1 Samuel 25 - MUKANDA USANDU WA ZAMBI 1975

¹ Samuel wafwile. A-Izalele eswe akungulukile nikumulila. Mba yamufu nda mu zuwo lienyi mu Rama. David aye yakatuka, yaya ku puya ya Parane.

² Kwapwile umwe lunga mu Mayone alioze upite wenyi Watwamine mu Karmela. Iye pichi; kali ni tununu atatu a mapanga, ni kanunu ka pembe. Te kanatewula mapanga jenyi mu Karmela.

³ Jina lia mwe lunga Nabale. Jina lia mukwo-pwo Abigale. Pwo iye mukwa mana anji, chileza, alioze lunga mukwa kuvutuka, keshi vumbi, wa ku munyachi wa Kalemba.

⁴ David yevwa mu puya ngwo, Nabale kanatewula mapanga jenyi.

⁵ Kashika David yatuma kumi lia akweze. David yamba kuli akweze ngwenyi, Yénu ku Karmela kuli Nabale nungumenekeneye.

⁶ Nukamumeneke ngwenu, Sambukila kuli yena, ni sambukila yikapwe ku zuwo lie, ni sambukila yikapwe ku yuma yeswe uli nayo.

⁷ Ngunevu ngwo uli ni akwa kutewula mapanga. Tufunga twe atwamine ni yetu; kutwaalingile chipi; kahonene nichimwe shimbu lieswe apwile mu Karmela.

⁸ Hula akweze je, makulweza. Kashika akweze jami akawane vumbi kumeso je se tuneza ha tangwa lia kuwaha. Hana cheswacho uli nacho kuli wano tuvumbi twe ni kuli yami mwané David.

⁹ Ha kuhetako akweze ja David yambulula yino yuma yeswe kuli Nabale mu jina lia David mba yamana.

¹⁰ Nabale yakumbulula kuli akweze ja David ngwenyi, David iya? Mwana wa Yese kuchi apwa? Matangwa ano ngamba anji kakuchina akako.

¹¹ Te mungwanda mbolo yami, ni meya jami, ni yifwo yami hinashihila akwa kutewula mapanga jami ngukayihane kuli malunga amwe Chanyingikine kuze anakatuka, nyi?

¹² Chocho akweze ja David yakatukako; yeza; yamwambulwila yeswe.

¹³ David yamba kuli malunga jenyi ngwenyi, Mutu mweswe alipakate katana kenyi. Malunga eswe alipakachile tutana two. Ni David neye walipakachile katana kenyi. Ngwe kulakaji awana a malunga akawile David. Kulakaji aali asalile ni yikwata.

¹⁴ Alioze umwe mukweze yambulwila Abigale pwo lia Nabale ngwenyi, David katumanga mu puya tunganda akameneke mwata wetu alioze iye yaachoka.

¹⁵ Alioze wano malunga atulingile chipema chikolo; kutwamwene chipi; shimbu tuchili mu minda nichimwe chuma chatutokele chakuhi shimbu twendele hamwe no.

¹⁶ Apwile ngwe chipanga cha kutufunga ufuku ni mwalwa shimbu twendele no nikufunga mapanga.

¹⁷ Kashika nyingika chuma chino unyonge chize mulinga, mumu kananyongo kulinga chuma chikalu kuli mwata wetu ni kuli akwa zuwo lienyi eswe se niumwe mahasa kuhanjika nenyi mumu ha kupiya chenyi.

¹⁸ Mba Abigale fuji-fuji yanda kulakaji aali a mbolo, ni tuku jiali ja vinyu, ni mapanga atano a kuhangula kulu ni njongo jitano ja mbuto yumu, ni kulakaji lia yichakata ya uva jumu, ni kulakaji aali a yandanda ya makuyu, ayo yeswe yayisa ha yimbulu.

¹⁹ Yamba kuli akweze jenyi ngwenyi, Tetekelenu; ngunanukaula. Alioze kalwezele lunga lienyi Nabale.

²⁰ Shimbu te kanende ha chimbulu nikupalumukina mushi lia mulundu, kumanyi David ni malunga jenyi kaneza mu sali, yatakana no.

²¹ David te hamba ngwenyi, Pundu nafungile yuma yeswe ya yono lunga mu puya, nichimwe chamutokele chakuhi. Alioze kuchamulumbunukine; hananguhilwisa yipi ha yipema yami.

²² Ha chimenemene nyi hinamuhichika chipwe lunga umuwika wa kuli atu jenyi eswe, Zambi chocho angulinge nikuwezaho nawa.

²³ Ha kumona David Abigale yalipupwisa kusunuka ha chimbulu. Yafulamana kumeso ja David nikuhetamina hashi.

