1 Samuel 31 - MUKANDA USANDU WA ZAMBI 1975

¹ A-Filistea ashile jita ni A-Izalele ni malunga a Izalele achinyine kumeso ja A-Filistea yafwa ha mulundu wa Ngilboa.

² A-Filistea yahanga Saulu ni ana jenyi; yashiha Jonatas, ni Abinadambe, ni Malakishua, ana ja Saulu.

³ Jita yashata chikolo hali Saulu. Ngashi yamuwana; yamwasa nikumulemeka chikolo.

⁴ Henaho Saulu yamba kuli mukwa kumumbachila yitwa ngwenyi, Tomona katana ke ungutuwe nenyi kuchina wano yilima meza manguwana mba mangutuwa ni manguyunga. Alioze mukwa kumumbachila yitwa katayile mumu woma wunji evwile. Kashika Saulu yanda katana kenyi mwene; yalikonaho.

⁵ Muze mukwa kumumbachila yitwa hamona Saulu hafwa neye nawa yalikona ha katana kenyi, yafwa hamuwika nenyi.

⁶ Chocho Saulu yafwa ni anenyi atatu a malunga ni mukwa kumumbachila yitwa ni malunga jenyi eswe ha tangwa limuwika eswe hamuwika.

⁷ Malunga A-Izalele atwamine mu sali lia chikulo ni waze a mu sali lia Yordau muze hamona malunga A-Izalele hachina, ni Saulu ni anenyi hanafu, o yahichika yihunda yo, yachina. Mba A-Filistea yeza, yatwamamo.

⁸ Mukwacha, A-Filistea yeza kuzula afu, yawana Saulu ni anenyi atatu hanafu ha mulundu wa Ngilboa.

⁹ Yamutapa mutwe, yamuzula mazalo jenyi a utale, yatuma tunganda ndusu chifuchi cha A-Filistea akatwale lusango ku mahamba jo ni kuli e atu.

¹⁰ Yasa mazalo jenyi mu tembele ya Asatarote. Yahachila mujimba wenyi ha chipanga cha Mbete-Shane.

¹¹ Alioze muze akwa Njabeshe-Ngiliate hevwa chize A-Filistea alinga kuli Saulu,

¹² malunga eswe akwa tachi yakatuka; yenda ufuku weswe; yachiza mujimba wa Saulu ni mijimba ya anenyi a malunga ku chipanga cha Mbete-Shane. Yeza ku Njabeshe; kwenako ayochelele.

¹³ Yanda yifwaha yo; yayifunda mushi lia mutondo mu Njabeshe; yalitwamina kulia matangwa shimbiali.