1 Samuel 12 - MUKANDA USANDU WA ZAMBI 1975

¹ Samuel yamba kuli A-Izalele eswe ngwenyi, Hinapanjika ku liji lieswe nwambile kuli yami. Hinanwaha mwanangana kunuyula.

² Haliapwila mwanangana kanende kumeso jenu ni yami hinapwa mukulwana ni kambu jitoma, ni anami a malunga kwali hakachi kenu. Hingunende kumeso jenu chize ku wanuke wami ndo musono.

³ Yami uno. Shindakenyenu ha kutwala kuli yami kumeso ja Yehova ni kumeso ja yono hanawayisa. Ngombe jaya natambula? Hanji chimbulu? ya mbongo, iya? Napinjisa iya? Kuli iya natambula chindo ngujike nacho meso jami? Ambenu nguchihilwise.

⁴ O ambile ngwo, Kwatwiyile, chipwe kutupinjisa, chipwe kutambula chimwe kuli umwe mutu.

⁵ Iye yamba kuli ayo ngwenyi, Yehova chela kuli yenu, ni yono hanawayisa ni maji iye nawa chela musono cha kwamba ngwenu, Kutwawanyine nichimwe mu kwoko lienyi, nyi? O ngwo, Iye chela.

⁶ Samuel yamba kuli atu ngwenyi, Mwe Yehova yoze wanuhele Mose ni Arone, yoze wachijile tulamba twenu nawa ku chifuchi cha Engitu.

⁷ Kashika manenu haliapwila nguhanjike ni yenu kumeso ja Yehova ha kutwala ku yitanga yeswe ya ululi ya Yehova, yize anulingilile, ni yenu ni tulamba twenu.

⁸ Muze Yakomba wayile ku Engitu ni tulamba twenu atetele kuli Yehova henaho Yehova yatuma Mose ni Arone. O yachiza tulamba twenu ku Engitu, yaatungisa mu chifuchi chino.

⁹ Alioze yavulama Yehova Zambi yo kashika iye yaalanjisa kuli Sisera kapitau ka tujita twa Hazore, ni kuli A-Filistea, ni kuli mwanangana wa Moape, ashile no jita.

¹⁰ Yateta kuli Yehova nikwamba ngwo, Hitwavulumuna mumu ha kwehuka Yehova nikulingila Ambale ni Asatarote. Alioze utupulule kama haliapwila kuli akwa kole jetu mba mutukalingila.

¹¹ Mba Yehova watumine Njerubale, ni Mbedane, ni Jefeta, ni Samuel nikunupulula kuli akwa kole jenu kweswe kwa kujingilika chocho nwatwamine kawape.

¹² Muze nwamwene Nahashi mwanangana wa A-Amone kaneza kulimika ni yenu nwambile kuli yami ngwenu, Ka, tunazange mwanangana atuyule, shimbu te Yehova Zambi yenu iye mwanangana wenu.

¹³ Kashika talenu mwe mwanangana hinwatongola, hinweta. Yehova hanusela mwanangana kunuyula.

¹⁴ Nyi munuvwila woma Yehova, nikumulingila, nikupanjika ku liji lienyi, kunwakolemene shimbi ja Yehova, ni yenu ni mwanangana yoze wanuyula munupwa akwa kukaula Yehova Zambi yenu—chipema.

¹⁵ Alioze nyi kunwapanjikile ku liji lia Yehova, hanji munukolema shimbi ja Yehova, kwoko lia Yehova kumulikalimika ni yenu chizechene ngwe lialimikine ni akakenu.

¹⁶ Kashika haliapwila manenu kúlú nukamone chuma chino chinene Yehova malinga kumeso jenu.

¹⁷ Musono ngwami tangwa lia kucha tiliku, nyi? Mungutambika kuli Yehova atume kukulunguza ni vula nukanyingike nukamone ungulungulu wenu unene hinwavulumuna kumeso ja Yehova ha kwita mwanangana.

¹⁸ Chocho Samuel yatambika kuli Yehova mba Yehova yatuma kukulunguza ni vula tangwa lioliene, mba atu eswe evwilile woma wunji Yehova ni Samuel.

¹⁹ Atu eswe yamba kuli Samuel ngwo, Nutulembele etu ngamba jenu kuli Yehova Zambi yenu, kanda tufwa, mumu ha kwita mwanangana hitwaweza chuma chino chipi ku milonga yetu yeswe.

²⁰ Samuel yamba kuli atu ngwenyi, Kanda nwivwa woma. Chamwenemwene hinwalinga chipi chino cheswe, hindu ha kukaula Yehova, kanda nupiasuka. Lingilenu Yehova ni mbunge jenu jeswe.

²¹ Kanda nupiasukila ha kukaula yuma yamokomoko yize kuyichi kuhasa kunukwasa hanji kunupulula mumu kuyapwa yamokomoko.

²² Mumu Yehova iye kechi kwehuka atu jenyi mumu ha ulemu wa jina lienyi linene, mumu chawahila Yehova kunupwisa nukapwe atu jenyi mwene.

²³ Chikwo nawa, ha kutwala kuli yami chikapwe kusuku ni yami kuvulumuna Yehova ha kulitwamina kunulembela. Mungunufumba mu jila yipema yize yinalulama.

²⁴ Chino wika ngwami, Vwilenu woma Yehova nukamulingile mu umwenemwene ni mbunge jenu jeswe, nukazewule yuma yinene yipwa haha hananulingila.

²⁵ Alioze nyi hindu munulinga ungulungulu kumunukakuwa, ni yenu ni mwanangana wenu.