1 Samuel 13 - MUKANDA USANDU WA ZAMBI 1975

¹ Saulu wapwile ni makumi atatu a miaka muze aputukile kuyula. Wayulile A-Izalele miaka yiali.

² Mba Saulu walisakwilile tununu atatu a malunga A-Izalele. Tununu aali atwamine hamwe ni Saulu ku Mikimashi ni ku mulundu wa Mbetele, ni kanunu umuwika atwamine hamwe ni Jonatas mu Ngibia ya Mbenjamine. Atu akwo eswe waatumine mutu mweswe ku mbalaka yenyi.

³ Jonatas yapupa maswalale ja A-Filistea waze apwile mu Ngeba, mba A-Filistea yachivwa. Kashika Saulu yembisa yitavwi ndusu chifuchi cheswe ngwenyi, A-Hepreu eswe apanjike.

⁴ A-Hepreu eswe evwile ngwo, Saulu hapupa maswalale ja A-Filistea, ni A-Izalele hanalumuka api kuli A-Filistea. Atu eswe akungulukilile kukaula Saulu ku Ngilingali.

⁵ A-Filistea akungulukile mukwasa jita ni A-Izalele. Apwile ni makumi atatu a tununu a matemba-a-jita, ni tununu asambano a akwa tuvwalu, ni atu ha kwaalula ngwe masekeseke a ku ngenge ya kalunga-lwiji. Yakanduka, yasa chilombo cho ku Mikimashi, ku sali lia Mbete-Avene ku Chivumbuko.

⁶ Muze malunga A-Izalele amwene ngwo, Twasakaminya (mumu atu alifwichile) mba aswamine mu yivwenge, ni mu usaki, ni mu yimawe, ni mu pembo, ni mu mena.

⁷ Amwe A-Izalele te hazauka Yordau ku chifuchi cha Ngate ni Ngiliate, alioze Saulu iye hindu kanatwama ku Ngilingali mba atu eswe amukawile nikuchikima.

⁸ Yashimbula matangwa shimbiali nikulita ni shimbu lize Samuel hamusela, alioze Samuel kahetele ku Ngilingali, ni atu akatukile kuli Saulu nikumwangana.

⁹ Saulu yamba ngwenyi, Nehenu kuli yami mulambu wa kulumba ni milambu ya sambukila. Yalambula wa kulumba.

¹⁰ Wachimana kulambula mulambu wa kulumba, Samuel yaheta, mba Saulu yaya mukumupatwiza, amumeneke.

¹¹ Samuel yamba ngwenyi, Chika walinga? Saulu yakumbulula ngwenyi, Mumu namona atu nikungukatuka, ni yena kuwejile ha matangwa wasele, ni A-Filistea anakungulukila ku Mikimashi.

¹² Kashika namba ngwami, Haliapwila A-Filistea mangulundumukina ku Ngilingali ni yami kanda ngulembela vumbi lia Yehova. Kashika yingulikapwola, yingulambula mulambu wa kulumba.

¹³ Samuel yamba kuli Saulu ngwenyi, Hiwalinga uhepuke. Kwalingile nikulita ni shimbi ya Yehova Zambi ye yize akwambile. Nyi chocho walinga kachi Yehova wakolesele wanangana we kuli A-Izalele ku miaka ya mutolo.

¹⁴ Alioze haliapwila wanangana we kuuchi kulinduluka. Yehova halifupila mutu umwe malita ni mbunge yenyi. Yehova hamutongola akayule atu jenyi, mumu yena kwalingile chize Yehova wakwambile.

¹⁵ Samuel yakatuka ku Ngilingali yaya ku Ngibia ya Mbenjamine. Saulu yalula malunga aze apwile no, ngwe kulakaji asambano.

¹⁶ Saulu ni mwanenyi Jonatas ni atu aze apwile no yatwama ku Ngeba ya Mbenjamine, alioze A-Filistea o mu chilombo cho ku Mikimashi.

¹⁷ Akwa kupupa yakatuka ku chilombo cha A-Filistea mu ngango jitatu. Ngango yimwe yatalikishile mu jila ya kuya ku Ofra ku chifuchi cha Shuale.

¹⁸ Ngango yikwo yatalikishile mu jila ya kuya ku Mbete-Horone. Yikwo yatalikishile mu jila ya njiza, yize yatala ku chana cha Zepoime kwakuya ku puya.

¹⁹ Kukwapwile niumwe fuli mu chifuchi cheswe cha Izalele, mumu A-Filistea hamba ngwo, Kuchina malifulila tutana ni makunga.

²⁰ Alioze A-Izalele eswe apalumukine kuli A-Filistea akahele mutu mweswe chikungo chenyi cha sharua, hanji temo, hanji njimbu, hanji kwengo,

²¹ muze te kwengo liajinda, hanji temo, hanji misako, hanji njimbu, akasambule yikungo.

²² Kashika, ha tangwa lia jita kukwasolokele chipwe katana chipwe kunga mu moko ja atu aze apwile hamwe ni Saulu ni Jonatas. Alioze Saulu ni mwanenyi Jonatas o te kali nayo.

²³ Maswalale ja A-Filistea yatuhuka, yaya ku chipoka cha Mikimashi.