1 Samuel 27 - MUKANDA USANDU WA ZAMBI 1975

¹ David yamba mu mbunge yenyi ngwenyi, Limwe tangwa mangwo-nwona kuli Saulu. Chuma chipema chakuhi kuli yami shina nguchinyine ku chifuchi cha A-Filistea. Ako Saulu mujimuhwa kungufupa mu njiza ja A-Izalele mba ntungwomboka ku moko jenyi.

² Chocho David yakatuka ni kulakaji asambano a malunga waze endele no, yaya kuli Akishe mwana wa Maoke mwanangana wa Ngata.

³ David yatwama ni Akishe ku Ngata, iye ni malunga jenyi mutu mweswe mu zuwo lienyi, David ni mapwo jenyi aali Ahinoame Ka-Yezerele, ni Abigale Ka-Karmela wapwile te pwo lia Nabale.

⁴ Muze Saulu hevwa ngwo David hachinyina ku Ngata kamufupile nawa.

⁵ David yamba kuli Akishe ngwenyi, Nyi nwanguvwila vumbi, angwehe chihela mu limbo limwe lia mu yambu ngukatwameko, mumu kuchalitele yami kavumbi kenu kutwama mu mbala hamwe ni yenu.

⁶ Kashika ha tangwa lize Akishe yamwaha Zikalage. Ha chikuma chino Zikalage yapwa ya mbala ya mianangana ja A-Yunda ndo musono.

⁷ Kwalula matangwa ja David mu chifuchi cha A-Filistea apwile kumi lia tukweji ni tukweji asambano.

⁸ David ni malunga jenyi ayile nikupupa A-Ngeshure, ni A-Ngezere, ni A-Amaleke, mumu katu ku shakulu e akwa chifuchi wano, ndo ku Shure ku chifuchi cha Engitu.

⁹ David yapupa chifuchi. Kahichikile ni mwono chipwe lunga chipwe pwo, alioze yambata mapanga, ni ngombe, ni yimbulu, ni tumelu, ni mazalo, yahiluka ku Akishe.

¹⁰ Muze Akishe yahula ngwenyi, Waze wapupanga musono aya? David wambile ngwenyi, Napupanga Negeve ya A-Yunda, hanji ngwenyi, Napupanga Negeve ya A-Jeramila, hanji ngwenyi, Napupanga Negeve ya A-Kene.

¹¹ David kahichikile niumwe ni mwono chipwe lunga chipwe pwo akanehe lusango ku Ngata. Kananyongo ngwenyi, Kuchina matwambulula ngwo, David chocho kakulinga. Ndako yenyi chocho yapwile shimbu lieswe Watwamine mu chifuchi cha A-Filistea.

¹² Akishe wafulielele David mumu wanyongene ngwenyi, Iye hanalipwisa mukwa kole Wahiana kuli atu jenyi A-Izalele kashika mapwa kavumbi kami miaka yeswe.