1 Samuel 18 - MUKANDA USANDU WA ZAMBI 1975

¹ Muze iye hamana kuhanjika ni Saulu, mbunge ya Jonatas yiyilinunga ni mbunge ya David. Jonatas yamuzanga ngwe mbunge yenyi mwene.

² Saulu yamutambula tangwa lize liene, kamutayijile kuya nawa ku zuwo lia tato.

³ Jonatas ni David akolesele usendo mumu wamuzangile ngwe mbunge yenyi mwene.

⁴ Jonatas wazulile hina lienyi lia ngungu nikulihana kuli David, ni mazalo jenyi, chipwe katana kenyi, ni uta wenyi, ni muya wenyi.

⁵ David wayile kweswako Saulu wamutumine nikulinga ni mana, mba Saulu yamusa helu lia tujita twenyi. Acho chapemenene atu eswe. Chipwe ngamba eswe a Saulu chaapemenene.

⁶ Alioze chapwile te ha kuhiluka ku kushiha Ka-Filistea mapwo atuhukile mu membo eswe a Izalele kupatwiza mwanangana Saulu nikwimba, nikuhangana, ni tumikupiela, ni kulikwiza ni yisaji.

⁷ Mapwo alitawijile umwe ni mukwo ngwo, Saulu hashiha tununu twenyi; David hashiha makumi jenyi a tununu.

⁸ Saulu yatenuka; chambo chino chamupihila. Yamba ngwenyi, Hahana kuli David makumi a tununu alioze kuli yami hahana tununu wika. Chika chamusala shina wanangana wika?

⁹ Chize ku tangwa lize Saulu yamutala.

¹⁰ Mu kucha Spiritu mupi wa kuli Zambi wejile hali Saulu ni tachi mba yaprofeteza mu zuwo. David te kanembi ni kwoko lienyi chizechene ngwe tangwa ha tangwa. Saulu kali ni kunga mu kwoko.

¹¹ Saulu yakonga kunga mumu yamba ngwenyi, Mungumupalakenya ku yishimi. David yalieha kaali kumeso jenyi.

¹² Saulu wevwilile woma wunji David mumu Yehova kwali hamuwika nenyi, hakatuka kuli Saulu.

¹³ Kashika Saulu yakatwisa David yamusa kapitau kenyi ka kanunu. Yatuhwoka yanjilanjila kumeso ja atu.

¹⁴ David walingile ni mana mu majila jenyi eswe, mba Yehova wapwile hamwe nenyi.

¹⁵ Muze Saulu wamwene ngwenyi, David kanalingi ni mana anji, yamuvwila woma.

¹⁶ Alioze A-Izalele ni A-Yunda eswe azangile David mumu watuhwokele ni kunjilanjila kumeso jo.

¹⁷ Saulu yamba kuli David ngwenyi, Tala Merabe mwanami wa mukulwana, mungukwahayo akapwe pwo lie. Chino wika, pwako chitakame chami ukashile jita Yehova. Mumu Saulu yanyonga ngwenyi, Kwoko liami kanda Ukapwa hali iye alioze achilinge A-Filistea.

¹⁸ David yamba kuli Saulu ngwenyi, Ami kuchi napwa, hanji mwono wami ni munyachi wa tata mu Izalele kuchi wapwa ngukapwe tato-weno ya mwanangana?

¹⁹ Hindu ha mwaka wa kuhana Merabe mwana wa Saulu kuli David amuhanyine kuli Adriele Ka-Meholate akapwe pwo lienyi.

²⁰ Alioze Mikale mwana wa Saulu wazangile David. Yambulwila Saulu mba chamuwahila.

²¹ Yamba ngwenyi, Mungumwahaye akapwe kambwila kuli iye. A-Filistea akalimike nenyi. Kashika Saulu yamba kuli David ngwenyi, Musono muopwa tata-weno kamuchimbule kamuchiali.

²² Saulu yatuma ngamba jenyi ngwenyi, Hanjikenu ni David ku tenga ngwenu, Tala mwanangana kanakuzange chikolo, ni ngamba jenyi eswe kanakuzange, kashika pwako tato-weno ya mwanangana.

²³ Ngamba ja Saulu yambulula maliji wano mu matwi ja David. David yamba ngwenyi, Kuli yenu te chinapu chuma chilelu kupwa tato-weno ya mwanangana, se nguli chiswale; mutu mulelu lume?

²⁴ Ngamba ja Saulu yamutwalila liji ngwo, Chocho chianambe David.

²⁵ Saulu yamba ngwenyi, Ambenu kuli David ngwenu, Mwanangana kazangile yihako yikwo shina misosha ya kulakaji lia A-Filistea akalikale hali akwa kole jenyi. Saulu kananyongo ngwenyi, David mafwa kuli A-Filistea.

²⁶ Muze ngamba jenyi halweza David maliji wano chamuwahila kanawa kupwa tato-weno ya mwanangana. Matangwa te kanda ahwa

²⁷ kashika David ni malunga jenyi yakatuka, yaya, yashiha kulakaji aali a A-Filistea. Mba David yaneha misosha yo, yayihana yeswe kuli mwanangana akapwe tato-weno ya mwanangana. Chocho Saulu wamuhele mwanenyi Mikale akapwe pwo lienyi.

²⁸ Mba Saulu yamona, yanyingika ngwenyi, Yehova kwali hamwe ni David. Chikwo nawa Mikale mwana Saulu wazangile David.

²⁹ Kashika Saulu yavwila David woma kuhiana nawa. Yapwa kuli David mukwa kole yenyi matangwa eswe.

³⁰ Mianangana ja A-Filistea matuhwokatuhwoka alioze jila yeswe atuhukile David walingile ni mana kuhiana atu eswe a Saulu. Kashika jina lienyi liafumanyine.