1 Samuel 14 - MUKANDA USANDU WA ZAMBI 1975

¹ Limwe tangwa Jonatas, mwana wa Saulu yamba kuli kambaji kenyi yoze wamumbachilile yitwa yenyi ngwenyi, Tuye ku chilombo cha A-Filistea chili mu sali. Alioze kalwezele tato.

² Saulu te kanatwama ku songo lia Ngibia mushi lia mutondo wa romana wa mu Migrone. Atu aze ali no ngwe kulakaji asambano.

³ Ni Ahija, mwana wa Ahitube, yayo ya Ikabode, mwana wa Finehase, mwana wa Eli sasendote ya Yehova mu Shilo iye kali ni efode. Chipwe atu kanyingikine ngwo, Jonatas haya.

⁴ Hakachi ka chipoka kuze Jonatas wambile kupalika ahete ku chilombo cha A-Filistea kwapwile mulundu wa mawe sali lino ni mulundu wa mawe sali lize. Jina lia umwe ngwo, Mbozeze, ni jina lia ukwo ngwo, Sene.

⁵ Mulundu umwe wanangama ku Norte kutalangana ni Mikimashi ni ukwo ku Sule kutalangana ni Ngeba.

⁶ Jonatas yamba kuli kambaji kenyi yoze wambachile yitwa yenyi ngwenyi, Tuye ku chilombo cha wano yilima. Hanji Yehova matukwasa mumu hi chikalu ko kuli Yehova kulamwina atu chipwe ni anji chipwe ni akehe.

⁷ Mukwa kumumbachila yitwa yenyi yamba ngwenyi, Linga cheswacho chili mu mbunge ye. Kunguli hamwe ni yena. Mbunge yami chimuwika yapwa ni ya yena.

⁸ Jonatas yamba ngwenyi, Mutuya kuli wano malunga mu sali tukasoloke kuli ayo.

⁹ Nyi mamba kuli yetu ngwo, Manenu ndo mutunuheta, mba mutumana kúlú kuze tuli. Kutuchi kuya kuli ayo.

¹⁰ Alioze nyi mamba ngwo, Tweyenu kuli yetu, mba mutuya, mumu Yehova hanaakunjika mu moko jetu. Achi muchipwa chilayi kuli yetu.

¹¹ Chocho eswe ni aali asotokele kuli maswalale ja A-Filistea. Mba A-Filistea yamba ngwo, Talenu, A-Hepreu kanatuhuka mu mena jo kuze aswamine.

¹² Maswalale yamba kuli Jonatas ni mukwa kumumbachila yitwa yenyi ngwo, Tweyenu kuno kuli yetu tunulweze chimwe. Jonatas yamba kuli mukwa kumumbachila yitwa ngwenyi, Kaula kunyima yami mumu Yehova hanaakunjika mu moko ja A-Izalele.

¹³ Jonatas yanyinako ha moko ni molu ni mukwa kumumbachila yitwa kanamukaula. Jonatas yaashiha ni mukwa kumumbachila yitwa yaya ni kwamanununa kunyima yenyi.

¹⁴ Aze atangu ashihile Jonatas ni mukwa kumumbachila yitwa yenyi apwile ngwe makumi aali a malunga, homa hamwe ngwe wande wa kweseka makumi atano a metro.

¹⁵ Kwejile mwongo mu chilombo, ni mu chifuchi ni hakachi ka atu eswe. Chipwe maswalale ni akwa kupupa, eswe achikimine. Kwejile minyiko nawa, ni kuchikima cha kuli Zambi.

¹⁶ Tulayi a Saulu mu Ngibia ya Mbenjamine yatala, kumanyi mbunga yeswe yamwanganyine kweka ni kweka.

¹⁷ Saulu yamba kuli atu aze apwile no ngwenyi, Alulenu haliapwila nunyingike waze hakatuka hakachi ketu. Muze haalula kumanyi Jonatas ni mukwa kumumbachila yitwa yenyi keshiko.

¹⁸ Saulu yamba kuli Ahija ngwenyi, Neha mushete wa Zambi. Mumu mushete wa Zambi ha matangwa aze wapwile hamwe ni A-Izalele.

¹⁹ Shimbu te Saulu machihanjika ni sasendote Chizungozungo cha mu chilombo cha A-Filistea chaliwezelele. Saulu yamba kuli sasendote ngwenyi, Chiza kwoko lie.

²⁰ Saulu ni atu eswe apwile hamwe nenyi akungulukile, yaya ku jita. Kumanyi katana ka mutu mweswe walambile sepa lienyi. Kwapwile kulivundangenya chinji.

²¹ Ni A-Hepreu waze apwile hamwe ni A-Filistea kunyima; waze te akatukile ku chifuchi cheswe cha kujingilika nikuya ku chilombo, chipwe o alumukine nikulifutula hamwe ni A-Izalele waze endele ni Saulu ni Jonatas.

²² Chipwe malunga eswe A-Izalele waze haswama mu chifuchi cha Eframe ku milundu, muze hevwa ngwo, A-Filistea hachina, chipwe o nawa aahangile chikolo mu jita.

²³ Chocho Yehova yalamwina A-Izalele tangwa lize mba jita yiyipalika ku Mbete-Avene.

²⁴ Malunga a Izalele alifwichile chikolo tangwa lize, mumu Saulu hasa shingo hali atu ngwenyi, Mweswe malia chimwe chuma ndo ngoloshi, ndo hinalikala hali akwa kole jami, ashingiwe! Kashika niumwe hakachi ka atu kalile nichimwe cha kulia.

²⁵ Atu eswe yaheta ku usaki. Kwapwile wuchi hashi.

