1 Samuel 17 - MUKANDA USANDU WA ZAMBI 1975

¹ A-Filistea yakungulwila maswalale jo ku jita. Yakungulukila ku Soko ya Yunda nikusa yilombo yo hakachi ka Soko ni Azeka mu Efesendami.

² Saulu ni malunga a Izalele akungulukile nikusa yilombo yo mu mungulunga wa Ela nikululika mikana ya jita kulimika ni A-Filistea.

³ A-Filistea amanyine ha mulundu sali limwe ni A-Izalele amanyine ha mulundu sali likwo. Kwapwile mungulunga hakachi.

⁴ Kwakatukile ku chilombo cha A-Filistea umwe chitakame jina lienyi Ngoliate wa ku Ngata; kusuha chenyi mbandu jisambano ni chihanda.

⁵ Te kali ni ngalau ya unengu ha mutwe wenyi, ni chikuto cha utale. Pezu ya chikuto chenyi tununu atano a shekele ja unengu.

⁶ Wazalile yuma ya unengu ha molu jenyi, ni kunga lia kukonga lia unengu ha yipaya yenyi.

⁷ Chikundo cha kunga lienyi chapwile ngwe nguji lia kuseleka nalio; chikungo chalio chapwile ni pezu ya kulakaji asambano a shekele ja utale. Mukwa kumumbachila lukepwe wenyi wamutetekelele.

⁸ Yamana nikukolojoka kuli maswalale a Izalele ngwenyi, Kuchi te hinwatuhuka ni kululika mikana yenu ha jita? Ami ngwami, nguli Ka-Filistea ni yenu nuli ngamba ja Saulu. Tongolenu lunga umwe hakachi kenu eze kuli yami.

⁹ Nyi mahasa kwasa jita ni yami ni kungushiha, mba yetu mutupwa ngamba jenu. Alioze nyi yami mungukumba nikumushiha mba enu munupwa ngamba jetu; munutulingila.

¹⁰ Mwe Ka-Filistea yamba nawa ngwenyi, Ngunatombo maswalale a Izalele musono uno. Ngwehenu umwe lunga tulilambe hamuwika.

¹¹ Muze Saulu ni A-Izalele eswe evwile maliji aze a Ka-Filistea alishimwokene; evwile woma wunji.

¹² David iye te mwana wa Ka-Efrata wa ku Mbeteleme-Yunda, jina lienyi Yese. Iye te kali ni ana a malunga nake, mukulwana chikolo ha matangwa a Saulu, hanakukwoka hakachi ka atu.

¹³ Anenyi atatu makulwana ayile ni Saulu ku jita. Majina ja anenyi atatu aze ayile ku jita, wano; mwe kapula-jimo Eliape, mwanakwo walihata nenyi, Abinadambe, ni wamuchitatu Shama.

¹⁴ David iye kasulasongo; atatu makulwana ayile ni Saulu.

¹⁵ David te matwama ni Saulu mba maya mukulisa mapanga a tato ku Mbeteleme akahiluke nawa.

¹⁶ Mwe Ka-Filistea wakundamine chimene ni chingoloshi nikulisolola makumi awana a matangwa.

¹⁷ Yese yamba kuli mwanenyi David ngwenyi, Anda *efa ya mbuto yumu, ni kumi lia mbolo, ukayimbate fuji kuli ayayenu ku chilombo.

¹⁸ Twala nawa kumi lia keju kuli kapitau ka kanunu ko, utale ayayenu chize atwama, ukatambule chifungo cho.

¹⁹ Ha matangwa aze te Saulu, no, ni malunga eswe A-Izalele mu mungulunga wa Ela ali, nikwasa jita ni A-Filistea.

²⁰ David yalimeneka chimenemene yahichika mapanga ni kafunga, yaya ngwe hamutuma kuli Yese. Yeza ku chilombo cha matemba shimbu te chizavu muchituhuka nikukalumioka ha jita.

²¹ A-Izalele ni A-Filistea alulikile mikana ya jita; chizavu kutalangana ni chizavu.

