1 Samuel 9 - MUKANDA USANDU WA ZAMBI 1975

¹ Kwapwile umwe lunga wa Mbenjamine, jina lienyi Kishi, mwana wa Abiele, mwana wa Zerore, mwana wa Mbekorate, mwana wa Afia, mwana wa Ka-Mbenjamine, mukwa ndundo.

² Iye te kali ni mwanenyi wa lunga jina lienyi Saulu, mukweze mupema. Hakachi ka A-Izalele niumwe wamuhianyine ha kupema. Chize ku yipaya yenyi wasuhile helu lia atu eswe.

³ Yimbulu ja Kishi tato ya Saulu yajimbala. Kashika Kishi yamba kuli mwanenyi Saulu ngwenyi, Twala umwe ngamba, yako ufupe yimbulu.

⁴ Iye yapalika ndusu mu chifuchi cha Eframe ku milundu, ni ndusu mu chifuchi cha Shalisha alioze kaawanyine. Yapalika ndusu mu chifuchi cha Shalimi, hindu akuhi. Yapalika ndusu mu chifuchi cha Mbenjamine hindu kaawanyine.

⁵ Muze haheta ku chifuchi cha Zufu Saulu yamba kuli ngamba yoze anende nenyi, ngwenyi, Tuye ku mahietu kuchina tata malitwamina kunyongena yimbulu mba maputuka kutufupa yetu.

⁶ Yakumbulula ngwenyi, Mwali mu chihunda chino umwe mutu wa Zambi, kakumulemesa chikolo. Cheswacho mamba, kuchakupwa. Tuye kuli iye, hanji mahasa kutujimbwila jila yetu kuze tunayi.

⁷ Saulu yamba kuli ngamba ngwenyi, Nyi mutuya, yika mutumwaha? Mumu mbolo mu yikwachilo yetu hiyahwa, mba mulambu wa kuhana kuli mwe mutu wa Zambi wakuhi. Chika tuli nacho?

⁸ Ngamba yakumbulula Saulu ngwenyi, Tala, nguli ni chihanda chamuchiwana cha shekele ya prata mu kwoko. Munguchihana kuli mwe mutu wa Zambi atulweze jila yetu.

⁹ (Ku shakulu mu Izalele muze umwe wayile kuhula chimwe chuma kuli Zambi wambile ngwenyi, Tuye tuhule mwe mukwa kumona. Mumu yoze akumutongola musono ngwo, Profeta, kunyima amutongwele ngwo, Mukwa kumona.)

¹⁰ Saulu yamba kuli ngamba yenyi ngwenyi, Chipema wamba, tuye. Chocho ayile ku limbo kuze kwatwama mwe mutu wa Zambi.

¹¹ Shimbu machikanduka mulundu ku chihunda atakanyine ni ana-mapwo anayi kutaha meya. Yamba kuli ayo ngwo, Mukwa kumona kwali?

¹² Yaakumbulula ngwo, Kwali, kulutwe. Tambukenu, mumu heza musono ku chihunda, mumu atu chitapo ali nacho musono ha nangamo.

¹³ Ha kuheta mu chihunda munumuwana lume shimbu kanda achikanduka ku nangamo mukulia, mumu atu kechi kulia ndo meza, se iye kakuwahisa chitapo mba waze hanaalakenya malia. Kashika yénu, mumu ola yino yene munumuwana.

¹⁴ Yakanduka ku chihunda, mba ha kunjilamo kumanyi Samuel kanatuhuka, yatakana no ha kukanduka ku nangamo.

¹⁵ Yehova hanachisolola kuli Samuel ha tangwa lia zau ngwenyi,

¹⁶ Hamene, ha ola yino, mungukutuma umwe lunga wa ku chifuchi cha Mbenjamine, ukamuwayise akapwe kasongo ka atu jami A-Izalele. Iye makalamwina atu jami ku moko ja A-Filistea, mumu hinatala atu jami se muteto wo hiwanguheta.

¹⁷ Muze Samuel hamona Saulu, Yehova yamba kuli iye ngwenyi, Mwe mutu ngunakamba au. Mwenawo mayula atu jami.

¹⁸ Mba Saulu yakundama kuli Samuel mu chikolo, ngwenyi, Ngulweze kama kuze kwatwama zuwo lia mukwa kumona.

¹⁹ Samuel yakumbulula ngwenyi, Mukwa kumona yami. Tetekela ku nangamo. Muolia ni yami musono, mba hamene chimene mungukusola, mungukulweza yize yeswe yili mu mbunge ye.

²⁰ Ha kutwala kuli yimbulu ajimbalile matangwa atatu kunyima, kanda uanyonga mumu haawana. Mba ulemu weswe upema wa mu Izalele, waya? Ngwami, Wa yena ni wa eswe akwa jimo lia tatenu.

²¹ Saulu yakumbulula ngwenyi, Ami nguli Ka-Mbenjamine, wa umwe hakachi ka minyachi yikepe ya Izalele, ni jimo lia tata lie likepe hakachi ka majimo eswe a munyachi wa Mbenjamine. Kashika kuchi te unahanjika chocho ni yami?

²² Mba Samuel yatambula Saulu ni ngamba yenyi, yaatwala ku zuwo lia ngeji. Yaaha chitwamo cha lutwe hakachi ka atu eswe hanalakenya, ngwe makumi atatu a atu.

²³ Samuel yamba kuli kuzinyeiru ngwenyi, Neha chilio chize ngunakakwaha nikwamba ngwami, Chitulike.

²⁴ Kuzinyeiru yaneha chilama ni yize yapwileho, yachisa kumeso ja Saulu. Samuel yamba ngwenyi, Tala chize tunakakutulikila. Tambula ulie mumu twakufungilacho ndo ye ola ha kwamba ngwami, Hinalakenya atu. Chocho Saulu yalila ni Samuel tangwa lize.

²⁵ Muze hakatuka ku nangamo heza nawa mu chihunda, yalishimwinya ni Saulu helu lia zuwo.

²⁶ Yalimeneka mba ha kuvumbuka cha tangwa Samuel yatambika Saulu helu lia zuwo ngwenyi, Katuka ngukutume mu jila. Saulu yahinduka mba yatuhuka eswe ni aali, iye ni Samuel.

²⁷ Shimbu machipalika ku songo lia chihunda Samuel yamba kuli Saulu ngwenyi, Tuma ngamba ye apalike kulutwe, (iye yapalika kulutwe) alioze ena mana hano hene ngukwambulwile liji lia Zambi.