1 Samuel 23 - MUKANDA USANDU WA ZAMBI 1975

¹ Yalweza David ngwo, A-Filistea anase jita ni A-Kela. Kanapupu yizungwilo.

² Kashika David yahula Yehova ngwenyi, Nguye ngukase jita ni A-Filistea, nyi? Yehova yamba kuli David ngwenyi, Yako ukase jita ni A-Filistea ukalamwine A-Kela.

³ Alioze malunga a David yamba kuli iye ngwo, Kafwa muno mu Yunda tunevu woma, mba kuya ku Kela tukase jita ni maswalale a A-Filistea ngwetu chahiana woma.

⁴ David yahula Yehova cheka nawa mba Yehova yamukumbulula ngwenyi, Katuka, palumuka ku Kela mumu mungukunjika A-Filistea kuli yena.

⁵ Kashika David ni malunga jenyi ayile ku Kela; yasa jita ni A-Filistea; yapupa ngombe jo nikushiha anji hakachi ko. Chocho David yapulula A-Kela.

⁶ Muze Abiatare mwana wa Ahimeleke wachinyinyine kuli David ku Kela, wayile ni efode mu kwoko.

⁷ Saulu hevwa ngwo, David hanjila mu Kela mba Saulu wambile ngwenyi, Zambi hanamukunjika kuli yami mumu ha kunjila mu chihunda cha yajilo ni njalo iye haliajilila.

⁸ Saulu yasanyika tujita eswe akaye ku Kela akaseleke David ni malunga jenyi.

⁹ David yanyingika ngwenyi, Saulu chipi kananguhalila mba yamba kuli sasendote Abiatare ngwenyi, Neha efode kuno.

¹⁰ Mba David yamba ngwenyi, Yehova Zambi ya Izalele, yami kavumbi ke hinevwa pundu ngwo, Saulu kaneza ku Kela akapupe chihunda ha mukunda wa yami.

¹¹ Malunga a Kela mangukunjika kuli iye? Saulu meza chizechene ngwe yami kavumbi ke hinevwa? Yehova Zambi ya Izalele, ngunaliumbu, ungulweze kama yami kavumbi ke. Yehova yamba ngwenyi, Kumeza.

¹² Mba David yamba ngwenyi, Malunga a Kela mangukunjika ni atu jami kuli Saulu? Yehova yamba ngwenyi, Kumakukunjika.

¹³ Kashika David ni malunga jenyi, ngwe kulakaji asambano yakatuka ni kuhichika Kela, yachinyina kweswako ahashile. Muze Saulu hevwa ngwo, David hanachina ku Kela, yalitwamina kuyako.

¹⁴ David Watwamine mu mbonge jenyi mu puya, hakachi ka milundu ya mu puya ya Zife. Saulu wamufupile matangwa eswe alioze Zambi kamukunjikile kuli iye.

¹⁵ David yevwa woma mumu Saulu hatuhuka nikufupa kumushiha. David te achili mu puya ya Zife mu usaki.

¹⁶ Jonatas mwana Saulu yakatuka yaya kuli David mu usaki nikumutakamisa muli Zambi.

¹⁷ Ngwenyi, Kanda wivwa woma mumu tata Saulu kechi kukuwana. Yena kumukapwa mwanangana wa Izalele ni yami mungukuhata ha kota. Ni tata Saulu kanachinyingika.

¹⁸ O aali akolesele usendo kumeso ja Yehova. David yasala mu usaki; Jonatas yaya ku mahio.

¹⁹ Hohene A-Zife yaya kuli Saulu mu Ngibia ngwo, David kanaswame hakachi ketu mu mbonge ja mu usaki ha mulundu wa Hachila ku Sule ya Njeshimone.

²⁰ Palumukenu mwanangana nikulita ni upale wa mbunge ye. Muchipwa kuli yetu kumukunjika kuli yena mwanangana.

²¹ Saulu yamba ngwenyi, Akanuwahise kuli Yehova mumu hinwanguvwila keke.

²² Yénu nukase chinyingi kanawa, nukamone chiswamo chenyi, ni waze hamumonako, mumu ngunevu ngwo, Wahiana kukanyama.

²³ Talenu kashika nukase chinyingi kweswe akuswamina nwize nungulweze chinyingi pundu. Mba munguya ni yenu, mba nyi mwali mu chifuchi mungumuwana, chipwe hakachi ka tununu eswe a A-Yunda.

²⁴ O yakatuka, yatetekela Saulu ku Zife. David ni malunga jenyi o apwile mu puya ya Mayone ku Arapa ku Sule ya Njeshimone.

²⁵ Saulu ni malunga jenyi ayile nikumufupa. Yachilweza kuli David kashika iye wayile ku luliwe luze luli mu puya ya Mayone. Muze Saulu yachivwa yakaula David mu puya ya Mayone.

²⁶ Saulu yapalikila sali limwe lia mulundu, ni David ni malunga jenyi ha sali likwo lia mulundu. David te kanalipupwisa kuchina Saulu shimbu Saulu ni malunga jenyi machimuseleka amukwate.

²⁷ Kumanyi kanganda yaheta kuli Saulu ngwenyi, Tambukenu nwize mumu A-Filistea hanjila mu chifuchi.

²⁸ Mba Saulu yahiluka; kakawile nawa David; yaya kulimika ni A-Filistea. Kashika alukile kuma kuze ngwo, Liwe lia ulamwino.

²⁹ David yakatukako yatwama mu mbonge ja mu Engedi.