1 Samuel 29 - MUKANDA USANDU WA ZAMBI 1975

¹ A-Filistea yakungulula tujita two eswe ku Afeke. A-Izalele o yasa chilombo cho ku fuji lia meya lili ku Yezerele.

² Shimbu miata ja A-Filistea machipalika ku makulakaji ni ku tununu, ni David ni malunga jenyi machipalika kunyima ni Akishe,

³ tupitau twa A-Filistea yamba ngwo, Wano A-Hepreu, yika analingi kuno? Mba Akishe yamba kuli tupitau twa A-Filistea ngwenyi, Au ngwami, David kavumbi ka Saulu mwanangana wa Izalele. Hatwama ni yami matangwa ni miaka mba hanga ejile kuli yami chawanyine muli iye chitela ndo musono.

⁴ Alioze tupitau twa A-Filistea atenukine nenyi. Tupitau twa A-Filistea yamba kuli iye ngwo, Hilwisa yono lunga, aye kuze wamuselele chihela. Kechi kuya ni yetu ku jita, kuchina hanji mu jita malumuka mukwa kulimika ni yetu. Kuchi yono mawana ni mwata wenyi? Ngwetu, Machilinga ni mitwe ya wano malunga.

⁵ Au ngwetu, David yoze embile umwe kuli mukwo ni kuhangana ngwo, Saulu hashiha tununu twenyi; David hashiha makumi jenyi a tununu.

⁶ Akishe yasanyika David, yamba kuli iye ngwenyi, Ni mwono wa Yehova uli mutu wamwenemwene, ni kuli yami kutuhuka che ni kunjila che mu jita chinanguwahila, mumu hanga wejile kuli yami chawanyine chipi muli yena ndo musono. Alioze miata kakutayile.

⁷ Kashika hiluka haliapwila uye ni sambukila, kuchina miata ja A-Filistea makuvwila kupiha.

⁸ David yamba kuli Akishe ngwenyi, Yika nalinga? Chize ku tangwa lize nanjila ku milimo yenu ndo musono, yika nwawana muli yami kavumbi kenu yangukwika kuya nikwasa jita ni akwa kole ja mwene wami mwe mwanangana?

⁹ Akishe yakumbulula kuli David ngwenyi, Ngunanyingika, nyi yami unangupemena ngwe umwe mungelo wa Zambi, hindu tupitau twa A-Filistea hamba ngwo, Kechi kuya ni yetu ku jita.

¹⁰ Kashika Ulimeneke hamene hamuwika ni tuvumbi twa mwene we wejile no ukakatuke chimenemene ukaye ha kucha.

¹¹ Chocho David yakatuka chimenemene hamwe ni malunga jenyi akahiluke ku chifuchi cha A-Filistea. Alioze A-Filistea yaya ku Yezerele.