1 Samuel 7 - MUKANDA USANDU WA ZAMBI 1975

¹ A-Kiriate-Yerimi yeza yanda mushete wa Yehova yautwala ku zuwo lia Abinadambe ha mulundu. Yasela ku usandu mwanenyi Eleazare kufunga mushete wa Yehova.

² Chize ku tangwa lize mushete wejile kutwama mu Kiriate-Yerimi kwapalikile shimbu linene, makumi aali a miaka, mba vungu lieswe lia Izalele alinyengene nikufupa Yehova.

³ Samuel yamba kuli A-Izalele eswe ngwenyi, Nyi nunahilukila Yehova ni mbunge jenu jeswe katwisenu hakachi kenu mazambi eka ni Asatarote nukatalikise mbunge jenu kuli Yehova nikumulingila iye wika. Mba kumakanupulula kuli A-Filistea.

⁴ Mba A-Izalele akatwishile Ambale ni Asatarote. Alingilile Yehova wika.

⁵ Samuel yamba ngwenyi, Kungululenu A-Izalele eswe ku Mizepa mba mungunulembela kuli Yehova.

⁶ O yakungulukila ku Mizepa. Yataha meya; yaazujila hashi kumeso ja Yehova nikulitwamina kulia tangwa lize, nikwambako ngwo, Hitwavulumuna Yehova. Samuel wayulile A-Izalele ku Mizepa.

⁷ Muze A-Filistea evwile ngwo, A-Izalele hakungulukila ku Mizepa, miata ja A-Filistea yakanduka kulimika no. Mba muze A-Izalele achivwile yavwila woma A-Filistea.

⁸ A-Izalele yamba kuli Samuel ngwo, Kanda ulitwamina kutuhakwila kuli Yehova Zambi yetu akatulamwine kuli A-Filistea.

⁹ Kashika Samuel yanda mwanapanga machamwa yamulambula akapwe mulambu wa kulumba wa muwundu kuli Yehova. Samuel yahakwila A-Izalele kuli Yehova mba Yehova yamukumbulula.

¹⁰ Shimbu Samuel machilambula mulambu wa kulumba A-Filistea akundamine mukwasa jita ni A-Izalele. Alioze Yehova yakulunguza tangwa lize ni liji linene hali A-Filistea, yaakumba, yaalamba chikolo kuli A-Izalele.

¹¹ Malunga a Izalele yakatuka ku Mizepa nikuhanga A-Filistea nikwalamba ndo ku mwanda wa Mbete-Kare.

¹² Henaho Samuel yanda liwe, yalimikina hakachi ka Mizepa ni Shene, yaliluka jina ngwenyi, Ebenezere, mumu ngwenyi, Ndo ku kuno Yehova hatukwasa.

¹³ Chocho A-Filistea ahombokele. Kejile nawa muchima lia njiza ya Izalele. Kwoko lia Yehova lialimikine ni A-Filistea matangwa eswe a Samuel.

¹⁴ Membo aze A-Filistea te hanatambula kuli A-Izalele aahilwishilo, chize ku Ekrone ndo ku Ngata. Ni ye njiza yako yeswe A-Izalele yayitambula kuli A-Filistea. Chikwo nawa kukwapwile jita hakachi ka A-Izalele ni A-Amore.

¹⁵ Samuel yayula A-Izalele matangwa eswe a mwono wenyi.

¹⁶ Yajinga mwaka ha mwaka ku Mbetele, ni ku Ngilingali, ni ku Mizepa nikuyulila A-Izalele mu membo ano eswe.

¹⁷ Alioze wafulukile matangwa eswe ku Rama se kwenako kwapwile zuwo lienyi mba yayulilako A-Izalele. Yatungilako chilumbilo kuli Yehova.