1 Samuel 21 - MUKANDA USANDU WA ZAMBI 1975

¹ David yaheta ku Nobe kuli sasendote Ahimeleke. Ahimeleke yapatwiza David nikuchikima. Yamba kuli iye ngwenyi, Kuchi te uneza ukawe, kushi ninyumwe mukwenu?

² David yamba kuli sasendote Ahimeleke ngwenyi, Mwanangana hangwaha milimo yimwe alioze hangwamba ngwenyi, Kanda ulweza niumwe pande jino ngunakutumina hanji milimo yino ngunakwehe. Hinalilakenya ni akweze kutakana kumwe kuma.

³ Kashika, chika nuli nacho? Penu mbolo jitano hanji cheswacho chiliko.

⁴ Sasendote yakumbulula kuli David ngwenyi, Chishi ni mbolo jeswajo alioze mbolo jisandu nguli najo, kachi akweze halifunga ku mapwo.

⁵ David yakumbulula kuli sasendote ngwenyi, Pundu, kutwalimwene ni mapwo, ngwe matangwa wano atatu a kwenda mu wenyi mba yikwachilo ya akweze yisandu. Chikwo nawa je mbolo japwa ngwe jeswajo se musono masalakanyisa jikwo jisandu mu yikwachilo.

⁶ Kashika sasendote yamwaha mbolo jisandu mumu kapwile ni jikwo shina ja kutumbieka jize hachiza kumeso ja Yehova muze masako mbolo ja kahia kusalakana jikwo.

⁷ Alioze tangwa lize kwapwile umwe ngamba ya Saulu, te hamukwikako kumeso ja Yehova; jina lienyi Doege Ka-Endome. Iye mukwa lutwe hakachi ka tufunga twa Saulu.

⁸ David yamba kuli Ahimeleke ngwenyi, Kushi ni kunga hanji katana hakamwihi? Chambachile katana kami chipwe yitwa yami mumu mu milimo ya mwanangana chayitamba kulinga fuji.

⁹ Sasendote ngwenyi, Katana ka Ngoliate Ka-Filistea yoze washihile mu chikulo cha Ela tuli nenyi wa kuvunga mu hina kunyima lia efode. Nyi unazange kumbata yoze, mumbate mumu mukwo kutushi nenyi kuno. David ngwenyi, Kukushi mukwo walita nenyi; penuye!

¹⁰ David yakatuka tangwa lize; yachina Saulu; yaya kuli Akishe mwanangana wa Ngata.

¹¹ Alioze ngamba ja Akishe yamba kuli iye ngwo, Au hi David ko mwanangana wa chifuchi? Ngwetu mwenawo embilile nikutawiza ha kuhangana cho ngwo, Saulu hashiha tununu twenyi; David hashiha makumi jenyi a tununu.

¹² David yapachika maliji ano mu mbunge, yavwila woma Akishe mwanangana wa Ngata.

¹³ Chocho yalumuna kwenda chenyi kumeso jo; yalionga kuzaluka hakachi ko; yasonyekasonyeka ha yajilo ya chikolo. Yazulumuna yileji ha wevu wenyi.

¹⁴ Mba Akishe yamba kuli ngamba jenyi ngwenyi, Nunamono yono lunga kanazaluka. Kuchi te nwamunehene kuli yami?

¹⁵ Te yizaluke chishi no, kashika nwanehene yono akapwe chizaluke kumeso jami nyi? Kechi kunjila mu zuwo liami.