1 Samuel 24 - MUKANDA USANDU WA ZAMBI 1975

¹ Muze Saulu hahanga A-Filistea hahiluka, yamulweza ngwo, David mu puya ya Engedi ali.

² Mba Saulu yasanyika tununu atatu a malunga a kusakula kuli A-Izalele eswe, yaya kufupa David ni malunga jenyi kulutwe lia Yimawe ya Pembe-a-muyambu.

³ Mu jila yaheta ku malimba a mapanga kuze kuli chivwenge mba Saulu yanjilamo kutwama hashi. David ni malunga jenyi te kanatwama mwe muchima lia chivwenge.

⁴ Malunga a David yamba kuli iye ngwo, Lino lie tangwa Yehova wambile ngwenyi, Mungukunjika mukwa kole ye kuli yena mba muhasa kumulinga cheswacho chinakupemena. David yakatuka, yateta ku lupula wa hina lia Saulu, iye kachinyingikine.

⁵ Alioze kulutwe David yalikonyeka mu mbunge mumu hateta lupula wa hina lia Saulu.

⁶ Yamba kuli malunga jenyi ngwenyi, Yehova angukanjise kulinga chuma chino kuli mwata wami wa kuwayisa ni maji kuli Yehova, ngwolole kwoko liami kulimika nenyi, se Yehova hananuwayisa.

⁷ Chocho ni maliji wano David wakunwine malunga jenyi. Kaatayijile kulamba Saulu. Mba Saulu yakatuka, yatuhuka mu chivwenge; yaya kwenyi.

⁸ Kulutwe David yakatuka nawa, vatuhuka mu chivwenge, yasanyika Saulu ngwenyi, Mwene wami, mwanangana! muze Saulu watalile kunyima David yahetamina hashi nikumulemesa.

⁹ David yamba kuli Saulu ngwenyi, Kuchi te nwakupanjika maliji a waze akwamba ngwo, David kakuzanga kunulinga chipi?

¹⁰ Ngwami musono meso jenu hamona chize Yehova wanukujikanga mu moko jami mu chivwenge. Amwe angushinjikanga ngunushihe, alioze chanushihile. Nambanga ngwami, Chichi kwolola kwoko liami kulimika ni mwene wami mumu hanamuwayisa kuli Yehova.

¹¹ Tala tata! tala lupula wa hina lienu mu kwoko liami. Natetanga lupula wa hina lienu, chanushihile kashika munuhasa kunyingika ni kumona ngwenu, Mu moko jenyi kumwatwamine chipi hanji Utanguko. Enu nwakunguhanga nungushihe; ami chanuvulumwine.

¹² Yehova apatule hakachi ka yami ni yenu. Yehova angukale hali yenu. Alioze kwoko liami kulichi kulimika ni yenu.

¹³ Ngwe chishima cha makulwana ngwo, Muli chingulungulu mwatuhuka ungulungulu. Alioze kwoko liami kulichi kulimika ni yenu.

¹⁴ Mwanangana wa Izalele nunahange iya? Yoze nunamuhange iya? Hanji kawa yoze hanafu nyi? Hanji kachipu?

¹⁵ Kashika Yehova apatule akatwehe upatwilo hakachi ka yami ni yenu, achimone, anguhakwile, angupulule kuli yenu.

¹⁶ Muze David hamana kuhanjika maliji wano kuli Saulu, Saulu yamba ngwenyi, Alio liji lia yena mwanami David nyi? Saulu yalila mbimbi.

¹⁷ Yamba kuli David ngwenyi, Wanguhiana ni ululi, mumu yami nakukulinga yipi, ena wakungulinga yipema.

¹⁸ Musono hiwangulweza chize wangulinga yipema, se kwangushihile muze Yehova wangukunjikanga mu moko je.

¹⁹ Mumu te mutu mecha mukwa kole yenyi akaye ni mwono nyi hamuwana? Chizechene Yehova akakufwetele yipema yino wangulinganga musono.

²⁰ Chikwo nawa ngunanyingika ena kumuopwa mwanangana mba wanangana wa Izalele muukola mu kwoko lie.

²¹ Kashika ulishinge kuli yami ni jina lia Yehova kuchi kujimisa munyachi wami meza kusemuka; kuchi kujimisa jina liami mu munyachi wa tata.

²² David yalishinga chocho kuli Saulu. Mba Saulu yaya ku zuwo lienyi alioze David ni malunga jenyi akandukile ku mbonge yo.