²² David yahichika yikwata yenyi hamwe ni kafunga ka yiteli; yazomboka kuli maswalale; yameneka ayayo.

²³ Shimbu machihanjika no kwakatukile ku mikana ya A-Filistea mwe chitakame, Ka-Filistea wa ku Ngata; jina lienyi Ngoliate. Yahanjika maliji waze ene nawa. David yaevwa.

²⁴ Malunga eswe a Izalele muze hamona mwe lunga yachina ni woma wunji.

²⁵ A-Izalele yamba ngwo, Hiwamona yoze lunga hakanduka? Pundu hakanduka mukutomba A-Izalele. Mweswawo mamushiha, mwanangana mamwaha upite wunji, mamwaha mwanenyi wa pwo kumbata, matusula munyachi wa tato mu Izalele.

²⁶ David yamba kuli malunga aze amujingilikile ngwenyi, Yika malinga kuli lunga yoze mashiha yono Ka-Filistea nikuchiza luchoko yono kuli A-Izalele? Mumu yono chilima cha Ka-Filistea kuchi apwa akahase kutomba chizavu cha tujita twa Zambi ya mwono.

²⁷ Atu amukumbulwile chocho ngwo, Chinganji makalinga kuli mukwa kumushiha.

²⁸ Yayo wa mukulwana Eliape wevwile muze ahanjikile ni malunga. Eliape yatenuka ni David ngwenyi, Yika unakaula ku kuno? Neya wahichika tumapanga tuze mu puya? Ngunanyingika kulengumuka che ni kuhuka cha mbunge ye. Hiweza ukamone ye jita lume.

²⁹ David yamba ngwenyi, Yika nalinga kevwe? Te chikuma kuchishiko nyi?

³⁰ Yakatuka kuli iye akaye kuli mukwo ni maliji amuwika. Atu amukumbulwile chizechene nawa, ngwe atangu.

³¹ Muze hevwa maliji aze ahanjikile David yaambulula kumeso ja Saulu. Iye yatuma kumusaka.

³² David yamba kuli Saulu ngwenyi, Niumwe kanda alezumuka mu mbunge mumu hali yono. Yami kavumbi kenu munguya nikwasa jita ni yono Ka-Filistea.

³³ Saulu yamba kuli David ngwenyi, Kuchi kuhasa kulimika ni yono Ka-Filistea ukase nenyi jita, mumu uchili mukweze neye hapwa kajita chize ku ukweze wenyi.

³⁴ David yamba kuli Saulu ngwenyi, Yami kavumbi kenu nafungile mapanga a tata, mba muze te meza ndumba hanji ursu kuchiza mwana-panga ku tanga,

³⁵ namukawile, yingumulamba nikumuchiza mu kanwa lienyi. Muze te mangukatukila, yingumukwata ku uzangi wenyi ni kumulamba nikumushiha.

³⁶ Yami kavumbi kenu nashihile ndumba ni ursu, eswe aali, mba yono chilima cha Ka-Filistea mapwa ngwe umwe hakachi ko se hatomba chizavu cha tujita twa Zambi ya mwono.

³⁷ David yamba nawa ngwenyi, Yehova yoze wangupulwile ku tachi ja ndumba ni ku tachi ja ursu mangupulula nawa ku tachi ja yono Ka-Filistea. Saulu yamba kuli David ngwenyi, Yako. Yehova mapwa hamwe ni yena.

³⁸ Saulu yajika David ni mazalo jenyi, ni ngalau ya unengu ha mutwe wenyi, ni chikuto chenyi cha utale.

³⁹ Mba David yalijichika katana kenyi ha mazalo jenyi, yeseka kuya, mumu kanda ayeseka. David yamba kuli Saulu ngwenyi, Chahashile kuya ni yuma yino mumu kanda nguyeseka. Kashika yalichizayo.

⁴⁰ Yambata mulumbu wenyi mu kwoko; yasakula kumbo jitano ku chitwetwe yajisa mu katuku ka kafunga kali nako, te mu ngonga yenyi. Yakwata mu kwoko chikapa chenyi cha kukonga nacho mawe, yakundama kuli Ka-Filistea.

