1 Sango Ja Mianangana 10 - MUKANDA USANDU WA ZAMBI 1975

¹ A-Filistea ashile jita ni A-Izalele ni malunga a Izalele achinyine kumeso ja A-Filistea, yafwa ha mulundu wa Ngilboa.

² A-Filistea yahanga Saulu ni ana jenyi; yashiha Jonatas, ni Abinadambe, ni Malakishua, ana ja Saulu.

³ Jita yashata chikolo hali Saulu. Ngashi yamuwana; yamwasa nikumulemeka chikolo.

⁴ Henaho Saulu yamba kuli mukwa kumumbachila yitwa ngwenyi, Tomona katana ke ungutuwe nenyi kuchina wano yilima meza manguwana mba manguyunga. Alioze mukwa kumumbachila yitwa katayile mumu woma wunji evwile. Kashika Saulu yanda katana kenyi mwene; yalikonaho.

⁵ Muze mukwa kumumbachila yitwa hamona Saulu hafwa neye nawa yalikona ha katana kenyi, yafwa.

⁶ Chocho Saulu yafwa ni anenyi atatu a malunga ni akwa zuwo lienyi eswe hamuwika.

⁷ Malunga eswe A-Izalele atwamine mu chikulo muze hamona hachina, ni Saulu ni anenyi hanafu, o yahichika yihunda yo, yachina. Mba A-Filistea yeza, yatwamamo.

⁸ Mukwacha, A-Filistea yeza kuzula afu, yawana Saulu ni anenyi hanafu ha mulundu wa Ngilboa.

⁹ Yamuzula, yanda mutwe wenyi ni mazalo jenyi a utale, yatuma tunganda ndusu chifuchi cha A-Filistea akatwale lusango ku mahamba jo ni kuli e atu.

¹⁰ Yasa mazalo jenyi mu tembele ya mazambi jo. Yahachila mutwe wenyi mu tembele ya Ndagone.

¹¹ Alioze muze A-Njabeshe-Ngiliate hevwa chize cheswe A-Filistea alinga kuli Saulu,

¹² malunga eswe akwa tachi yakatuka; yachiza mujimba wa Saulu ni mijimba ya anenyi a malunga, yayineha ku Njabeshe; yafunda yifwaha yo mushi lia carvalho mu Njabeshe; yalitwamina kulia matangwa shimbiali.

¹³ Chocho yafwa Saulu ha mukunda wa Utanguko wenyi wavulumwine ni kulimika ni Yehova, mumu kafungile liji lia Yehova. Chikwo nawa wahulile chiyulo kuli mukwa mahamba;

¹⁴ kahulile kuli Yehova. Kashika yamushiha, yakunjika wanangana kuli David mwana Yese.