1 Samuel 6 - MUKANDA USANDU WA ZAMBI 1975

¹ Mushete wa Yehova wapwile mu chifuchi cha A-Filistea tukweji shimbiali.

² Mba A-Filistea yasanyika asasendote jo ni tahi, ngwo, Chika mutulinga ni mushete wa Yehova? Nutulweze kama, neka mutuutuma kuma kwawo?

³ O ngwo, Nyi munutuma mushete wa Zambi ya Izalele, kanda nuutuma mokomoko. Chanutamba kumutuma mulambu wa uhie, mba makanuwuka, makanulweza chize chakwika kwoko lienyi kunwecha.

⁴ Mba yamba ngwo, Mulambu wa uhie uka mutumutuma? O yakumbulula ngwo, Yivunda ya oru yitano ni tumbi a oru atano nikulita ni kwalula cha miata ja A-Filistea mumu musongo umuwika wapwile hali yenu eswe ni hali miata jenu.

⁵ Kashika munulinga tuponya twa yivunda yenu ni tuponya twa tumbi aze anapihisa chifuchi nukalemese Zambi ya Izalele. Hanji malelumwisa kwoko lienyi hali yenu ni hali mazambi jenu ni ha chifuchi chenu.

⁶ Kuchi te munukalisa mbunge jenu ngwe A-Engitu ni Falau akalishile nijo? Muze halinga yipupu hakachi ko te kechele e atu kuya? Te kakatukile?

⁷ Kashika lulikenu temba haha ni ngombe aali a yamwa waze te kanda asa kanga. Kashilenu ngombe ku temba ahoze handununenu ana jo nukaanehe ku chihunda.

⁸ Andenu mushete wa Yehova nukause ha temba, mba upite wa oru, uze nunatumu ha mulambu wa uhie nukause hamuwika mu chikasa chimwe, mba munuyituma yikaye yeswe.

⁹ Munutala nyi muukandukila ku jila ya njiza yawo ku Mbete-Shemeshe, iye mwene hanatulingi chuma chino chipi chikolo. Ahoze nyi ka, mba mutunyingika ngwetu hi kwoko henyi ko liatulambile; chapwile chuma cha kutuwana chiwanyina.

¹⁰ Mba chocho alingile e malunga. Anjile ngombe aali a yamwa; yaakashila ku temba; yaajilila ana jo ku chihunda.

¹¹ Yasa mushete wa Yehova ha temba, ni chikasa cha tumbi a oru ni tuponya twa yivunda yo.

¹² Ngombe yayila jila ya pundu ya ku Mbete-Shemeshe ha tapalo limuwika nikuteta shimbu machiya. Kahambulukile chipwe ku chindume hanji ku chimeso. Miata ja A-Filistea yaakaula ndo ku njiza ya Mbete-Shemeshe.

¹³ Akwa Mbete-Shemeshe te macha tiliku mu chikulo. Yatala, yamona mushete, yawahilila ha kuumona.

¹⁴ Temba yiliza mu munda wa Yoshua Ka-Mbete-Shemeshe, yilimana kuze kuli luliwe lunene. O yapula mitondo ya temba, yalumba ngombe akapwe mulambu wa kulumba kuli Yehova.

¹⁵ A-Levi yachiza mushete wa Yehova ni chikasa chize chapwile hamuwika muze mwatwamine upite wa oru, yayitumbika ha luliwe. Malunga a Mbete-Shemeshe tangwa lienalio yalambula milambu ya kulumba ni yitapo kuli Yehova.

¹⁶ Muze miata atano a A-Filistea hachimona yahiluka ku Ekrone tangwa lioliene.

¹⁷ Yivunda ya oru ya mulambu wa uhie yize A-Filistea atumine kuli Yehova, yino; ha Ashedode chimuwika, ha Ngeza chimuwika, ha Asekalone chimuwika, ha Ngata chimuwika, ha Ekrone chimuwika.

¹⁸ Ni tumbi a oru nikulita ni kwalula cha membo eswe a miata atano a A-Filistea, ni membo a yipanga ni yihunda ya mu yambu. Luliwe lunene kuze atulile mushete wa Yehova kululi lwa chela ndo musono mu munda wa Yoshua Ka-Mbete-Shemeshe.

¹⁹ Yalamba amwe a kuli A-Mbete-Shemeshe mumu atalile muchima lia mushete wa Yehova. Yalamba hakachi ko makumi atano a tununu ni makumi shimbiali. Mba atu alinyengene mumu Yehova halamba atu ni kufwa chinene.

²⁰ Mba A-Mbete-Shemeshe ambile ngwo, Iya mahasa kumana kumeso ja Yehova, yono Zambi musandu? Kuli iya makanduka atweche yetu?

²¹ Yatuma mikeji kuli A-Kiriate-Yerimi ngwo, A-Filistea haneha nawa mushete wa Yehova. Palumukenu nukausake.