²⁴ Yafulamana ku yiliato yenyi nikwamba ngwenyi, Mwene wami, we uhenge ukapwe hali yami wika. Ngutayize kama, yami kavumbi kenu, nguhanjike mu matwi jenu. Panjikenu kama ku maliji a yami kavumbi kenu.

²⁵ Mwene wami kanda nunyonga yono mukwa kupiya Nabale. Nikulita ni jina lienyi chocho apwa. Jina lienyi Nabale mba uhepuke kali nawo. Alioze yami kavumbi kenu chamwene akweze ja mwene wami aze nwatumanga.

²⁶ Kashika, mwene wami, ni mwono wa Yehova ni mwono wa yenu nawa, se Yehova hananukwika ku uhie wa manyinga nukalikale ni kwoko lia yenu mwene, kashika akwa kole jenu ni waze eswe anazange kulinga chipi kuli yenu mwene wami, akapwe ngwe Nabale.

²⁷ Mulambu uno yami kavumbi kenu hinaneha kuli yenu mwene wami akauhane kuli akweze wano akunukaula mwene wami.

²⁸ Konekenenu kama mulonga wa yami kavumbi kenu, mumu pundu Yehova makakolesa zuwo lia yenu mwene wami. Mumu yenu mwene wami nunase jita hali Yehova; chipi kechi kachiwana muli yenu matangwa eswe a mwono wenu.

²⁹ Nyi malunga makatuka akanuhange, akanushihe, hindu mwono wa mwene wami muukapwa wa kukashila mu chichita cha akwa mwono wa kufunga kuli Yehova Zambi yenu. Alioze mwono wa akwa kole jenu makaumbila ngwe kakukonga liwe mu chikapa cha kukonga nacho mawe.

³⁰ Mba muze Yehova halinga kuli yenu nikulita ni yipema yeswe hanambe hali yenu, hanupwisa mwanangana wa Izalele

³¹ mwene wami kechi kapwa ni chinyengo hanji kupinda mu mbunge mumu ha kumwanga manyinga chitela chakuhi, hanji ha kulikala yenu mwene. Mba muze Yehova halinga kanawa ni mwene wami, hinungwiwulukenu yami kavumbi kenu.

³² David yamba kuli Abigale ngwenyi, Yehova Zambi ya Izalele afumane yoze wakutumanga kungupatwiza.

³³ Mana je akawahe, ni yena mwene Ukawahe wangukwikanga ku uhie wa manyinga ha kulikala yami mwene ni kwoko liami.

³⁴ Mumu ni mwono wa Yehova Zambi ya Izalele, yoze kangutayijile kukulinga chipi, nyi kachi kwatambukile kungupatwiza, pundu lume kachi ha kucha kukwasalile kuli Nabale chipwe lunga umuwika.

³⁵ Mba David yatambula kuli iye yuma yize amunehenene. Yamba kuli iye ngwenyi, Uye kanawa ku zuwo lie. Hinapanjika liji lie, hinakutayiza.

³⁶ Abigale wejile kuli Nabale, iye te halinga muzumbu mu zuwo lienyi, ngwe muzumbu wa mwanangana. Mbunge ya Nabale te yinawahilila chinji mumu kanazengewa chikolo. Kashika kamulwezele nichimwe ndo hikwacha.

³⁷ Mukwacha chimene muze vinyu hiyamwecha pwo lia Nabale yamulweza yino yuma, mba mbunge yenyi yiyifwa muchima lienyi, iye yalumuka ngwe liwe.

³⁸ Kwapalikile kumi lia matangwa mba Yehova yalamba Nabale, yafwa.

³⁹ Muze David yevwa ngwo, Nabale hafwa, iye yamba ngwenyi, Kawaha Yehova yoze hafwetesa sau lize natambwile kuli Nabale, kangutayijile yami kavumbi kenyi kulinga chuma chipi. Yehova hanahilwisa yipi ya Nabale ha mutwe wenyi mwene. Mba David yatuma akatende Abigale akapwe pwo lienyi.

⁴⁰ Muze tuvumbi twa David haheta kuli Abigale ku Karmela, yamba kuli iye ngwo, David hatutuma kuli yena tukakutende uye kuli iye ukapwe pwo lienyi.

⁴¹ Iye yakatuka, yahetamina hashi, yamba ngwenyi, Yami kavumbi kenu nguli ngamba wa kusanyisa yiliato ya ngamba ja mwene wami.

⁴² Abigale yatambuka hamwe ni tuvumbi twenyi a mapwo atano, yanyina ha chimbulu, yakaula tuvumbi twa David. David yamumbata.

⁴³ David yatambula nawa Ahinoame Ka-Yezerele mba eswe aali apwile mapwo jenyi.

⁴⁴ Saulu te hahana mwanenyi Mikale pwo lia David kuli Palti mwana wa Laishe wa ku Ngalimi.