1 Samuel 19 - MUKANDA USANDU WA ZAMBI 1975

¹ Saulu yahanjika ni mwanenyi Jonatas ni kuli ngamba jenyi eswe ashihe David. Alioze Jonatas mwana Saulu wazangile chikolo David.

² Jonatas yalweza David ngwenyi, Tata Saulu kanafupu kukushiha. Kashika kanyama kanawa hamene chimene ukaswame mu chiswamino chimwe.

³ Mba ami munguya ngukamane hamwe ni tata mu yambu kuze uli. Munguhanjika ni tata ha kutwala kuli yena. Nyi mungwivwa chimwe chuma mungukulweza.

⁴ Jonatas yahanjika kanawa kuli tato Saulu ha kutwala kuli David ngwenyi, Mwanangana kanda uvulumuna kavumbi ke David, se iye kakuvulumwine, ni chikwo nawa hakukwasa chikolo ni yitanga yenyi.

⁵ Mumu wanjilile mu Utoji ni kushiha mwe Ka-Filistea mba Yehova walingile kukumba chinene hali A-Izalele. Ni yena kuwachimwene, yiuwahilila, kashika kuchi te muvulumuna manyinga keshi mulonga ukashihe David, chitela chakuhi?

⁶ Saulu yapanjika ku liji lia Jonatas, yalishinga ngwenyi, Ni mwono wa Yehova, kechi kamushiha.

⁷ Mba Jonatas yasanyika David, yamulweza yuma yino yeswe. Jonatas yaneha David kuli Saulu, yatwama kumeso jenyi chizechene ngwe walingile kunyima.

⁸ Kwapwile nawa jita, mba David watuhukile ni kwasa jita ni A-Filistea. Yashiha anji chikolo, kashika yachina kumeso jenyi.

⁹ Haze hene Spiritu mupi wa kuli Yehova wejile hali Saulu shimbu machitwama mu zuwo lienyi ni kunga lienyi mu kwoko; David te kanamwimbila kalialia.

¹⁰ Saulu yeseka kumupalakenya ku yishimi ya zuwo ni kunga lienyi. Aye yalieha mba kunga yilikwata mu yishimi. David yachina, yalilamwina.

¹¹ Ufuku uze Saulu yatuma tunganda ku zuwo lia David akamutale, hanga amushihe ha chimene. Alioze Mikale, pwo lia David, yamulweza ngwenyi, Nyi kwalilamwinyine musono, hamene makushiha.

¹² Chocho Mikale yasosa David ku njanela, yachina, yalilamwina.

¹³ Mba Mikale yanda umwe kaponya yamusa ha muhela, yasa mushachilo wa wona wa pembe ku mutwe ni kumufuka ni tunyime.

¹⁴ Mba muze Saulu hatuma tunganda kukwata David iye yamba ngwenyi, Kanayiji.

¹⁵ Kashika Saulu yatuma tunganda kutala David ngwenyi, Munehenu kuli yami ni we muhela hamuwika hanga ngumushihileho.

¹⁶ Muze tunganda hanjila yawana kumanyi kaponya ha muhela ni mushachilo wa wona wa pembe ku mutwe.

¹⁷ Saulu yamba kuli Mikale ngwenyi, Kuchi te wangwonga Chichize nikwecha mukwa kole yami mba hangutusuka? Mikale yakumbulula kuli Saulu ngwenyi, Yangwamba ngwenyi, Ngweche. Ngukushihile yika?

¹⁸ David yachina, yalilamwina, yaya kuli Samuel mu Rama, yamulumbunwina yeswe Saulu amulinga. Iye ni Samuel yaya, yatwama ku Naiote.

¹⁹ Atu yambulwila Saulu ngwo, David ku Naiote ali, mu Rama.

²⁰ Saulu yatuma tunganda kukwata David. O muze hamona mbunga ya aprofeta kanaprofeteza ni Samuel kanamana mukwa lutwe hakachi ko, Spiritu ya Zambi yahulumukina hali tunganda twa Saulu no nawa aprofetezele.

²¹ Muze hambulwila Saulu yatuma tunganda akwo alioze o nawa aprofetezele. Saulu yatuma chisuho chamuchitatu, no nawa aprofetezele.

²² Mba Saulu mwene wayile ku Rama. Yaheta ku shima linene lili ku Seku. Yahula ngwenyi, Samuel ni David kulihi ali? Umwe yamulweza ngwenyi, Ku Naiote ali, mu Rama.

²³ Iye yaya ku Naiote mu Rama, mba Spiritu ya Zambi yahulumukina hali iye nawa, yaya nikuprofeteza ndo ku Naiote mu Rama.

²⁴ Iye nawa yazula mazalo jenyi, iye nawa yaprofeteza kumeso ja Samuel. Yapomba uselesele tangwa lize lieswe ni ufuku uze weswe. Kashika kakwamba ngwo, Saulu nawa hakachi ka aprofeta ali, nyi?