1 Samuel 4 - MUKANDA USANDU WA ZAMBI 1975

¹ Mba liji lia Samuel liejile kuli A-Izalele eswe. A-Izalele atuhukile mukwasa jita ni A-Filistea, yasa chilombo cho hakamwihi ni Ebenezere. A-Filistea yasa chilombo cho ku Afeke.

² A-Filistea o yalilongela ngango ja kwasa jita ni A-Izalele, mba muze ashile, A-Filistea akumbile A-Izalele. Ashihile tununu awana a tujita aze apwileko.

³ Muze atu ahetele ku chilombo makulwana ja A-Izalele ambile ngwo, Kuchi te Yehova hatulamba musono kumeso ja A-Filistea? Tusakenu mushete wa usendo wa Yehova ku Shilo, mba muze muuheta hakachi ketu muutulamwina kuli akwa kole jetu.

⁴ Kashika atumine ku Shilo anehe mushete wa usendo wa Yehova-wa-Tujita yoze watwama hakachi ka akerupimi. Ana aali a Eli, Hofni ni Finehase apwileko hamwe ni mushete wa usendo wa Zambi.

⁵ Muze mushete wa usendo wa Yehova wahetele mu chilombo A-Izalele eswe akalumiokene ni liji linene ndo hashi hanyikine nawa.

⁶ Muze A-Filistea evwile zungo lia kukalumioka ambile ngwo, Zungo lia kukalumioka chino chinene mu chilombo cha A-Hepreu kuchi Unalumbunuka? Mba chaalumbunukine ngwo, Mushete wa Yehova hiweza mu chilombo.

⁷ A-Filistea yevwa woma mumu yamba ngwo, Zambi heza mu chilombo. Ngwo, Lamba lietu! mumu chuma chino kanda chipwa kama nilimwe tangwa.

⁸ Lamba lietu! iya matupulula ku moko ja wano mazambi a ndundo? E mazambi wano ene alambile A-Engitu ni yilungo yeswe mu puya.

⁹ Enu A-Filistea! Takamenu, pwenu malunga kuchina munupwa ngamba kuli A-Hepreu chizechene ngwe ayo hapwa kuli yenu. Asenu jita ngwe nuli malunga.

¹⁰ Chocho A-Filistea ashile jita, yakumba A-Izalele. A-Izalele yachinyina mutu ku mbalaka yenyi mutu ku mbalaka yenyi. Kwapwile kushiha chinene, mumu kwafwile a kuli A-Izalele makumi atatu a tununu a maswalale a kwenda hashi.

¹¹ Ni mushete wa Zambi yautambula; ni ana aali a Eli, Hofni ni Finehase yafwa.

¹² Umwe kajita, lunga wa ku Mbenjamine, wazombokele, yeza ku Shilo tangwa lioliene ni mazalo jenyi a kusonya, ni mavu ha mutwe.

¹³ Ha kuheta yawana Eli kanatwama ha chitwamo ku kulwa jila nikutala mumu mbunge yenyi te yinachikimina mushete wa Zambi. Muze mwe lunga haheta ku limbo, yatwa lusango, akwa limbo eswe yalila.

¹⁴ Ha kwivwa zungo lia kulila Eli yahula ngwenyi, Chizungozungo chino kuchi chinalumbunuka? Mba mwe lunga wanjilile kapupushi, yambulwila Eli.

¹⁵ Eli te kali ni makumi livwa a miaka ni miaka nake. Meso jenyi halá kahashile kumona.

¹⁶ Mwe lunga yamba kuli Eli ngwenyi, Yami mwene nakatukanga ku jita, lie lia musono nachinanga hakachi ka tujita. Eli ngwenyi, Yuma kuchi yapwa mwanami?

¹⁷ Mukeji yakumbulula ngwenyi, A-Izalele hachina kumeso ja A-Filistea; hikwapwa kushiha chinene hakachi ka atu; ni ana je aali nawa Hofni ni Finehase hafwa; ni mushete wa Zambi hautambula.

¹⁸ Mba muze havuluka mushete wa Zambi Eli yalimbuka ha chitwamo chenyi kunyima ku kulwa chajilo. Yamakuka kota. Yafwa mumu te mukulwana chikolo; kanaleme. Te hanayulu A-Izalele makumi awana a miaka.

¹⁹ Tembwa-mwanenyi, pwo lia Finehase kali ni ufumba hakamwihi te ni kusema. Ha kwivwa lusango wa kutambula mushete wa Zambi, chikwo nawa tato-weno ni mukwolunga hafwa, yalihetamina, yasema mwana, mumu misongo yamukwata.

²⁰ Ha ola ya kufwa chenyi mapwo aze anamujingilika ambile kuli iye ngwo, Kanda wivwa woma mumu hiwasema mwana-lunga. Alioze kakumbulwile chipwe kuchisa mbunge.

²¹ Iye yaluka mwana ngwenyi, Ikabode, mumu ngwenyi, Ulemu hiwakatuka kuli A-Izalele, mumu hatambula mushete wa Zambi ni ha chikuma cha tato-weno ni mukwo-lunga.

²² Ngwenyi, Ulemu hiwakatuka kuli A-Izalele, mumu hanatambula mushete wa Zambi.