1 Samuel 30 - MUKANDA USANDU WA ZAMBI 1975

¹ Ha tangwa liamuchitatu muze David ni malunga jenyi yeza ku Zikalage, kumanyi A-Amaleke hananeha jita ku Negeve ni ku Zikalage. Hanakumbu chihunda cha Zikalage nikuchocha kahia.

² Hanakwata mapwo ni waze eswe apwilemo, ni akepe ni anene. Kashihile niumwe; yaambata eswe; yaya kwo.

³ Mba muze David ni malunga jenyi ejile ku chihunda achiwanyine hachocha ni kahia, ni mapwo jo ni anó a malunga ni a mapwo hanaambata funge.

⁴ David ni atu aze endele nenyi yakololoka ni kulila ndo kapwile nawa ni tachi ja kulila.

⁵ Ni mapwo aali a David hanaambata funge; Ahinoame Ka-Yezerele ni Abigale yoze wapwile pwo lia Nabale wa ku Karmela.

⁶ David walifwichile chikolo mu mbunge mumu e atu ambile kumwasa mawe, se atu eswe evwile kupiha mu mbunge mumu hali ana jo a malunga ni a mapwo. Alioze David walitakamishine muli Yehova Zambi yenyi.

⁷ David yamba kuli sasendote Abiatare mwana wa Ahimeleke ngwenyi, Ngunehene ye efode. Abiatare yaneha efode kuli David.

⁸ David yahula Yehova ngwenyi, Ngukaule mbunga yino, nyi? Mungwawana, nyi? Yamukumbulula ngwenyi, Kaula, muawana pundu mba mutambula nawa yeswe.

⁹ Chocho David yakatuka ni kulakaji asambano a malunga apwile no. Ejile ku chitwetwe Bezore, kuze ahichikile amwe asale kunyima.

¹⁰ David yaya nikukaula iye ni kulakaji awana a malunga. Kulakaji aali asalile kunyima. Te hijaahwa; kahashile kuzauka chitwetwe cha Bezore.

¹¹ Yawana Ka-Engitu mu yambu, yamuneha kuli David. Yamwaha mbolo; yalia. Yamwaha meya akanwe.

¹² Mba yamwaha chipinji cha chandanda cha makuyu ni yichakata yiali ya uva jumu. Muze te halia yahuzuluka mumu kalile, kanwine matangwa atatu ni ufuku utatu.

¹³ David yamba kuli iye ngwenyi, Uli mutu waya? Kulihi unakatuka? Iye yamba ngwenyi, Nguli mukweze wa ku Engitu, mukwa kulingila Ka-Amaleke. Mwata wami kanakanguhichika mumu matangwa atatu kunyima ngunakaputuka kuyiza.

¹⁴ Twanehene jita ku Negeve ya A-Cherete, ni ya A-Yunda, ni ku Negeve ya Kalemba. Twochele Zikalage ni kahia.

¹⁵ David yamuhula ngwenyi, Mututwala ku mbunga yino, nyi? Iye yamba ngwenyi, Ulishinge ni Zambi, kuchi kungushiha hanji kungukunjika kuli mwata wami mba mungunutwala ku mbunga yino.

¹⁶ Muze te hamutwala o eswe halimwanga kweswe kuma kuze nikulia, nikunwa nikuhangana mumu ha upite wunji hapupa mu chifuchi cha A-Filistea ni mu chifuchi cha A-Yunda.

¹⁷ David yaalamba chize ku kunjila cha tangwa ndo ku chingoloshi cha tangwa likwo. Chipwe lunga umuwika kalilamwinyine shina kulakaji awana a akweze achinyine hali tumelu.

¹⁸ David yahilwisa yuma yeswe A-Amaleke atambwile. Yapulula mapwo jenyi aali nawa.

¹⁹ Nichimwe kuchahonene chipwe chikepe chipwe chinene; chipwe ana a malunga chipwe a mapwo; chipwe upite hanji chimwe chuma achitambwile, David yahilwisa yeswe.

²⁰ David yatambula nawa e mapanga ni pembe ni ngombe, ni atu atwalile yimuna wano kulutwe lienyi nikwamba ngwo, Uno we upite wa David.

²¹ Aho David yeza kuli kulakaji aali a malunga aze kahashile kumukaula mumu jaahwile, yasala ku chitwetwe cha Bezore. O yatuhuka kumupatwiza nikupatwiza waze eswe endele hamuwika nenyi. Muze David yakundama kuli e atu yaameneka.

²² Henaho yingulungulu ni atu amokomoko hakachi ka waze ayile ni David yamba ngwo, Upite uno hitwahilwisa kutuchi kuuhana kuli wano se kayile hamwe ni yetu. Mutu mweswe manda pwo lienyi ni ana jenyi aye kwenyi; kunahu.

²³ Alioze David yamba ngwenyi, Akwetu, kunuchi kulinga chocho ni chize Yehova hanatwehe. Iye hanatufungu, hanakunjika kuli yetu tujita waze ejile kulimika ni yetu.

²⁴ Iya manupanjika ni chikuma chino? Chihanda cha yoze masala nikufunga yuma muchipwa chimuwika ni chihanda cha yoze maya ku jita. Matambula chimuwika.

²⁵ Chize ku tangwa lize ndo musono yachikolesa shimbi ni chiyulo mu Izalele.

²⁶ Ha kuheta ku Zikalage David yatuma chihanda cha upite kuli masepa jenyi makulwana ja Yunda ngwenyi, Tambulenu chawana chenu cha ku upite wa akwa kole ja Yehova.

²⁷ Chayile kuli waze mu Mbetele, ni mu Ramote ya Negeve, ni mu Yatiri,

²⁸ ni mu Aroere, ni mu Sefemote, ni mu Eshetemo,

²⁹ ni mu Rakale, ni mu yihunda ya A-Jeramila, ni mu yihunda ya A-Kene,

³⁰ ni mu Horoma, ni mu Korashane, ni mu Atashe,

³¹ ni mu Heprone, te mu yifuchi yeswe kuze David ni malunga jenyi endanganyine.