²⁶ Muze atu haheta mu usaki kumanyi wuchi wasotwokele, hindu niumwe wasele kwoko lienyi ku kanwa mumu ha woma wa shingo.

²⁷ Alioze Jonatas kevwileko muze tato ashinganga atu. Kashika yasa songo lia mulumbu apwile nawo mu kwoko mu chishila, yalia, mba yamona kanawa.

²⁸ Umwe hakachi ka atu yamba ngwenyi, Tatenu kakanjisanga atu ni shingo ngwenyi, Mweswe malia musono, ashingiwe. Mba atu te kanalezumuka.

²⁹ Mba Jonatas yamba ngwenyi, Tata kanapinjisa chifuchi. Tala kama, chize meso jami halaula mumu ha kulia kawuchi kano kakepe.

³⁰ Shinaho kachi atu kalianga ku upite uze wa akwa kole jo awananga. Alioze Chichize kutwashihile A-Filistea anji.

³¹ Alambile A-Filistea tangwa lize chize ku Mikimashi ndo ku Ajalone, ni e atu alezumukine.

³² Atu alundumukinyine ha upite nikutambula mapanga, ni ngombe, ni ana-ngombe. Yaashiha chizechene hashi lume nikwalia hamwe ni e manyinga.

³³ Yambulwila Saulu ngwo, Atu kanavulumuna Yehova ha kulia yifwo hamwe ni e manyinga. Iye yamba ngwenyi, Hinwalinga ni mafwefwe. Langumunenu luliwe lunene kuli yami musono.

³⁴ Saulu yamba ngwenyi, Mwanganenu hakachi ka atu nikwaambulwila ngwenu, Mutu mweswe anehe kuli yami ngombe yenyi, ni mutu mweswe panga yenyi akaashihile kuno akalie. Kanda nuvulumuna Yehova ha kulia hamuwika ni manyinga. Atu eswe anehene mutu mweswe ngombe yenyi ufuku uze nikumushihila kuze.

³⁵ Saulu watungileko chilumbilo kuli Yehova. Chilumbilo chenyi chitangu atungilile Yehova chenacho.

³⁶ Saulu yamba ngwenyi, Tukaulenu A-Filistea ha ufuku tukaapupe ndo ku kucha cha tangwa, kanda tuahichika chipwe mutu umuwika. O yamba ngwo, Lingenu cheswacho chanupemena. Sasendote yamba ngwenyi, Tukundamenu kuli Zambi.

³⁷ Saulu yahula mana kuli Zambi ngwenyi, Ngupalumuke kunyima lia A-Filistea nyi? Muakunjika mu moko ja A-Izalele nyi? Alioze kamukumbulwile tangwa lize.

³⁸ Saulu yamba ngwenyi, Kundamenu kuno, enu miata eswe nunyingike, numone kuze kwapwa mulonga musono.

³⁹ Mumu ni mwono wa Yehova chilamwina cha Izalele, chipwe muupwa muli mwanami Jonatas kumafwa. Alioze hakachi ka atu eswe kukwapwile lunga umuwika yoze makumbulula.

⁴⁰ Yamba kuli A-Izalele eswe ngwenyi, Enu manenu sali limwe, ni yami ni mwanami Jonatas mutumana sali likwo. Atu yamba kuli Saulu ngwo, Lingenu chize chanupemena.

⁴¹ Kashika Saulu yamba kuli Yehova Zambi ya Izalele ngwenyi, Hana Shindakenyo yipema. Jonatas ni Saulu yahia. E atu yasamba.

⁴² Mba Saulu yamba ngwenyi, Sakulenu hakachi ka yami ni mwanami Jonatas. Yahia Jonatas.

⁴³ Saulu yamba kuli Jonatas ngwenyi, Ngulweze chize walinga. Jonatas yamulweza ngwenyi, Pundu nalianga kamwe kawuchi ha songo lia mulumbu napwanga nawo mu kwoko, kashika changutamba kufwa.

⁴⁴ Saulu yamba ngwenyi, Jonatas, Zambi achilinge ni chikwo nawa. Kufwa muofwa.

⁴⁵ Atu yamba kuli Saulu ngwo, Te Jonatas mafwa nyi? Iye halamwina Izalele Chichize? Hi chocho ko. Ni mwono wa Yehova, chipwe lukambu umuwika wa ha mutwe wenyi kechi kaholoka hashi mumu hanalingi hamuwika ni Zambi tangwa lia musono. Chocho atu apulwile Jonatas, kafwile.

⁴⁶ Henaho Saulu yalitwamina kukaula A-Filistea, mba A-Filistea yaya kwo.

⁴⁷ Muze Saulu hapwa mwanangana wa Izalele washile jita ni akwa kole jenyi kweswe sali ni sali. Yalimika ni A-Moape, ni A-Amone, ni A-Endome, ni mianangana a Zoba, ni A-Filistea. Kweswako atalikisa yaakumba.

⁴⁸ Yalinga ni hamu. Yakumba A-Amaleke. Yapulula A-Izalele ku moko ja waze aapupile.

⁴⁹ Ana ja Saulu a malunga wano, mukwo Jonatas, mukwo Ishivi, mukwo Malakishua. Majina ja anenyi a mapwo wano, lia mukulwana Merabe, lia kanuke Mikale.

⁵⁰ Jina lia mukwo-pwo wa Saulu Ahinoame, mwana wa Ahimaze. Jina lia kapitau ka tujita twenyi Abenere, mwana wa Nere, tato ya Saulu.

⁵¹ Tato ya Saulu te Kishi. Nere tato ya Abenere iye mwana wa Abiele.

⁵² Kwapwile jita yikalu ni A-Filistea matangwa eswe a Saulu, mba muze Saulu yamona umwe chitakame hanji umwe mukwa hamu, yamutambula.