1 Samuel 16 - MUKANDA USANDU WA ZAMBI 1975

¹ Yehova yamba kuli Samuel ngwenyi, Ndo mwiji muka mukalishimwoka hali Saulu, se hinalitunaye, kechi kupwa mwanangana wa Izalele? Zalisa mbinga ye ni maji, yako, mungukutuma kuli Yese wa ku Mbeteleme, mumu hinalisela mwanangana hakachi ka anenyi a malunga.

² Samuel yamba ngwenyi, Kuchi munguhasa kuya? Nyi Saulu machivwa mangushiha. Yehova yamba ngwenyi, Twala chimbembe cha chihwo ukambe ngwe, Ngunayi mukulambula chitapo kuli Yehova.

³ Sanyika Yese eze ku chitapo, mba mungukulweza chize mulinga. Mukawayisa ni maji yoze mungumutongola.

⁴ Samuel yalinga chize Yehova yamwamba; yeza ku Mbeteleme. Makulwana a chihunda yamupatwiza nikuchikima. Yamba ngwo, Nuneza ni sambukila?

⁵ Iye ngwenyi, Ni sambukila nguneza kulambula chitapo kuli Yehova. Liselenu ku usandu nwize ni yami ku chitapo. Iye yasela ku usandu Yese ni ana jenyi; yaasanyika ku chitapo.

⁶ Muze heza iye yatala Eliape yamba ngwenyi, Pundu, yoze mamuwayisa kuli Yehova kwali kumeso jami.

⁷ Alioze Yehova yamba kuli Samuel ngwenyi, Kanda utala ku meso jenyi, hanji ku Chizundamo chenyi, mumu hinalitunaye. Yehova kamwene ngwe atu akumona. Mumu atu kakutala ku kusoloka cha haze, alioze Yehova kakutala ku mbunge.

⁸ Mba Yese yasanyika Abinadambe akapalike kumeso ja Samuel. Alioze yamba ngwenyi, Chipwe yono, Yehova kamutongwele.

⁹ Mba Yese yapalikisa Shama. Alioze yamba ngwenyi, Chipwe yono, Yehova kamutongwele.

¹⁰ Chocho Yese yapalikisa ana jenyi a malunga shimbiali kumeso ja Samuel, alioze Samuel yamba kuli Yese ngwenyi, Yehova katongwele wano.

¹¹ Samuel yamba kuli Yese ngwenyi, Ana je eswe, waene nyi? Iye yamba ngwenyi, Kwasala mwe kasulasongo, kanafungu mapanga. Samuel yamba kuli Yese ngwenyi, Tuma amusake, mumu kutuchi kutwama ndo heza.

¹² Yatuma yamusaka. Iye te muchila chikolo, meso jenyi apema, kanawaha chikolo kumutala. Yehova yamba ngwenyi, Mwenawo, katuka umuwayise.

¹³ Samuel yanda mbinga ya maji yamuwayisa hakachi ka ayayo. Mba Spiritu ya Yehova yeza ni tachi hali David chize ku tangwa lize. Samuel yakatuka yaya ku Rama.

¹⁴ Spiritu ya Yehova te hakatuka kuli Saulu; Spiritu umwe mupi wa kuli Yehova yamupinjisa.

¹⁵ Ngamba ja Saulu yamba kuli iye ngwo, Tala, Spiritu mupi wa kuli Zambi kananupinjisa.

¹⁶ Enu mwata wetu nututume yetu ngamba jenu tuli kumeso jenu tufupe umwe kananyingika kwimba kalialia kanawa, mba muze Spiritu mupi wa kuli Zambi nuli nenyi iye memba ni moko jenyi, munukahinduka.

¹⁷ Saulu yamba kuli ngamba jenyi ngwenyi, Ngufupile lunga umwe mahasa kwimba kanawa, nunguneheneye.

¹⁸ Umwe mukweze wakumbulwile ngwenyi, Hinamona umwe mwana wa Yese wa ku Mbeteleme kananyingika kwimba kanawa. Kapwa nawa chitakame, mukwa hamu, kajita, chikanyame, mupema ku meso, ni Yehova kali nenyi hamuwika.

¹⁹ Kashika Saulu yatuma mikeji kuli Yese ngwenyi, Ungutume mwané David yoze unafungu mapanga.

²⁰ Yese yanda chimbulu, yamutwika mbolo, ni tuku ya vinyu, ni mwana-pembe, yayituma mu kwoko lia mwanenyi David, kuli Saulu.

²¹ David yeza kuli Saulu nikumana kumeso jenyi. Saulu yamuzanga chikolo, yamusela kumumbachila yitwa yenyi ya jita.

²² Saulu yatuma kuli Yese ngwenyi, Ngunaliumbu; tayiza David kumana kumeso jami mumu kananguwahila chinji.

²³ Mba muze Spiritu mupi wa kuli Zambi wapwile hali Saulu, David manda kalialia nikwimba ni kwoko lienyi ndo Saulu hahuzuluka, hahinduka ni mwe Spiritu mupi hamwecha.