1 Samuel 2 - MUKANDA USANDU WA ZAMBI 1975

¹ Mba Hana walembele ngwenyi, Mbunge yami yinawahilila muli Yehova, mbinga yami yazunduka muli Yehova. Kanwa liami hiliatoha helu lia akwa kole jami, mumu ngunawahilila mu ulamwino we.

² Niumwe wapwa musandu ngwe Yehova, mumu mukwo wakuhi ndo yena wika. Liwe likwo liakuhi ngwe Zambi yetu.

³ Kanda nuhanjika nawa nikulengumuka kuhiana. Kanda nulivwimba mu makanwa jenu. Mumu Yehova iye Zambi ya yinyingi, iye kakupezalisa yitanga.

⁴ Mata ja malunga a ndundo hanamakuka. Waze endele nikutalinga hanalijichikila tachi.

⁵ Waze akuchile halilinga ngamba a kulingila kulia, alioze waze evwile zala kayivwile nawa. Ewa mumba hasema shimbiali, alioze mukwa ana anji hahonga.

⁶ Yehova kakushiha; kakupwisa ni mwono. Kakupalumwisa ku Shiole; kakukandwisa nawa.

⁷ Yehova kakupwisa mutu chiswale; kakupwisa pichi. Kakununguna mutu; kakumuzundula.

⁸ Kakuchiza chiswale ku fufuta; kakuchiza mukwa kuhona hakachi ka chichilila cha uto nikumunangamisa akatwame hakachi ka alemu, akaswane ngunja ya ulemu. Mumu manguji a hashi a mbala a Yehova, mba iye hakoleselaho he hashi.

⁹ Kumakafunga molu ja asandu jenyi, alioze kumakaholesa yingulungulu mu milima, mumu atu keshi kukumba ku tachi jo.

¹⁰ Waze malitachika ni Yehova kumakamakwoka tuyipinji; malimika no nikukulunguza mwilu. Yehova makapatwila masongo a hashi. Makahana tachi kuli mwanangana wenyi; makazundula mbinga ya yoze hamuwayisa ni maji.

¹¹ Elekana wayile ku zuwo lienyi ku Rama, alioze mwe mwana wavumbikile Yehova kumeso ja sasendote Eli.

¹² Ana ja Eli o apwile atu amokomoko. Kanyingikine Yehova.

¹³ Ha kutwala kuli atu ndako ja asasendote jino, muze mutu walambwile chitapo ngamba ya sasendote wejile ni lungarfu lwa misako yitatu mu kwoko lienyi shimbu machiteleka ye yifwo;

¹⁴ yalunjisa mu yifwo yili mu chikango, hanji mu ndeho, hanji mu ndeho ya kwochela yifwo hanji mu chikwachilo chikwo. Yifwo yeswe yakwata ku misako hi ya mbala ya sasendote. Chocho alingile mu Shilo kuli A-Izalele eswe aheteleko.

¹⁵ Chipwe shimbu kandocha e maji, ngamba ya sasendote wejile, yamba kuli mukwa kulambula ngwenyi, Neha yifwo ya kwochela sasendote, mumu keshi kutambula yifwo ya kuteleka. Kanazange ya wisu.

¹⁶ Nyi mwe lunga mamba ngwenyi, Aliange kwocha e maji mba mutambula yize yeswe unazange, makumbulula ngwenyi, Hi chocho ko. Ngweheyo haliapwila. Nyi ka, munguyitambula ni tachi.

¹⁷ Kashika mulonga wa wano akweze wapwile unene chikolo kumeso ja Yehova mumu mulambu wa Yehova te hiwalumuka chizelwokeso kuli atu.

¹⁸ Alioze Samuel wavumbikile kumeso ja Yehova, achili mwana, wakulijichikila efode ya hina litoma lipema.

¹⁹ Chikwo nawa mwaka ha mwaka naye wamutongelele kachikuto nikumunehenako muze ayile hamwe ni mukwolunga mukulambula chitapo cha mwaka ha mwaka.

²⁰ Eli yawahisa Elekana ni mukwopwo ngwenyi, Yehova akwehe ana kuli yono pwo mumu hali yono wamuhana kuli Yehova. Chocho yaya ku mahio.