⁴¹ Ka-Filistea yeza nikukundama kuli David. Mukwa kumumbachila lukepwe wenyi te kanatetekela.

⁴² Muze Ka-Filistea hakengesa, hamona David yamulelesa mumu achili te mukweze, muchila, mupema ku meso.

⁴³ Ka-Filistea yamba kuli David ngwenyi, Te nguli kawa, se uneza kuli yami ni mbwechi? Ka-Filistea yashinga David ni majina ja mazambi jenyi.

⁴⁴ Ka-Filistea yamba kuli David ngwenyi, Tweya ngukahane musunya we kuli tujila a mu tetela ni kuli tushitu a mu yambu.

⁴⁵ Mba David yamba kuli Ka-Filistea ngwenyi, Ena uneza kuli yami ni katana, ni kunga, ni kunga lia kukonga, alioze yami nguneza kuli yena ni jina lia Yehova-wa-Tujita, Zambi ya maswalale a Izalele yoze wamutomba.

⁴⁶ Tangwa lino Yehova makukunjika mu moko jami mba mungukushiha, mungukutapa mutwe. Musono munguhana mijimba ya A-Filistea kuli tujila a mu tetela ni kuli tushitu a mu yambu, hanga akwa hashi eswe akanyingike ngwo, Kwali umwe Zambi mu Izalele.

⁴⁷ Chikwo nawa hanga wano eswe anakunguluka kuno akanyingike ngwo, Yehova keshi kutemwina ni katana hanji ni kunga. Mumu jita ya mbala ya Yehova neye makuhana mu kwoko lietu.

⁴⁸ Muze Ka-Filistea hakatuka hakundama kutakana ni David mba David hatambuka nikuzomboka kuli maswalale atakane ni Ka-Filistea.

⁴⁹ David yanjisa kwoko lienyi mu ngonga, yachizamo liwe, yalikonga, yililamba Ka-Filistea ha huma. Liwe yilinjila mu huma lienyi, yalimbukila hashi.

⁵⁰ Chocho David yakumba Ka-Filistea ni liwe lia kukonga ni chikapa. Yalamba Ka-Filistea, yamushiha, alioze David te keshi ni katana mu kwoko lienyi.

⁵¹ Kashika David yazomboka, yamana hali Ka-Filistea, yanda katana kenyi nikumutomona mu chindalo chenyi, yamushiha, yamutapa mutwe. Muze A-Filistea yamona chitakame cho hafwa, yachina.

⁵² Malunga A-Izalele ni A-Yunda yakatuka ni kukalumioka, yahanga A-Filistea ndo kuheta ku Ngata, ndo ku yikolo ya Ekrone. Akwa kulemana ja A-Filistea yalimbukila mu jila ya Sharaime ni ndo ku Ngata ni ku Ekrone.

⁵³ A-Izalele yahiluka ha kuhanga A-Filistea, yapupa chilombo cho.

⁵⁴ David yanda mutwe wa Ka-Filistea, yauneha ku Yerusaleme alioze mazalo jenyi a utale yaasa mu mbalaka yenyi.

⁵⁵ Muze Saulu yamona David kanayi kulimika ni Ka-Filistea yamba kuli Abenere kapitau ka yizavu ngwenyi, Auze mukweze mwana waya? Abenere ngwenyi,. Mwanangana, ni mwono wenu Chanyingikine.

⁵⁶ Mwanangana ngwenyi, Hula unyingike yono mwana-lunga mwana waya.

⁵⁷ Ha kuhiluka David ku kushiha Ka-Filistea, Abenere yamutambula yamuneha kuli Saulu ni mutwe wa Ka-Filistea mu kwoko lienyi.

⁵⁸ Saulu yamba kuli iye ngwenyi, Ena mukweze, uli mwana waya? David yakumbulula ngwenyi, Nguli mwana wa kavumbi kenu Yese wa ku Mbeteleme.