1 Samuel 8 - MUKANDA USANDU WA ZAMBI 1975

¹ Muze Samuel wakukwokele wapwishile anenyi a malunga akwa kuyula A-Izalele.

² Jina lia mwanenyi mutangu ngwo, Joele; jina lia wamuchiali ngwo, Abija. Apwile akwa kuyula mu Mbia-shipa.

³ Anenyi kendele mu ndako ja tato. Apiasukile nikukaula upite. Atambwile chindo nikuhongesa upatwilo.

⁴ Mba makulwana eswe a Izalele akungulukilile kuli Samuel mu Rama.

⁵ Yamba kuli iye ngwo, Uli mukulwana chikolo ni ana je kendele mu ndako je, kashika utusele mwanangana akatuyule ngwe mavungu akwo eswe.

⁶ Alioze chuma chino Chapihilile Samuel ha kwamba ngwo, Twehenu mwanangana akatuyule. Samuel yalemba kuli Yehova.

⁷ Yehova yamba kuli Samuel ngwenyi, Panjika kuli atu, liji lieswe makwamba, mumu kalitunyine yena, alioze yami analitunu. Kazangile ngupwe mwanangana wo.

⁸ Nikulita ni yilinga yo yeswe chize ku tangwa naachijile ku Engitu ndo musono, nikungwehuka, nikulingila mazambi eka chocho anakulingi nawa yena.

⁹ Kashika panjika ku liji lio, hindu muatoweza ni tachi nikwalweza chize mapwa mwe mwanangana yoze maayula.

¹⁰ Samuel yambulula maliji eswe a Yehova kuli atu aze echile mwanangana.

¹¹ Ngwenyi, Chocho mapwa mwanangana yoze manuyula. Makwata anenu a malunga nikwasela ku matemba jenyi a jita, ni kupwa akwa tuvwalu twenyi akazomboke kulutwe lia matemba jenyi.

¹² Maapwisa tupitau twa tununu ni tupitau twa makumi atano. Amwe mamuchipila minda, ni amwe macha mbuto yenyi, ni amwe mamufulila yikungo ya jita ni yikungo ya matemba jenyi.

¹³ Makwata anenu a mapwo akamulingile milimo ya perfumo, ni ya kuteleka, ni ya kumulingila mbolo.

¹⁴ Munutambula minda yenu, ni minda yenu ya uva ni ya olevwe, yize yeswe yinapeme, akayihane kuli ngamba jenyi.

¹⁵ Manutambula chihanda cha kumi cha mbuto yenu ni cha minda yenu ya uva nikuchihana kuli yilolo jenyi ni kuli ngamba jenyi.

¹⁶ Manutambula ngamba jenu a malunga ni a mapwo, ni apema hakachi ka akweze jenu, ni yimbulu jenu nikwasela ku milimo yenyi.

¹⁷ Manutambula chihanda cha kumi cha mapanga jenu ni pembe jenu, ni yenu munupwa ngamba jenyi.

¹⁸ Kumunukateta ha tangwa lize mumu hali mwanangana wenu yoze nwalitongwela, alioze tangwa lize Yehova kechi kanukumbulula.

¹⁹ Hindu atu kasolo kupanjika ku liji lia Samuel. Yamba ngwo, Hi chocho ko. Tunazange mwanangana helu lietu,

²⁰ tukapwe ngwe mavungu eswe, mwanangana wetu akatuyule, akatutetekelele nikutwashila jita.

²¹ Samuel yapanjika maliji eswe a e atu, yaambulula kuli Yehova.

²² Yehova yamba kuli Samuel ngwenyi, Panjika ku liji lio ukaalingile mwanangana. Samuel yamba kuli malunga a Izalele ngwenyi, Yénu eswe ku yihunda yenu.