia mukwa lutwe se hahanga kukanduka.

⁷ David Watwamine mu chihunda chize cha kukolesa; kashika yachiluka ngwo, Limbo ha David.

⁸ Yatungisa limbo kweswe kwa kujingilika chize ku Milo kweswe kwa kujingilika. Joabe yatunga chize chasalile cha chihunda.

⁹ David waliwezelele ulemu mumu Yehova-ya-Tujita wapwile hamwe nenyi.

¹⁰ Wano e akwa lutwe ja malunga akwa ndundo a David, alwezele hamu hamwe nenyi mu wanangana wenyi hamuwika ni A-Izalele eswe kumupwisa mwanangana nikulita ni liji ha Yehova ha kutwala kuli A-Izalele.

¹¹ Malunga akwa ndundo a David ha kwaalula wano: Joshobeame Ka-Takemone mukwa lutwe hakachi ka tupitau; iye wanjile kunga henyi, waliashile ni kulakaji atatu ola yimuwika nikwashiha.

¹² Kuhata hali iye kwapwile Eleazare mwana Ndodo, mwe Ka-Hoha. Iye wapwile wa atatu akwa ndundo.

¹³ Wapwile hamwe ni David ku Pasendami ku munda wa sevada, kuze A-Filistea akungulukile mukwasa jita, mba atu yachina kumeso jo.

¹⁴ Ahoze o amanyine hakachi ka munda nikuuashila jita. Yashiha A-Filistea, ni Yehova waalamwinyine ni kukumba chinene.

¹⁵ Hakachi ka makumi atatu akwa lutwe, atatu akatukile yapalumuka kuli David ku liwe ku chivwenge cha Ndulame. Tujita twa A-Filistea hasa chilombo cho mu chikulo cha Refane.

¹⁶ David, wapwile mu chivwenge, ni maswalale ja A-Filistea achili te mu Mbeteleme ha matangwa aze.

¹⁷ David yevwa usona, yamba ngwenyi, Nyi kachi umwe mangunehena amwe meya a kunwa a ku shima ha mu Mbeteleme lize lili ku chikolo!

¹⁸ E malunga atatu yapula ndusu mu mbunga ya A-Filistea; yataha meya a mu shima ha Mbeteleme lili ku chikolo; yaambata; yaaneha kuli David. Alioze iye kasolo kwanwa. Yaazujila kumeso ja Yehova.

¹⁹ Yamba ngwenyi, Zambi angukanjise kulinga chuma chino. Te mungunwa manyinga a wano malunga asele mwono wo mu Utoji? Mumu asele mwono wo mu Utoji kwaneha. Kashika kaanwine. Yuma yino alingile e malunga atatu a ndundo.

²⁰ Abishai mwanakwo wa Joabe iye wapwile mukwa lutwe hakachi ka atatu. Iye wazundwile kunga henyi kulimika ni kulakaji atatu. Yaashiha. Kashika wapwile ni lufuma hakachi ka atatu.

²¹ Hakachi ka atatu iye wapwile mulemu wahiana aali, kashika amupwishile kapitau. Hindu kahetele kuli atatu atangu.

²² Benaia mwana Jehoiada mwana wa umwe mukwa hamu wa ku Kabzele te hanalingi yuma yinji ya ndundo. Washihile ana aali a malunga a Ariele Ka-Moape. Ha mwaka wa neve yanjila mu wina nikushiha ndumba.

²³ Yashiha nawa umwe Ka-Engitu; mutu musuku chikolo ni Chizundamo cha mbandu jitano. Ka-Engitu te kali ni kunga mu kwoko henyi ngwe nguji ha kuseleka nalio. Benaia wakundamine kuli iye ni mulumbu; yachanga kunga ku kwoko lia Ka-Engitu yamushiha ni kunga henyi mwene.

²⁴ Benaia mwana Jehoiada walingile yuma yino mba wapwile ni lufuma hakachi ka akwa ndundo atatu.

²⁵ Wahianyine ni ulemu e makumi atatu, hindu kahetele kuli atatu atangu. David wamusele helu lia akwa kumufunga.

²⁶ Malunga akwa ndundo a tujita wano: Asahele mwanakwo wa Joabe, ni Elehana mwana Ndodo wa ku Mbeteleme;

²⁷ ni Shamote Ka-Harode; ni Heleze Ka-Pelone;

²⁸ ni Ira mwana Ikeshe wa ku Tekoa; ni Abieza Ka-Anatote;

²⁹ ni Sibekai Ka-Husha; ni Ilai Ka-Hoha;

³⁰ ni Maharai Ka-Netofate; ni Helebe mwana Bana Ka-Netofate;

³¹ ni Itaia mwana Ribai wa ku Ngibia ya A-Mbenjamine; ni Benaia Ka-Piratone;

³² ni Hurai wa ku yitwetwe ya Ngasha; ni Abiele Ka-Arpa;

³³ ni Azmave Ka-Baruma; ni Eliapa Ka-Salbone;

³⁴ ni ana a Hasheme Ka-Ngizone; ni Jonatas mwana Shage Ka-Harara;

³⁵ ni Ahiame mwana Sakare Ka-Harara; ni Elifale mwana Ure;

³⁶ ni Hefere Ka-Mekera; ni Ahija Ka-Pelone;

³⁷ ni Hezero Ka-Karmela; ni Narai mwana Ezebai;

³⁸ ni Joele mwanakwo wa Natane; ni Mibehare mwana Hageri;

³⁹ ni Zeleke Ka-Amone; ni Nahari Ka-Mberote, mukwa kumbachila yitwa Joabe mwana Zeluia;

⁴⁰ ni Ira Ka-Itri; ni Ngarebe Ka-Itri;

⁴¹ ni Uriya Ka-Hete; ni Zabade mwana Ahalai;

⁴² ni Adina mwana Siza Ka-Rupene, mukwa lutwe wa A-Rupene ni makumi atatu hamuwika nenyi;

⁴³ ni Hanane mwana Maka; ni Yehosofate Ka-Mite;

⁴⁴ ni Uzia Ka-Aseterote; ni Shama ni Jehiele ana ja Hotame Ka-Aroere;

⁴⁵ ni Jediaele mwana Shimiri ni mwanakwo Joha Ka-Tize;

⁴⁶ ni Eliele Ka-Mahave; ni Jeribai; ni Joshavia ana ja Elename; ni Itema Ka-Moape;

⁴⁷ ni Eliele; ni Opete; ni Jasiele Ka-Mesoba.