1 Samuel 5 - MUKANDA USANDU WA ZAMBI 1975

¹ A-Filistea anjile mushete wa Zambi ku Ebenezere yautwala ku Ashedode.

² Muze hatambula mushete wa Zambi autwalile ku zuwo lia Ndagone autumbikile hakamwihi ni Ndagone.

³ Muze hikwacha akwa Ashedode alimenekene, kumanyi Ndagone hanaholoka ha meso jenyi hashi kulutwe lia mushete wa Yehova. O yanda Ndagone yamumanyisa homa henyi nawa.

⁴ Muze hikwacha nawa yalimeneka, kumanyi Ndagone hanaholoka ha meso jenyi hashi kulutwe lia mushete wa Yehova, ni mutwe wa Ndagone ni moko jenyi aali hanamakuka te kanapombo he ha chikukulu cha pito. Chivuvu chenyi wika chasala.

⁵ Kashika chipwe asasendote a Ndagone chipwe akwo waze manjila mu zuwo lia Ndagone keshi kuliata ha chikukulu cha pito lia Ndagone mu Ashedode ndo musono.

⁶ Alioze kwoko lia Yehova lialemene hali akwa Ashedode. Yaonwona, yaalamba ni yivunda, ni Ashedode ni njiza jako jeswe.

⁷ Mba muze atu a mu Ashedode achimwene chocho, ambile ngwo, Kutuchi kutayiza mushete wa Zambi ya Izalele kutwama ni yetu, mumu kwoko lienyi likalu hali yetu ni hali zambi yetu Ndagone.

⁸ Kashika Ukungulwile miata eswe a A-Filistea kuli ayo ngwo, Chika mutulinga ni mushete wa mwe Zambi ya Izalele? O ngwo, Atwale mushete wa Zambi ya Izalele ku Ngata. Chocho atwalileko mushete wa Zambi ya Izalele.

⁹ Muze hautwalako, kwoko lia Yehova lialimikine ni limbo nikwapinjisa chikolo. Yalamba malunga a limbo ni anene ni akepe, yapwa ni yivunda.

¹⁰ Chocho atwalile mushete wa Zambi ku Ekrone. Mba muze mushete wa Zambi muuchiheta ku Ekrone akwa Ekrone akololokele ngwo, Hatunehena mushete wa Zambi ya Izalele, atushihe ni atu jetu.

¹¹ Kashika akungulwile miata eswe a A-Filistea ngwo, Katwisenu mushete wa Zambi ya Izalele ukahiluke nawa kuma kwawo kuchina muutushiha ni atu jetu. Mumu kwapwile mwongo wa kufwa ndusu, limbo lieswe mumu kwoko lia Zambi lialemene chikolo hali ayo.

¹² Malunga aze kafwile alokokele ni yivunda, mba muteto wa limbo wakandukile kwilu.