1 Samuel 28 - MUKANDA USANDU WA ZAMBI 1975

¹ Ha matangwa aze A-Filistea yakungulula tujita two akase jita ni A-Izalele. Akishe yamba kuli David ngwenyi, Chikulumbunuke, yena ni malunga je kumunuya ni yami ku jita.

² David yamba kuli Akishe ngwenyi, Chipwe chocho. Kumununyingika milimo ya yami kavumbi kenu. Akishe yamba kuli David ngwenyi, Nyi chocho mungukupwisa kalayi kami miaka yeswe ya mwono we.

³ Samuel te hanafu, ni A-Izalele hanamulili nikumufunda mu Rama, chihunda chenyi mwene. Saulu iye hahuma akwa mahamba ni yimbanda mu chifuchi.

⁴ A-Filistea yakunguluka, yeza, yasa chilombo cho ku Shuneme. Saulu iye yakungulula A-Izalele eswe o yasa chilombo cho ku Ngilboa.

⁵ Muze Saulu yamona tujita twa A-Filistea yevwa woma; mbunge yenyi yiyichikima chikolo.

⁶ Alioze muze Saulu yahula kuli Yehova, Yehova kamukumbulwile chipwe ku yilota chipwe ku Urimi chipwe kuli aprofeta.

⁷ Kashika Saulu yamba kuli ngamba jenyi ngwenyi, Ngufupilenu umwe pwo mukwa mahamba hanga ngukaye kuli iye ngumuhule. Ngamba jenyi yamba kuli iye ngwo, Kwali umwe mukwa mahamba ku Endore.

⁸ Kashika Saulu yalihipula, yazala mazalo eka, yaya ni malunga aali hamwe nenyi, yaheta kuli mwe pwo ha ufuku. Ngwenyi, Ngunazange unguhulile umwe hamba, ukangunehene mweswawo mungutongola.

⁹ Pwo yamba ngwenyi, Te kwanyingikine chize Saulu halinga? Chize hamanununa akwa mahamba ni yimbanda mu chifuchi. Nyi chocho kuchi te unatela muheto mbunge yami ukangushihe?

¹⁰ Alioze Saulu yalishinga ni Yehova ngwenyi, Ni mwono wa Yehova kechi kukufwetesa chuma chino.

¹¹ Mba pwo yamba ngwenyi, Ngukuvumbwile iya? Iye yamba ngwenyi, Nguvumbwile Samuel.

¹² Muze pwo yamona Samuel yateta ni liji linene, mba yamba kuli Saulu ngwenyi, Kuchi te wangwonga? Ngwami yena Saulu.

¹³ Mwanangana yamba kuli iye ngwenyi, Kanda wivwa woma. Yika unamono? Pwo yamba kuli Saulu ngwenyi, Ngunamono umwe zambi kanavumbuka hashi.

¹⁴ Saulu yamba kuli pwo ngwenyi, Kuchi anapu? Iye yakumbulula ngwenyi, Umwe mukulwana wa lunga kanavumbuka, Kanalivungu hina lia ngungu. Saulu yanyingika ngwenyi, Samuel, kashika yafulamana hashi nikumuwayila.

¹⁵ Samuel yamba kuli Saulu ngwenyi, Kuchi te hiwangusakalisa nikunguvumbula? Saulu ngwenyi, Ngunapinji chikolo A-Filistea kanase jita ni yami. Zambi hanangumbu nyima; kangukumbulwile nawa, chipwe kuli aprofeta chipwe Ku yilota, kashika hinakusanyika ungulweze chize changutamba kulinga.

¹⁶ Samuel yamba ngwenyi, Nyi Yehova hanakumbu nyima, hanalumuka mukwa kole kuli yena kuchi te unanguhula yami?

¹⁷ Yehova hanakulingi nikulita ni liji liami mumu Yehova hanachangumuna wanangana mu kwoko lie, hanauhane kuli mukwenu David.

¹⁸ Mumu kwononokene ku liji lia Yehova; kwalingile ufwatulo wenyi usasu hali A-Amaleke; kashika Yehova halinga chuma chino kuli yena haliapwila.

¹⁹ Chikwo nawa Yehova makunjika Izalele ni yena nawa hamuwika kuli A-Filistea. Hamene yena ni ana je mapwa hamwe ni yami, ni Yehova makunjika tujita twa Izalele nawa kuli A-Filistea.

²⁰ Aho Saulu yalimbuka hashi miololo, ni woma wunji mumu ha maliji a Samuel. Keshi nawa ni tachi mumu te kalile nichimwe mwalwa weswe ni ufuku weswe.

²¹ Pwo yeza kuli Saulu, mba muze hamona mwongo wenyi yamba kuli iye ngwenyi, Talenu yami kavumbi kenu hinapanjika kuli yenu. Hinapanjika kuli yenu nikunjila mu Utoji wa mwono wami ni kupanjika chize nwangwambanga.

²² Kashika, ni yenu panjikenu kuli yami kavumbi kenu haliapwila. Nguse kamwe kakulia kumeso jenu, nulie, nukapwe ni tachi muze munuya kwenu.

²³ Iye katayile, ngwenyi, Chichi kulia. Alioze tuvumbi twenyi, hamwe ni mwe pwo yamushinjila kashika yapanjika ku maliji jo. Yakatuka hashi. Yatwama ha muhela.

²⁴ Pwo te kali ni mwana-ngombe wa maji; yamushiha fuji-fuji; yanda wunga, yachika mbolo kuyishi futunwiso, yayocha.

²⁵ Yayisa kumeso ja Saulu ni tuvumbi twenyi. O yalia, yaya kwo ufuku uze wene.