1 Samuel 10 - MUKANDA USANDU WA ZAMBI 1975

¹ Mba Samuel yanda kasaji ka maji waazujilile ha mutwe wenyi; yamwaha mbeju; yamba ngwenyi, Te Yehova kakuwa yishile ukapwe kasongo ka chihinga chenyi, nyi?

² Muze mukatuka kuli yami musono, muwana malunga aali ku fuka lia Rakele mu njiza ya Mbenjamine ku Zeleza. Mamba kuli yena ngwo, Yimbulu aze wayile nikufupa, hanaawane. Kumanyi tatenu hachiza mbunge e yimbulu haputuka kukunyongena yena, ngwenyi, Mwanami kuchi mungumulingila?

³ Mba mukatukako muoya ndo ku mutondo wa carvalho ku Tabore mutakana ni malunga atatu anakanduka kuli Zambi ku Mbetele. Umwe kanambata ana-pembe atatu, mukwo mbolo jitatu, mukwo tuku ya vinyu.

⁴ Makumeneka. Makwaha mbolo jiali. Mujitambula ku moko jo.

⁵ Kulutwe muwiza ku mulundu wa Zambi, kuze kwatwama maswalale ja A-Filistea. Mba ha kuheta ku chihunda mutakana ni chendo cha aprofeta kanakatuka ku nangamo ni chisaji cha kusa, ni kamukupiela, ni lundembo, ni kalialia, kaneza nikuprofeteza.

⁶ Spiritu ya Yehova mahulumukina hali yena ni tachi, mba ni yena muprofeteza hamwe no, mualumuka upwe mutu weka.

⁷ Mba muze yilayi muyipwa kuli yena hilinga chize unamono kulinga mumu Zambi kwali hamwe ni yena.

⁸ Ungutetekele ndo ku Ngilingali mba mungukuwanako ngukalambule milambu ya kulumba, nikutapa yitapo ya milambu ya sambukila. Ungutwaminyine matangwa shimbiali ndo mungwiza kuli yena ngukakulweze chize mulinga.

⁹ Mba muze alumukine akatuke kuli Samuel, Zambi wamuhele mbunge yeka ni yilayi yize yeswe yamonekene tangwa lioliene.

¹⁰ Muze ahetele ku mulundu kumanyi atakanyine ni chendo cha aprofeta, mba Spiritu ya Zambi yahulumukina hali iye ni tachi, iye waprofetezele hakachi ko.

¹¹ Mba waze eswe amunyingikine kushi, amumwene nikuprofeteza hakachi ka aprofeta ambile umwe kuli mukwo ni mukwo ngwo, Chino hichawana mwana wa Kishi chuma chika? Kumanyi Saulu nawa hapwa hakachi ka aprofeta, nyi?

¹² Umwe wa kuze kwene yamba ngwenyi, Tato iya te? Kashika chalumukine chishima cha kwamba ngwo, Saulu nawa hakachi ka aprofeta ali, nyi?

¹³ Muze hamana kuprofeteza yaheta ku nangamo.

¹⁴ Tato yamba kuli iye ni kuli ngamba yenyi ngwenyi, Kulihi nwayile? Iye ngwenyi, Mukufupa yimbulu mba muze kutwaamwene twayile kuli Samuel.

¹⁵ Tato yamba ngwenyi, Ngulweze kama chize Samuel Yoze namwiwakwambile.

¹⁶ Saulu yamba kuli tato ngwenyi, Yatulweza pundu ngwenyi, Yimbulu haawana. Alioze ha kutwala ku pande ja wanangana, jize Samuel wambile, kamulwezele.

¹⁷ Samuel yasanyika atu akungulukile kuli Yehova ku Mizepa.

¹⁸ Yamba kuli ayo ngwenyi, Yehova, Zambi ya Izalele kanambe ngwenyi, Yami nachijile A-Izalele ku Engitu, nikunupulula ku moko ja A-Engitu ni ku moko ja mavungu aze eswe anupinjishile.

¹⁹ Hindu tangwa lino lia musono hinwalituna Zambi yenu mukwa kunulamwina ku luyinda wenu mweswe ni lamba lienu lieswe, nikwamba kuli iye ngwenu, Hi chocho ko, alioze nutusele mwanangana kutuyula. Kashika solokenu kumeso ja Yehova nikulita ni minyachi yenu ni tununu twenu.

²⁰ Chocho Samuel yakundamisa minyachi yeswe ya Izalele mba munyachi wa Mbenjamine wasakukile.

²¹ Yakundamisa munyachi wa Mbenjamine nikulita ni majimo jo, mba jimo lia A-Matri liasakukile. Mba Saulu mwana wa Kishi wasakukile, alioze muze amufupile kamuwanyine.

²² Kashika ahulile Yehova nawa ngwo, Yono lunga hindu kwali, nyi? Yehova yakumbulula ngwenyi, Haswama hakachi ka yikwata.

²³ Yazomboka kumusaka mba muze hamana hakachi ka atu wasuhile helu lia atu eswe chize ku yipaya yenyi kwilu.

²⁴ Samuel yamba kuli atu eswe ngwenyi, Talenu yoze Yehova hasakula. Niumwe walifwa nenyi hakachi ka atu eswe. Atu eswe yakalumioka ngwo, Vulie mwanangana!

²⁵ Mba Samuel yalumbununa kuli atu je shimbi ja wanangana; yajisoneka mu mulanda nikuutumbikila kumeso ja Yehova. Samuel yashika ni atu, yaatuma mutu mweswe ku zuwo lienyi.

²⁶ Saulu nawa yaya ku zuwo lienyi ku Ngibia. Kwayile hamwe nenyi tujita aze Zambi haasunga ku mbunge jo.

²⁷ Alioze amwe atu amokomoko yamba ngwo, Yono kuchi mahasa kutulamwina? Yamulelesa, kamunehenene mulambu, alioze iye kachisele mbunge.