1 Samuel 20 - MUKANDA USANDU WA ZAMBI 1975

¹ Mba David yachina ku Naiote mu Rama yeza kuli Jonatas nikwamba ngwenyi, Yika nalinga? Chitela chami chika? Mulonga wami uka kumeso ja tatenu, kanazange kungushiha?

² Iye yamukumbulula ngwenyi, Hi chocho ko. Kuchi kufwa. Tata kechi kulinga nichimwe, chipwe chinene chipwe chikepe, ndo mangulweza. Kuchi te tata manguswekela chuma chino? Kuchapwile chocho.

³ Alioze David yalishinga ngwenyi, Tatenu kananyingika kanawa hinawana vumbi kumeso je kashika kananyongo ngwenyi, Jonatas kanda anyingika chino, kuchina mevwa kupiha. Alioze pundu, ni mwono wa Yehova ni mwono wa yena shimbo yimuwika yili hakachi ka yami ni kufwa.

⁴ Mba Jonatas yamba kuli David ngwenyi, Cheswacho muwamba mungukulingila.

⁵ David yamba kuli Jonatas ngwenyi, Tala, hamene tangwa lia kakweji mwaha, kuchangutambile kuhona ku mesa ya mwanangana. Alioze ngutayize nguye nikuswama mu yambu ndo tangwa liamuchitatu ha ngoloshi.

⁶ Nyi tatenu mamona chishiko, amba ngwe, David waliumbile kuli yami akazomboke ku Mbeteleme ku mahio, mumu malambula milambu ya mwaka ha mwaka ya usoko wo eswe.

⁷ Nyi mamba ngwenyi, Chipema! mba muchipwa sambukila kuli yami kavumbi ke. Alioze nyi matenuka nyingika kanawa, chipi anangunyongena.

⁸ Kashika ngulingile vumbi, yami kavumbi ke mumu hiunakolesa usendo wa Yehova ni yami kavumbi ke. Alioze nyi chitela nguli nacho, ngushihe yena mwene. Kuchi te mukangutwa la kul tatenu?

⁹ Jonatas yamba ngwenyi, Chikapwe kusuku ni yena! Nyi nanyingika ngwami, Tata kanakuhalila chipi, kachi chakulwezele, nyi?

¹⁰ David yamba kuli Jonatas ngwenyi, Iya mangulweza nyi tatenu makukumbulula ni utenu?

¹¹ Jonatas yamba kuli David ngwenyi, Tuyenu mu yambu. Chocho atuhukile hikuya mu yambu.

¹² Jonatas yamba kuli David ngwenyi, Yehova Zambi ya Izalele apwe chela. Muze hineseka tata, ngwe ola yino yene hamene hanji tangwa liamuchitatu nyi kanevu kuwaha ni David, mungukulweza.

¹³ Alioze nyi tata mazanga kukulinga chipi Yehova achilinge kuli yami Jonatas nikuwezaho nawa nyi chakulwezelecho nikukushika ukaye ni sambukila. Yehova akapwe ni yena chizechene ngwe hapwa ni tata.

¹⁴ Shimbu nguchili ni mwono ungulweze utu wa zango lia Yehova, kanda ngufwa.

¹⁵ Alioze kanda uteta utu we kuli akwa zuwo liami ndo ku miaka ya mutolo. Muze Yehova matetaho akwa kole eswe a David hano hashi

¹⁶ kanda utayiza kuteta jina lia Jonatas ku zuwo lia David. Yehova akalambe akwa kole a David.

¹⁷ Jonatas yashingisa David nawa ha zango lienyi mumu wamuzangile chizechene ngwe wazangile mwono wenyi mwene.

¹⁸ Jonatas yamba kuli iye ngwenyi, Hamene tangwa lia kakweji mwaha. Makufupa mumu chitwamo che muchipwa chamokomoko.

¹⁹ Mba ha tangwa liamuchitatu makufupa chikolo. Henaho muoya kuma kuze waswamine ha tangwa lia pande jino ukatwame ku liwe Ezele.

²⁰ Ami mungukonga mivu yitatu hakamwihi ni liwe ngwe ngunase chimwe chuma.

