1 Samuel 26 - MUKANDA USANDU WA ZAMBI 1975

¹ Henaho A-Zife ejile kuli Saulu ku Ngibia nikwamba ngwo, David kanaswame ku mulundu wa Hachila sali lia Njeshimone.

² Kashika Saulu yakatuka, yapalumuka ku puya ya Zife hamuwika ni tununu atatu a malunga A-Izalele a kusakula, akafupe David mu puya ya Zife.

³ Saulu yasa chilombo chenyi ha mulundu wa Hachila, ku kulwa tapalo sali lia Njeshimone. Alioze David yasala mu puya. Muze David yamona Saulu hamukaula ndo mu puya

⁴ yatuma ngendeshi, yasa chinyingi pundu ngwenyi, Saulu haneza.

⁵ David yeza ku chilombo cha Saulu. David yamona kuze Saulu anapombo hamuwika ni Abenere mwana wa Nere mwe kapitau ka tujita. Saulu te kanapombo muchima lia chilombo; tujita eswe kanamujingilika.

⁶ David yamba kuli Ahimeleke Ka-Hete, ni kuli mwanakwo wa Joabe, Abishai mwana wa Zeluia ngwenyi, Iya maya hamwe ni yami ku chilombo cha Saulu? Abishai ngwenyi, Munguya yami.

⁷ Chocho David ni Abishai yaya kuze kunapombo tujita ha ufuku; ni Saulu kanapomboko muchima lia chilombo ni kunga lienyi lia kujika hashi ku mutwe wenyi ni Abenere ni tujita eswe kanapombo kwa kumujingilika.

⁸ Kashika Abishai yamba kuli David ngwenyi, Zambi hanakunjika mukwa kole ye mu kwoko lie musono. Ngutayize ngumupalakenye hashi ni kunga ke kamuwika. Chichi kumulamba kaali.

⁹ Alioze David yamba kuli Abishai ngwenyi, Kanda umwonwona, mumu iya mahasa kusamba nyi masa kwoko lienyi lia kulimika ni yoze Yehova hanamuwayisa?

¹⁰ David yamba ngwenyi, Ni mwono wa Yehova, Yehova mwene mamulamba; hanji tangwa lienyi lia kufwa muliza; hanji maya ku jita mba mafwa.

¹¹ Yehova angukanjise kusa kwoko liami lia kulimika ni yono Yehova hanamuwayisa ni maji. Alioze anda kunga lino lili ku mutwe wenyi, ni mulondo wa meya tuye.

¹² Chocho David yanda kunga ni mulondo wa meya ku mutwe wa Saulu, yakatuka. Niumwe wachimwene, chipwe kuchinyingika. Niumwe walawile mumu eswe apwile mu tulo se Yehova haatumina tulo anji chikolo.

¹³ Mba David yaya sali likwo yamanyina ha mulundu; pinji yinene yili hakachi ko.

¹⁴ David yatambika kuli tujita ni kuli Abenere mwana Nere ngwenyi, Abenere! kushi kukumbulula? Mba Abenere yakumbulula ngwenyi, Yena iya unasanyika mwanangana?

¹⁵ David yamba kuli Abenere ngwenyi, Te hi uli lunga ko, nyi? Iya walita ni yena mu Izalele? Nyi chocho, kuchi te kwalayilile mwanangana iye mwene we? Mumu umwe mutu wanjilanga mukushiha mwanangana mwene we.

¹⁶ Chuma chino walinganga kuchapemene. Ni mwono wa Yehova watela kufwa mumu kwalayilile mwene we wa kuwayisa kuli Yehova. Tala haliapwila kunga lia mwanangana kuze lili; ni mulondo wa meya wapwanga ku mutwe wenyi.

¹⁷ Saulu yanyingika liji lia David yamba ngwenyi, Alio liji lia yena mwanami David? David yamba ngwenyi, Liji liami mwene wami mwanangana.

¹⁸ Iye yamba ngwenyi, Mwene wami, kuchi te nwakunguhanga yami nguli kavumbi kenu? Yika nalinga? Uhie uka nguli nawo?

¹⁹ Kashika mwene wami mwanangana panjikenu ku maliji a yami kavumbi kenu. Nyi Yehova hananuvundula kulimika ni yami atambule mulambu. Alioze nyi malunga hachilinga akashingiwe kumeso ja Yehova mumu hananguhumu musono hanga ngukahone chihanda cha chihinga cha Yehova ngwo, Yako ukavumbike mazambi eka.

²⁰ Kashika manyinga jami kanda amwangana hashi kusuku ni Yehova, mumu mwanangana wa Izalele haneza mukuhanga kachipu umuwika ngwe atu kakuhanga ngwali ha milundu.

²¹ Saulu yamba ngwenyi, Hinavulumuna mwanami David. Hiluka mumu chichi kukulinga nawa chipi, mumu mwono wami wapwanga ulemu kumeso je musono. Hinalinga uhepuke. Hinapiasuka chikolo kuhiana.

²² David yakumbulula ngwenyi, Mwanangana, kunga lienu lino; umwé mukweze eze alisake.

²³ Yehova akononone mutu mweswe nikulita ni ululi wenyi ni kushishika chenyi, mumu Yehova wanukunjikanga kuli yami musono hindu cholwele kwoko liami kulimika ni yoze amuwayishile kuli Yehova.

²⁴ Nalemesanga mwono wenu musono, chocho nawa mwono wami ukaleme kumeso ja Yehova akangupulule ku yihungumiona yeswe.

²⁵ Mba Saulu yamba kuli David ngwenyi, Ukawahe, mwanami David. Kumukalinga yuma yinji; kumukayimanununa kanawa. Chocho David wayile kwenyi. Saulu yahiluka ku mahio.