1 Samuel 15 - MUKANDA USANDU WA ZAMBI 1975

¹ Samuel yamba kuli Saulu ngwenyi, Yehova wangutumine kukuwayisa ni maji nikukupwisa mwanangana wa atu jenyi, A-Izalele. Kashika panjika kanawa liji lia Yehova.

² Yehova-wa-Tujita kanambe ngwenyi, Hingunamono chize A-Amaleke alingile kuli A-Izalele, chize alimikine no mu jila ha kukatuka ku Engitu.

³ Kashika yako haliapwila ukalambe Amaleke ukonwone yize yeswe ali nayo. Kanda uavwila keke alioze shiha malunga, ni mapwo, ni twanuke ni akwa kwamwa, ni ngombe, ni mapanga, ni tumelu, ni yimbulu.

⁴ Saulu yasanyika atu, yaalula ku Telaime, apwile kulakaji aali a tununu a maswalale a kwenda hashi, ni kumi lia tununu a malunga a Yunda.

⁵ Saulu yeza ku limbo lia Amaleke, yajikinyina mu chikulo.

⁶ Saulu yamba kuli A-Kene ngwenyi, Katukenu, yenu nutuhuke hakachi ka A-Amaleke kuchina mungunwonwona hamuwika. Mumu yenu nwalingile ni vumbi kuli A-Izalele eswe muze akatukile ku Engitu. Chocho A-Kene yakatuka hakachi ka A-Amaleke.

⁷ Mba Saulu yalamba A-Amaleke chize ku Havila mu jila ya kuya ku Shure kwatalangana ni Engitu.

⁸ Yakwata Agage mwanangana wa A-Amaleke wa mwono. Yanongesa liakulu atu eswe ni tutana.

⁹ Saulu ni e atu kashihile Agage ni yimuna apema hakachi ka mapanga, ni ngombe, ni yimbembe a maji, ni ana-mapanga, ni yuma yeswe yipema; kasolo kwanongesa. Alioze api eswe, amokomoko o aanongesene liakulu.

¹⁰ Henaho liji lia Yehova lieza kuli Samuel ngwenyi,

¹¹ Hinalikonyeka ha kupwisa Saulu mwanangana, mumu hanalitwamina kungukaula. Kalingile chize namutumine. Samuel yatenuka. Yateta kuli Yehova Ufuku weswe.

¹² Samuel yalimeneka chimenemene akatakane ni Saulu. Yalweza Samuel ngwo, Saulu yeza ku Karmela, yalimikina luliwe lwa kumwiwuluka, yalumuka, yapalumuka ku Ngilingali.

¹³ Samuel yaheta kuli Saulu, mba Saulu yamba kuli iye ngwenyi, Yehova anuwahise! Hinalinga shimbi ja Yehova.

¹⁴ Samuel yamba ngwenyi, Mba kuteta acho cha mapanga ni kuteta cha ngombe ngunevu kuchi chinalumbunuka?

¹⁵ Saulu yamba ngwenyi, E aze atambwile kuli A-Amaleke, mumu atu alamwinyine yimuna apema hakachi ka mapanga ni ngombe akaatambule kuli Yehova Zambi yenu. Alioze akwo eswe hitwanongesa liakulu.

¹⁶ Samuel yamba kuli Saulu ngwenyi, Kata! Mungukwambulwila chize Yehova kangwambanga ha ufuku. Saulu yamba ngwenyi, Hanjikenu tuhu.

¹⁷ Samuel yamba ngwenyi, Chipwe yena mwene walimwene ngwe uli mukepe, hindu akupwishile mukwa lutwe wa minyachi ya Izalele. Yehova wakuwayishile mwanangana wa A-Izalele.

¹⁸ Yehova wakutumine wenyi. Yamba ngwenyi, Yako ukanongese liakulu wano akwa shili A-Amaleke ukase no jita ndo makuwa.

¹⁹ Kuchi te kwononokene ku liji lia Yehova? Kuchi te wapunjile upite nikulinga chuma cha kupihila Yehova?

²⁰ Saulu yamba kuli Samuel ngwenyi, Alioze hinononoka ku liji lia Yehova. Hinenda mu jita yize Yehova wangutumine. Hinaneha Agage mwanangana wa A-Amaleke, nikunongesa liakulu A-Amaleke.

²¹ Alioze e atu atambwile upite ni apema hakachi ka mapanga ni ngombe, ni yipema hakachi ka yuma ya kujilika, akayilambule kuli Yehova Zambi yenu mu Ngilingali.

²² Samuel yamba ngwenyi, Te Yehova kakuwahilila ni milambu ya kulumba ni yitapo, nyi kakuwahilila ni waze mamwononokena? Kwononoka kuchahiana kulambula yitapo. Kupanjika kuchahiana kuhana maji a kuji a mapanga.

²³ Mumu kukolema kuchapwa ngwe mulonga wa umbanda, ni upama kuwapwa ngwe uhenge ni kukombelela. Ena hiunalitunu liji lia Yehova; kashika aye hanalitunu yena. Kuchi kupwa mwanangana.

²⁴ Saulu yamba kuli Samuel ngwenyi, Hingunavulumuna, mumu hinatangula shimbi ja Yehova ni maliji jenu nawa, mumu nevwilile woma e atu nikupanjika ku liji lio.

²⁵ Kashika, haliapwila ngunaliumbu nungukonekene mulonga wami nwize ni yami hanga ngukawayile Yehova.

²⁶ Samuel yamba kuli Saulu ngwenyi, Chichi kuya ni yena se hiunalitunu liji lia Yehova, ni Yehova hanalitunu yena. Kuchi kupwa mwanangana wa Izalele.

²⁷ Ha kwalumuka Samuel akaye, Saulu yamukwata ku songo lia hina lienyi; yilisonyoka.

²⁸ Samuel yamba ngwenyi, Yehova hasonya wanangana wa Izalele kuli yena musono, hauhana kuli umwe mukwenu mupema kuhiana yena.

²⁹ Ni chikwo nawa, mwe Mulemu-wa-Izalele kechi kwamba mahuza hanji kulikonyeka. Mumu iye hi mutu ko akalikonyeke.

³⁰ Mba Saulu yamba ngwenyi, Hingunavulumuna, hindu, nungulemese kama haliapwila kumeso ja makulwana a atu jami ni kumeso ja A-Izalele. Hilukenu nwize ni yami ngukawayile Yehova Zambi yenu.

³¹ Kashika Samuel yakaula Saulu mba Saulu yawayila Yehova.

³² Henaho Samuel yamba ngwenyi, Neha Agage mwanangana wa A-Amaleke kuno kuli yami. Agage yeza nikuseha. Te kanambe ngwenyi, Usasu wa kufwa hiunapalika.

³³ Samuel yamba ngwenyi, Chizechene ngwe katana ke hapwisa mapwo keshi ana, chocho nawa noko mapwa hakachi ka mapwo keshi ana. Samuel yateta Agage tuyipinji kumeso ja Yehova mu Ngilingali.

³⁴ Samuel yaya ku Rama, mba Saulu yakanduka ku zuwo lienyi mu Ngibia ya Saulu.

³⁵ Samuel kejile nawa kumona Saulu ndo ku tangwa lia kufwa chenyi. Alioze Samuel yalinyenga hali Saulu, ni Yehova yalikonyeka ha kupwisa Saulu mwanangana wa Izalele.