²¹ Mba mungutuma mukweze ngwami, Yako wande mivu. Nyi mungwamba kuli mukweze ngwami, Tala mivu yili kuno kanda, anda, mba tweya yena mumu, ni mwono wa Yehova, sambukila yili kuli yena ni Utoji wakuhi.

²² Alioze nyi mungutuma mukweze ngwami, Tala mivu yili kuze kanda, hiyako mumu Yehova hakutuma.

²³ Alioze ha kutwala ku chuma chino hitwamba yena ni yami, ngwami Yehova kwali hakachi ka yena ni yami ku miaka ya mutolo.

²⁴ Chocho David waswamine mu yambu, mba muze kakweji mwaha hasoloka mwanangana yatwama kutambula kulia.

²⁵ Mwanangana yatwama ha chitwamo chenyi ngwe matangwa eswe, ha chitwamo ku yishimi. Jonatas yakatuka. Abenere te kanatwama ku lumbu lia Saulu alioze chitwamo cha David chamokomoko.

²⁶ Hindu Saulu tangwa lize kambile nichimwe, mumu yanyonga ngwenyi, Chimwe chuma chamuwana. Kapemene; pundu kapemene.

²⁷ Alioze ha tangwa liamuchiali, lia kukaula kakweji mwaha, chitwamo cha David chapwile chamokomoko. Mba Saulu yamba kuli mwanenyi Jonatas ngwenyi, Kuchi te mwana Yese kejile kutambula kulia, chipwe zau chipwe musono?

²⁸ Jonatas yakumbulula Saulu ngwenyi, David yangwita lisensa ya kuya ku Mbeteleme,

²⁹ ngwenyi, Ngutayize kuya mumu usoko wetu kakulambula milambu mu chihunda mba yaya hangwamba ngwenyi, Chakutamba kupwako. Kashika nyi munguvwila vumbi ngutayize kuya ngukamone ayaya. Kashika kejile ku mesa ya mwanangana.

³⁰ Mba Saulu yatenukina chikolo Jonatas. Yamwamba ngwenyi, Ena mwana wa chihulia cha pwo mukwa kupiya. Te Chanyingikine hiunatongola mwe mwana Yese chikapwe sonyi ja yena ni ja uselesele wa noko, nyi?

³¹ Mumu shimbu mwe mwana Yese matwama ni mwono hano hashi yena kuchi kakola, chipwe wanangana we. Kashika tuma umusake mumu mafwa lume.

³² Jonatas yakumbulula kuli tato Saulu ngwenyi, Kuchi te mamushiha? Yika alinga?

³³ Alioze Saulu yakonga kunga amwase, kashika Jonatas hanyingika ngwenyi, Tata hasa mbunge yenyi kushiha David.

³⁴ Jonatas yakatuka ku mesa nikutenuka chikolo. Kalile kulia ha tangwa liamuchiali lia kakweji mumu ha chinyengo cha David mumu tato hamukolesa sonyi.

³⁵ Chimenemene Jonatas wayile mu yambu kuze halilakenya ni David; yaya ni mukweze.

³⁶ Yamba kuli mukweze ngwenyi, Zomboka Ukande mivu mungukonga. Shimbu mukweze mazomboka yakonga mwivu kuze kanda.

³⁷ Muze mukweze maheta kuze kwaholokela mwivu Jonatas yatambika ngwenyi, Mwivu kuze kanda.

³⁸ Yatambika nawa kuli mukweze ngwenyi, Zomboka, tambuka, kanda ulaluka. Mba mukweze wa Jonatas yanda mivu yayineha kuli kako.

³⁹ Alioze mukweze kanyingikine nichimwe, Jonatas ni David ayo wika anachinyingika.

⁴⁰ Jonatas yahana yitwa yenyi kuli mukweze ngwenyi, Uyitwale ku chihunda.

⁴¹ Muze mukweze haya David yakatuka ku liwe sali lia ku Sule, yafulamana hashi nikuhetama katatu. Yalimbeja, nikulila umwe ni mukwo alioze David wahianyine.

⁴² Jonatas yamba kuli David ngwenyi, Uye kanawa, se etu eswe ni aali hitwalishinga ni jina lia Yehova ngwetu, Yehova mapwa hakachi ka yami ni yena ni hakachi ka chisemuko cha yami ni chisemuko cha yena ndo ku miaka ya mutolo. David yakatuka yaya. Jonatas wayile mu limbo.