1 Samuel 3 - MUKANDA USANDU WA ZAMBI 1975

¹ Mwe mwana Samuel wavumbikilile Yehova kumeso ja Eli. Chapwile chikalu kwivwa liji lia Yehova ha matangwa aze. Te usolwelo wa pundu kuushiko.

² Ha matangwa aze, muze te Eli hapomba ha muhela wenyi (meso jenyi halá, kahashile kumona),

³ shimbu ndeya ya Zambi kanda yijima, Samuel te hapomba mu tembele ya Yehova kuze kwatwama mushete wa Zambi,

⁴ Yehova yasanyika Samuel. Iye yakumbulula ngwenyi, Yami uno.

⁵ Yazomboka kuli Eli ngwenyi, Yami uno; wangusanyika. Iye yamba ngwenyi, Chakusanyikine. Yako upombe. Yaya, yapomba.

⁶ Yehova cheka nawa yasanyika Samuel. Samuel yahinduka yaya kuli Eli. Yamba ngwenyi, Yami uno, se wangusanyika. Iye yakumbulula ngwenyi, Chakusanyikine mwanami. Yako upombe nawa.

⁷ Samuel kanda achinyingika Yehova; chipwe liji lia Yehova te kanda achilivwa.

⁸ Mba Yehova yasanyika cheka nawa kamuchitatu. Iye yahinduka, yaya kuli Eli ngwenyi, Yami uno, se wangusanyika. Eli yanyingika ngwenyi, Yehova hanasanyika mwe mwana.

⁹ Kashika Eli yamba kuli Samuel ngwenyi, Yako upombe. Nyi makusanyika, wambe ngwe, Amba Yehova mumu kavumbi ke kanapanjika. Chocho Samuel yaya, yapomba ha muhela wenyi.

¹⁰ Yehova yeza, yamana, yasanyika ngwe majila akwo ngwenyi, Samuel, Samuel. Mba Samuel yamba ngwenyi, Amba mumu kavumbi ke kanapanjika.

¹¹ Yehova yamba kuli Samuel ngwenyi, Tala mungulinga chimwe chuma mu Izalele mba mutu mweswe machivwa matwi jenyi eswe aali mevwa chimbangwinya.

¹² Ha tangwa lize mungulinga yeswe ya kulimika ni Eli yize hinamba ya kutwala ku munyachi wenyi chize ku uputukilo ndo ku songo.

¹³ Mumu hinamulweza, ngwami, Himungupatwila munyachi wenyi ndo ku miaka mumu ha uhenge uze iye wanyingikine, mumu te ana jenyi apwile nikushililika Zambi, alioze iye kaakanjishile.

¹⁴ Kashika hinalishinga ha kutwala ku munyachi wa Eli ngwami, Uhenge wa munyachi wa Eli kechi kaukukila ni yitapo hanji milambu ndo ku miaka.

¹⁵ Samuel yapomba ndo hikwacha, mba yazulula mapito a zuwo lia Yehova, te woma anevu kulweza usolwelo kuli Eli.

¹⁶ Alioze Eli yasanyika Samuel ngwenyi, Mwanami Samuel. Iye yamba ngwenyi, Yami uno.

¹⁷ Eli ngwenyi, Chuma chize Yehova hakulweza, chika? Ngunaliumbu, kanda unguswekelacho. Nyi munguswekela chimwe cha yize yeswe Yehova hakulweza—Zambi akakulingecho nikuwezaho nawa.

¹⁸ Kashika Samuel yamulweza ye yeswe. Kamuswekelele nichimwe. Eli ngwenyi, Iye Yehova, akalinge chize chamupemena.

¹⁹ Samuel yatatuka, mba Yehova wapwile hamwe nenyi. Katayijile maliji jenyi kuholoka hashi, niamwe.

²⁰ A-Izalele eswe chize ku Ndane ndo ku Mbia-shipa yanyingika ngwo, Hanakolesa Samuel akapwe profeta wa Yehova.

²¹ Mba Yehova yasoloka kuli Samuel cheka nawa mu Shilo. Mumu Yehova walisolwele kuli Samuel mu Shilo ku liji lia Yehova.