²¹ Yehova yanangisa Hana, iye yaka ufumba, yasema ana; a malunga atatu, a mapwo aali. Ni mwe mwana Samuel yatatuka kumeso ja Yehova.

²² Eli wapwile mukulwana chikolo. Iye wevwile yuma yeswe ana jenyi alingile kuli A-Izalele eswe; chize apombele ni mapwo aze avumbikile ku chikolo cha mbalaka ya chikungulwila.

²³ Yamba kuli ayo ngwenyi. Kuchi te nunalingi yuma yipwa haha? Mumu ngunevu yitanga yenu yipi kuli wano atu eswe.

²⁴ Hi chocho ko anami; mumu lufuma ngunevu hi mupema ko. Nwakuvulumwisa atu a Yehova.

²⁵ Nyi mutu mavulumuna mutu ni mukwo, ngaji mamupatwila. Alioze nyi mutu mavulumuna Yehova iya mamuhakwila? Hindu kapanjikile liji lia tato. Mumu te Yehova kanazange kwashiha.

²⁶ Alioze mwe mwana Samuel wayile nikutatuka, nikuwana vumbi kuli Yehova ni kuli atu nawa.

²⁷ Kwejile umwe mutu wa Zambi kuli Eli, yamba kuli iye ngwenyi, Yehova kanambe ngwenyi, Te chalisolwele kuli munyachi wa tatenu shimbu te achili mu Engitu mu undungo kuli atu ja Falau nyi?

²⁸ Chamusakwile hakachi ka minyachi yeswe ya Izalele akapwe sasendote yami, akakundame ku chilumbilo chami kwochela insensu, nikuzala efode kumeso jami, nyi? Chahanyine kuli munyachi wa tatenu milambu yeswe ya kahia ya A-Izalele, nyi?

²⁹ Kuchi te wakuliataliata ha chitapo chami ni ha mulambu wami nakolesele ni shimbi mu zuwo liami? Kuchi te wakulemesa ana je helu lia yami nikulitohesa ni yeswe yahiana kupema hakachi ka milambu ya atu jami A-Izalele?

³⁰ Kashika Yehova Zambi ya Izalele kanambe ngwenyi, Chamwenemwene nambile ngwami, Munyachi we ni munyachi wa tatenu kumakenda kumeso jami ndo ku miaka ya mutolo. Alioze haliapwila Yehova kanambe ngwenyi, Chikapwe kusuku ni yami, mumu waze mangulemesa ni yami mungwalemesa, alioze waze mangulelesa kumakasauka.

³¹ Muliza tangwa muze munguteta kwoko lie ni kwoko lia akwa munyachi wa tatenu. Kumuchikupwa lunga wa mukulwana mu munyachi we.

³² Mukamona mukwa kupinjisa mu zuwo liami, mu yikumba yeswe Zambi makahana kuli Izalele. Kumuchikupwa lunga wa mukulwana mu munyachi we ku miaka yeswe.

³³ Mutu wa yena chamutetele ku chilumbilo chami mapwa wa kulayisa meso je nikuvwisa chinyengo mbunge ye. Waze eswe masemukina ku munyachi we mafwa shimbu anachikolo.

³⁴ Mba chino muchipwa chilayi kuli yena, chino muchipwa kuli ana je aali a malunga, hali Hofni ni Finehase ngwami, Tangwa limuwika makafwa eswe ni aali.

³⁵ Mba mungulisolwela sasendote umwe wa jika, yoze malinga nikulita ni yize yeswe yili mu mbunge yami ni mu manyonga jami. Mungumutungila zuwo likolo. Iye mendela ndo ku miaka yeswe kumeso ja yoze hingunamuwayisa ni maji.

³⁶ Mba muchikapwa mweswe wasala wa ku munyachi we meza nikuhetamina kuli iye akatambule lumbongo wa prata ni pinji ya mbolo, nikwamba ngwenyi, Ngunaliumbu, ungusele kama milimo yimwe ya sasendote hanga ngukalie pinji ya mbolo.