1 Samuel 22 - MUKANDA USANDU WA ZAMBI 1975

¹ Kashika David yakatukako yaya ku chivwenge cha Ndulame, mba muze ayayo ni akwa zuwo lia tato eswe achivwile ayileko kuli iye.

² Ni mweswe mukwa lamba, ni mweswe mukwa makongo, ni mweswe wevwile kupiha akungulukilile kuli iye, mba iye wapwile kapitau ko. Wapwile no kulakaji awana a malunga.

³ David yakatukako yaya ku Mizepa mu Moape. Yamba kuli mwanangana wa Moape ngwenyi, Tayiza kama tata ni mama atwame ni yenu ndo mungunyingika chize Zambi mangulingila.

⁴ Yaahichika ni mwanangana wa Moape, o kwenako atwamine shimbu lieswe David wapwile mu mbonge yenyi.

⁵ Aho profeta Ngate wambile kuli David ngwenyi, Kanda utwama mu mbonge ye. Katuka uye ku chifuchi cha Yunda. Chocho David yaya ndo ku usaki wa Herete.

⁶ Saulu yevwa ngwo, Hawana David ni malunga aze ali no hamuwika. Saulu te kanatwama mu Ngibia mushi lia mutondo mu Rama, kunga lienyi mu kwoko ni atu jenyi kanamujingilika.

⁷ Saulu yamba kuli atu jenyi waze anamujingilika ngwenyi, Panjikenu enu A-Mbenjamine. Yono mwana Yese manwaha eswe minda ni mitondo ya uva, nyi? Manupwisa eswe akwa kuyula tununu ni akwa kuyula makulakaji,

⁸ kashika eswe hinwangutwama punga, nyi? Nyi mwanami hakolesa usendo ni mwe mwana Yese, niumwe mangulwezacho. Nyi mwanami mavundula kavumbi kami kumujikinyina ngwe analingi musono, niumwe manguvwila kama vumbi wakuhi angulwezecho.

⁹ Mba Doege Ka-Endome kanamana hamwe ni atu ja Saulu yamba ngwenyi, Ami namwene mwe mwana Yese maheta ku Nobe kuli Ahimeleke mwana wa Ahitube.

¹⁰ Mba Ahimeleke yahula Yehova hali iye nikumwaha ya kulia ni katana ka Ngoliate Ka-Filistea.

¹¹ Mwanangana yatuma kusanyika sasendote Ahimeleke mwana wa Ahitube ni akwa zuwo lia tato eswe, asasendote aze apwile ku Nobe. Eswe yaheta kuli mwanangana.

¹² Saulu yamba ngwenyi, Panjika ena mwana Ahitube. Iye yamba ngwenyi, Yami uno mwane.

¹³ Saulu yamba kuli iye ngwenyi, Kuchi te hiwangutwama punga, yena ni mwe mwana Yese, hiunamwehe kulia ni katana, hiunahula kuli Zambi hali iye chocho hanangukatukila kungujikinyina ngwe analingi musono?

¹⁴ Ahimeleke yakumbulula kuli mwanangana ngwenyi, Mba hakachi ka tuvumbi twenu eswe, mutu wa jika iya ngwe tatenu-weno David, kanda kapitau ka akwa kufunga mwanangana, kanda mulemu mu zuwo lienu?

¹⁵ Te musono nalianga kuhula kuli Zambi hali iye nyi? Hi chocho ko! Mwanangana, kanda nungwaha mutonga yami kavumbi kenu hanji kuli wano eswe akwa zuwo lia tata. Yami kavumbi kenu te Chanyingikine nichimwe cha yuma yino yeswe, chipwe chinene chipwe chikepe.

¹⁶ Alioze mwanangana ngwenyi, Ena Ahimeleke kumuofwa ni eswe akwa zuwo lia tatenu.

¹⁷ Mwanangana yamba kuli tulayi aze amujingilikile ngwenyi, Tewulukenu nushihe asasendote a Yehova mumu moko jo hamuwika ali ni David. Anyingikine ngwo, Kanachina hindu kangulwezelecho. Alioze tuvumbi twa mwanangana katayile kwolola moko jo kushiha asasendote a Yehova.

¹⁸ Mba mwanangana yamba kuli Doege ngwenyi, Tewuluka yena Ushihe asasendote. Doege Ka-Endome yatewuluka yashiha asasendote. Ha tangwa lize yashiha makumi nake a atu ni atu atano, eswe te akwa kuzala efode ya hina litoma lipema.

¹⁹ Ni Nobe nawa chihunda cha asasendote yashiha ni katana; ni malunga ni mapwo, ni ana ni akwa kwamwa, ni ngombe, ni yimbulu ni mapanga. Eswe yaashiha ni katana.

²⁰ Alioze mwana umuwika wa Ahimeleke mwana Ahitube jina lienyi Abiatare yalilamwina, yachinyina kuli David.

²¹ Abiatare yalumbununa kuli David chize Saulu hashiha asasendote a Yehova.

²² David yamba kuli Abiatare ngwenyi, Nachinyingikine tangwa lize muze namwene Doege Ka-Endome kwali, ngwami, Mambulwila Saulu. Hinashihisa atu eswe a ku zuwo lia tatenu.

²³ Twama ni yami. Kanda wivwa woma, mumu yoze unafupu kukushiha kanafupu kungushiha yami nawa. Hamwe ni yami makakufunga kawape.