1 Samuel 11 - MUKANDA USANDU WA ZAMBI 1975

¹ Nahashi Ka-Amone yakanduka, yasa chilombo chenyi kulimika ni Njabeshe-Ngiliate. Malunga eswe a Njabeshe yamba kuli Nahashi ngwo, Kolesa usendo ni yetu mba mutukulingila.

² Nahashi Ka-Amone yamba kuli ayo ngwenyi, Mungukolesa ni yenu usendo nyi munutayiza kutombongona meso jenu eswe a chindume ngukachitwike sau hali A-Izalele eswe.

³ Makulwana a Njabeshe yamba kuli iye ngwo, Utwehe matangwa shimbiali tutume mikeji kweswe ndo ku njiza jeswe ja Izalele. Nyi kukushi waze matulamwina mba mututuhuka kuli yena.

⁴ Mikeji yaheta ku Ngibia ya Saulu; yambulula maliji wano eswe mu matwi ja atu mba atu eswe yakololoka ni kulila.

⁵ Saulu te kanakatuka ku munda ni ngombe. Saulu yamba ngwenyi, Atu yika anevu analili chocho? Yamulweza maliji a akwa Njabeshe.

⁶ Ha kwivwa maliji aze Spiritu ya Zambi yahulumukina ni tachi hali Saulu. Yatenuka chikolo.

⁷ Yanda ngombe aali. Yaatetateta tuyipinji; yayitumina ku njiza jeswe ja Izalele mu moko ja mikeji ngwenyi, Mweswe kakawile Saulu ni Samuel, chocho malinga ni ngombe jenyi. Mba mwongo wa kuli Yehova wahulumukine hali atu. Yeza ngwe mutu umuwika.

⁸ Yaalula mu Mbezeke. Malunga a Izalele apwile kulakaji atatu a tununu, ni malunga a Yunda makumi atatu a tununu.

⁹ Yatuma mikeji aze ejile ngwo, Ambenu kuli mahinga a Njabeshe-Ngiliate ngwenu, Hamene manupulula ha chivukuminya cha tangwa. Mikeji yaheta, yambulwila malunga a Njabeshe, mba o awahililile chikolo.

¹⁰ Kashika malunga a Njabeshe yamba ngwo, Hamene mututuhuka kuli yenu nukatulinge cheswacho chanuwahila.

¹¹ Mu kucha Saulu yateta atu mu mbunga jitatu. Yanjila muchima lia chilombo ha kalayi ka chimenemene. Yashiha A-Amone ndo mwalwa hiwatwa. Waze asalile amwanganyine; kukwapwile aali hamuwika.

¹² Mba atu yamba kuli Samuel ngwo, Aya, waze ambile ngwo, Saulu kechi kutuyula yetu? Uanehe tukaashihe.

¹³ Alioze Saulu yamba ngwenyi, Kechi kushiha niumwe musono, mumu musono Yehova hapulula A-Izalele.

¹⁴ Samuel yamba kuli atu ngwenyi, Tuyenu ku Ngilingali tukakoleseleko nawa we wanangana.

¹⁵ Mba atu eswe yaya ku Ngilingali, yasela Saulu mwanangana kumeso ja Yehova ku Ngilingali. Yalambwilaho yitapo ya milambu ya sambukila kumeso ja Yehova. Mba Saulu ni malunga a Izalele eswe awahililile chikolo.